Read Kuranko Aiseya 49 Bible Online

Aiseya 49 - Kuranko bible

Aiseya 49

¹ Wole wula-yanna-mɔgɛnu, wo ni wo tole masɔ. Yanni n ni sɔrɔn, Mari ara n yabɔ, bi ko ma. A ya n yabɔ ka n ma ata wɔli-kɛlɛ la. Kebi n bi n na burɔ, Mari ya n tɔgɛ sa.

² A ya nna kumɛnu dɛ lasa iko faan. A ya n yamasansan a kɔɛn la. A ya n ma iko kalabɛn-nasulennɛ. A ya n namara iko kalabɛn tenbi a sa-bɔrɛ rɔ.

³Mari ya a fɔ n ye ko ata wɔli-kɛlɛ le Isirɛla[19] la. A ko ka a tɛgɛ wo ma, mɔgɛnu si ale Mari matɔgɔ.

⁴Kɔnɔ nde ko n bara wɔli-gbɛlɛmɛ kɛ fu! N bara n sɛbɛ don kɔnɔ n ma ko-bɛrɛ yen a rɔ. Fɔ Mari, wo le si nna wɔlɛ tɔnɛ yen. Alla si n barayi nna wɔlɛla ko la.

⁵Yanni n ni sɔrɔn, Mari ara n mondo n na burɔ ka n nabɔ alako n ni ata mɔgɛnu nasɛgi a ma ka Isirɛla mɔgɔ-ranyɛnsɛnnɛnu kundɛn. Mari ye nala gbiliyɛ dila n ma ka n sɛnbɛ don.

⁶ Mari ara a fɔ n ye ko, wɔli-belebele ye nde, ata wɔli-kɛlɛla ko la. Isirɛla mɔgɛ toe minnu tonɛ, a si wonu nasɛgi anuta gbiliyɛ rɔ kɔnɔ min kolo wo ko, a ko anu si ma waan la sibolenu ye alako duninya mumɛ la ni kisi.

⁷Isirɛlata wɔli-kɛlɛ wo gboyara mɔgɛnu ye. A bɔrɔbɔnɛ sibolenu ye, ado a mara mansɛnuna yɔɔn la fanan. Wo kunkalɛ, Isirɛlata Alla-sɛnimɛ, wo ya a fɔ mɔgɛ wo ye ko, mansɛnu ba a yen anu ni anu nakɔɛnma a gbiliya tinɛ. Kun-tiginu fanan si mɔgɔ kelan wo yen ka anu madu a kɔrɔ ka anu famayigi. Kɛ bɛɛ si ma bawo Mari ara ban ata wɔli-kɛlɛ yabɔla. Isirɛlata Alla-sɛnimɛ ti a kan tinya.

⁸ Mari ara a fɔ ala mɔgɛnu ye ko anu kisi-wati wa ke tumɛ min, a si ala duwɛ layigi anu kuma. A si anu dɛnbɛ iko anu ya a rakele nya min. A ko a si anu kandan ka anu natanka. Wo si ma sarama-kan misalɛ la Yerusalɛm kɛnu anubɛ mɔgɛ bɛɛ tɛma. A ko a si a ma, anu ni anu sigi nyamani-tinyani-kɔrɛ wo rɔ tun.

⁹ A ko a si yelela-mɔgɛnu bɔ yele la. Minnu namaranɛ pinpi rɔ, a si waan di wonu ma. Anu si ma iko sagɛ minnu bi anu de-nyinina kɔnkɛnu ma.

¹⁰Kan-nagbalɛ anubɛ kɔnkɛ ti anu bira. Tele anubɛ tele-mara-tele ti anu tɔrɔ bawo anu di anu makandannɛ ye. A si ta anu na tenke-dɛ la.

¹¹A ko a si kila-wɛ sa kɔnkɔ-layan-bɛ kuma ka kila-fongban-bɛ rabɛn ata mɔgɛnu ye.

¹²A ko ata mɔgɛnu si na ka bɔ wula-yan la. Anu si bɔ kantɔ anubɛ tele-yigi wara la ka bɔ Asuwan soe fanan dugula wara la.

¹³San-kole ni a dɛ sa-a-rɔ sigi sa tinɛ. Dugu-kole ni a lawɔyɔ sewɛ bolo. Kɔnkɛnu ni sigi-sɛ dabira anu sɛbɛ-kuna-wɛ la. Mari si ala mɔgɛnu nafɛrɛ ka kinikini ata mɔgɔ-tɔrɔnɛnu ma.

¹⁴Kɔnɔ Yerusalɛm kɛnu bi a fɔla ko Mari ara a ban anu na. A ara nyina anu ko salon!

¹⁵Woletɔ Mari ye anu yabila ko denba-tigi si nyina ata dan ko, wa? A si ke a banna a sɔrɔn-dan la? Hali a mara, musi ni nyina ala dan ko kɔnɔ Mari ti nyina male ko muk!

¹⁶Mari ko a ti nyina male Yerusalɛm kɛnu ko hali! A ara ma tɔgɛ sɛbɛ a kɔɛn burɔ gbarr!

¹⁷Minnu bi nala soe wo sɔ-kurɛ kɛla, a ko wonu natoe le kaka. Minnu bara nyɔ tinya, wonu si bɔ nyɔ.

¹⁸Wo ni wola foolɛ mafɛlɛn min bi mala. Wola mɔgɛ minnu kundɛnnɛ, wonu namatoe le. Mari ko a fotɛ a nyɛrɛ rɔ ile Yerusalɛm soe, i si i wasi ila mɔgɛ wonu na iko kɔɛn-kurɛ wa a wasi ala fen-kolomɛnu na.

¹⁹Ile Yerusalɛm soe, ila nyamanɛ ara tinya ka ma tonbɔn la kɔnɔ minnu bi nala sigila nyɔ gbɛ, nyɔ ra si dɔgɔya anu ma tun. Anu denu minnu ya i tinya, anu si ta i ma wula la pon!

²⁰Ile Yerusalɛm, ila mɔgɛnu minnu sɔrɔnta biralɛ rɔ, lunyɛ do, wonu si na a fɔ ko, “Kan tinɛ kɛ dɔgɔ mala ko la. Fɔ ni ma ya a makofu.”

²¹Nba ile Yerusalɛm, i si a fɔ i nyɛrɛ ma ko, “Yon ya den-siyamɛ kɛ bɛɛ sɔrɔn n ye?” I si a fɔ ko i wara foo ila dan bɛɛ la ko i ti den-gbɛrɛ sɔrɔn tun. I ko anu bara i gben ka i to biralɛ rɔ kɔnɔ yon ya dan kɛ damasi labɔ a rɔ i ye? I si a fɔ tun ko i bolokanɛ tora min kɛ, dan kɛ bɛɛ bɔra mintɔ gbɛ?

²²Ma Tigi Mari ya a fɔ male ata mɔgɛnu ye ko a wa a kɔɛn keri sibolo-gbɛrɛnu ye tumɛ min, wonu si na anuna dannu na i ma tun.

²³A ko mansɛnu si ma iko i fanu. Mansɛnuna musinu si ma iko i nanu. Anu si anu maburun i kɔrɔ ka i gbiliya. Anu si ila sanbarɛ bɔ i kian rɔ i gbiliya tinɛ. A ko kɛnu ba ma tumɛ min, i ni na to Mari lɔnna ita Mari la. Mɔgɔ-wo-mɔgɔ wa ala dɛnbɛnɛ Mari makɔni, wo tigi ti baya.

²⁴Kɛlɛ-dan ya fan minnu bi kɛlɛ rɔ, mɔgɛ si ke wo songbanna a bolo, wa? Mɔgɛ si ke mɔgɔ-biranɛ porokɔlɔla kɛlɛ-nyana bolo?

²⁵Mari ko wo ye nala mala le yati! Mɔgɔ-biranɛ si a porokɔlɔ kɛlɛ-nyana bolo. Kɛlɛ-dannu ya min bi kɛlɛ kuma, wo si toronde anu na. Mari ko mɔgɔ-wo-mɔgɔ ya ile Yerusalɛm kɛlɛ, ale fanan si wo tigi kɛlɛ. A si to ila dannu kunyɛ bɔla gbaran rɔ.

²⁶A ko i niyi ragbɛrɛnnɛ min bolo, a si a ma, wonu ni to anu nyɔgɔn dɔnna kedeku! Anu yele si a ma, anu kun ta ni fin iko gbɛɛtore. Wo wa ma tumɛ min, a ko mɔgɛ bɛɛ ni na to ale Mari lɔnna Mari la. Ale le kelen pe si i lakisi ka i to i fanbolo. A ko anu si ale Mari lɔn Isirɛlata Alla-Sɛnbɛmɛ la.