Read Kuranko Aiseya 47 Bible Online

Aiseya 47 - Kuranko bible

Aiseya 47

¹ Mari ko, “Babilɔn soe, bɔ ila mansaya-waganɛ rɔ. I ni i sigi gbangban rɔ di-kɛ-tinɛ. I mani de nun iko kɔɛn-kurɛ. So-karantan le ile la nun, kɛlɛ ma ke bɛ min tɔ. I yereyere ma tun iko fɔlɔ. I ye yɔɔnyɛ le la gbɛ!

²I ni kolonkalan bi ka don kolon-tugi rɔ! Yala-kurɛ bɔ i yɛ kun na! Kɔnyɔ-kurɛ bɔ i ma. Ila fanɛ mayɛlɛ yi tɛgɛ tinɛ.

³Mɔgɛnu si i makolɔn yen. I si miliya anu yala.” Mari ko a si a tayili sara i la. A ti kinikini mɔgɔ-wo-mɔgɔ ma ile Babilɔn soe burɔ.

⁴Ma kunkalɛ le Mari Sɛnbɛ-Bɛɛ-Tigi la. A tɔgɛ le Isirɛlata Alla-sɛnimɛ.

⁵Mari ko, “Ile Babilɔn, i radenɛ ni to pinpi rɔ. Nyamanɛnu ti i kele tun ko musu-mansɛ.”

⁶Mari ko ale diminyanɛ male ata Isirɛla mɔgɛnu ma nun. Ma biranɛ a bolo iko ata ma ma la. A ko a ara ma kunyɛ don Babilɔn kɛnu bolo, ado anu ma kinikini ma ma. A ko hali mala kɛmɔgɛnu, anu bi wonu natofi-tafila.

⁷Ile Babilɔn miri ko i ye tola musu-mansayɛ le la tolon, ado i miri ma ke ko su kɛnu ma nun. I miri ma ke ko a si a laban i bolo ka.

⁸ Ile Babilɔn soe, i tole masɔ, sewɛ di ile min ye wɛ kɛ, kɔni, i miri ko i siginɛ lafɛrɛ rɔ. I ye i nyɛrɛ matagbala. I ko i rakɛn fenfen sa nyɔ. Ile ma a lɔn nun ni i si ma kɛɛ-musi la. I ma a lɔn ko i si foo ila dannu na.

⁹Ko fila si sigi i ma anu nyɔgɔn fɛ nya-kun-kelen, i si foo ila dannubɛ ila kei la filili! Ado nfan, ila duruyɛ anubɛ ila kofo-denyɛ ti ke i lakisila muk!

¹⁰Mari ko ile Babilɔn min bara la i nyɛrɛta karagbɛlɛyɛ la, i miri ko mɔgɔ-wo-mɔgɔ ya sa i la. Ila hɛnkilimayɛ anubɛ ila ko-lɔn ara i lasama kilɛ ma. I ye a fɔla ko Alla le ile la. I ko i nyɔgɔn sa.

¹¹Kasarɛ si na i ma. Ila duruya fenfen ti a lasɛgi. Tɔrɔyɛ si na i ma fenfen ti ke i kunyɛ bɔla min tɔ. Halakiyi si na i ma tiriya, i ma kiyo wɛ halakiyi min sufa la wɛ, kɔni.

¹²Kebi i dennɛ, i ye sɛbɛnu kirila ka duruyɛ kɛ. I ko i ni to wo kun na. Tumado wonu si tɔnɔ di i ma. Tumado i si ke i yogenu takilanna wonu na le.

¹³I makawandilɛnu ya a ma, i munantɛgɛra. Ila lole-lakɔrɔsilɛnu nara i dɛnbɛn tinɛ. Anu bi lolenu wara-koe rakaranna i ye. Anu bi san-kole wara-koe rakaranna i ye. Karɛ-wo-karɛ, anu bi yarɔ-koenu fɔla i ye. Nba, wonu ni na i kunyɛ bɔ a rɔ.

¹⁴I makawandilɛ kɛnu si ma iko tɛ wa sigi yefe-gbalɛ la. Hali ka anu nyɛrɛ lakanan, anu ti ke. Tɛ wo wuyan si anu tabɔ, ado anu gbala ta ma kɛ la.

¹⁵I wara i to lole-lakɔrɔsilɛ minnu ma kebi fɔlɔ, wonu tɔnɔ ti taran i ma hali! Wonu si i bolokanɛ to ka ta anu ye fulufele, ado i lakananna fenfen ti taran.