Read Kuranko Aiseya 56 Bible Online

Aiseya 56 - Kuranko bible

Aiseya 56

¹Mari ya kɛ le fɔ ala mɔgɛnu ye. A ko wo ni don ko-telenni-kɛ rɔ bawo kisi-koe fɛ ma yan wo la tun. Wo kunyɛ si bɔ gbaran rɔ mɔgɛ bɛɛ yala.

²Mɔgɔ-sewanɛ le wo tigi la min bi a Sulen-Tele gbiliyala iko tɔn ya a fɔ nya min. Mari ko a si duwa wo tigi ye min ti ko-yogomɛ ma.

³Sibolo-gbɛrɛ fenfen min bara a nyɛrɛ kofu wole Marita mɔgɛnu ma, wo tigi kana a fɔ ko mabɛ Marita mɔgɛnu, kelen de ma la. Kei-tɛgan fanan kana a fɔ ko bawo a ma den sɔrɔn, Allata sa ale wara-ko rɔ.

⁴Mari ya kɛ le fɔ ko ni tɛgan min ya ala Sulen-Tele gbiliya ka ala tɔn bira a kilɛ fɛ ka a hɛnɛ koenu kɛ,

⁵a si a ma, a tɔgɛ ti tunu Bato-Bɔn la. Gbiliyɛ wo fisa a ye dan ko. A si tɔgɛ di a ma min ti bɔ mɔgɛnu burɔ muk!

⁶Sibolo-gbɛrɛ minnu bara kofu Marita mɔgɛnu ma, minnu bi a batola ka a gbiliya, ado anu bi Sulen-Tele gbiliyala a kilɛ fɛ, ka ata tɔnnu bira, Mari ye a fɔla mɔgɛ wonu ma ko

⁷ a si ta wonu na ata kɔnkɔ-sɛnimɛ kuma. A si sewɛ di anu ma a madiya tinɛ, ado a si sɔn anuna sarakɛnu na anu bi minnu bɔla ata saraka-mintan-tinɛ kuma. Ata Bato-Bɔn si ma madiyali-bɔn la sibole bɛɛ ye.

⁸Ma Tigi Mari min ya wole Isirɛla mɔgɛnu kunyɛ bɔ birɛ rɔ, wo ko a si ala mɔgɔ-kundɛnnɛnu makofu tun.

⁹Mari ko wole sogo-feremɛnu, wo na sagɛnu tafarafara. Wole firarɔ-sogenu, wo na ala mɔgɛnu dɔn kedeku!

¹⁰Kun-tigi minnu bɛnta ka mɔgɛnu kandan, wonu fiyonyanɛ. Anu ma a lɔn anu bi min kun na. Anu dama manɛ iko wuli min ti ke gbongbonna. Anu ti ke wonwonna mɔgɛnu ma. Kinɔgɛ di anu ye ha! Anu sa fenfen kun na fɔ kiyo-kunba-sɛ.

¹¹Anu hamahamɛ iko wulu-wasabɛlɛ. Anu mani de iko saga-fɛ-biralɛ min kunyɛ rakolɔn. Anu sa fenfen kun na fɔ ka hɔn anu nyɛrɛ la. Anu bi nyɔ dɔrɔn fɔ ka anu kin-kɔrɛ lafasa.

¹²Anu kɛnɛna a fɔla ko, “Wo na, ma ni ma min kɔlikɔli! Ma ni gbɛɛ-kunɛ min. Sinan-minnɛ si tenbi bitɛ la.”