Read Kuranko Aiseya 57 Bible Online

Aiseya 57 - Kuranko bible

Aiseya 57

¹Telenbagɛnu bi fagala kɔnɔ mɔgɛnuna ko sa anuna ko rɔ. Alla wa mɔgɔ-nyimɛnu niyi bi tumɛ min, mɔgɛnu ti a lɔn Mari le wara anu bɔ ko-yogomɛnu da kun tɔ.

²Mɔgɛ minnu bi Alla sako kɛla, wonu si saya ka to yisi-kimɛ rɔ.

³Mari ko wole bolo-tafɛlɛnnɛnu, wo na yan wole yɛlɛn-dannu, wole kenita-dannu,

⁴wo ye yon mala yɛlɛnma-fan la? Wole ye yon mɔɛnna? Wo ye wo nagan labɔla yon telen tɔ? Wo ara wo kan-kɔ sɔ Alla la ka ma foninya-fɔlɛnu na.

⁵Wo si wola bɛsɛnu hɛnɛ sɔn-yogoyɛ le la kɔlɔma-kuru-wɛnu kɔrɔ. Wo ye wola dannu fagala ka anu ma sarakɛnu na fara-gbaran anubɛ farannu na.

⁶Wo ye kuru-manunkunɛnu kɔla. Wo ye minni-sarakɛnu nabonna kuri wonu ma ka dɔn-fen-kun-fɔlɛ-sarakɛnu di anu ma. Wo ni wo miri ko kɛnu wara-ko si a ma, Mari ni wo makoto, wa?

⁷Wo ye tala sarakɛnu bɔla kɔnkɔ-layan-bɛnu kuma ka wola sɔn-yogoyɛ kɛ nyɔnu tɔ.

⁸Wo ye wola bɛsɛnu dogonna kankan anubɛ tigin-dɛnu[20] kɔrɔ. A ko wole kun-tiginu bara wo masɛgi a la feufeu! Wo ye sara-koe rabɛnna wo nyɔgɔn tɛma alako ka wo nyɔgɔn maki. Wo ye wo mawuranna ka to wo nyɔgɔn mafɛlɛnna. Wo ye birinkannu burunna wo ma ka sɔn-yogoyɛ dabira.

⁹Wo ye tuli anubɛ sɛnti-suma-diyamɛnu kɛla wo ma alako ka wola bɛsɛ Molɛki hɛnɛ. Wo ye mɔgɛnu natala wula-yannu na pon, hali lakira fanan alako wo si bɛsi-kurɛnu sɔrɔn nya min wo si minnu kɔ.

¹⁰Wo ye wo kunyɛ donna bɛsi-kura-nyinɛ rɔ, ado wo sa bandanna. Wo ye a yenna min kɛ, kisimiriya-bɛsɛ wonu bi wo dɛnbɛna, woletɔ wo kan ta ma kun.

¹¹Mari ko wo ye kilanna bɛsɛ nyamintan na min bi a mala, wo ye foninyɛ fɔla a ye? A ko wo ma wo miri a ma doni bɛrɛn fɔ wo ya wo kan-kɔ-sɔɛ min kɛ a la. A ko a madenɛ ara mɛ min kɛ, woletɔ wo sa kilanna a la tun, ba?

¹²A ko wo miri ko wo ye min kun na, wo kin kɔnɔ a ko a si wo kɛ-nya labɔ gbɛ rɔ, ado wola bɛsɛnu ti ke wo kunyɛ bɔla wo rɔ mumɛ!

¹³Wo wa di wo dɛnbɛn-koe rɔ, wola foninya-bɛsi-ladɛnnɛnu ni wo dɛnbɛ. Hali fɔn-fɛlɛfɛlɛnɛ, a si ta bɛsɛ wonu na. Kɔnɔ a ko minnu lanɛ ale la, nyamanɛ ye mala wonu denu halalɛ la. Wonu denu si to a batola ata kɔnkɔ-sɛnimɛ kuma.

¹⁴Mari ko ala mɔgɛnu ni sɛgi a ma. Wo ni wola gbaran-fannu bɔ kilɛ la. Wo ni kilɛ rabɛn yɔnyɔn!

¹⁵Alla-gbiliyanɛ min bi san ma pon, min sɛnima, ado a ye nyɔ habadan, wo ko ale mayiginɛ kan-tina-sɛnimɛ le tɔ san ma pon! A ko hali wo, mɔgɔ-famayiginɛ minnu bara nimisa, a si taran wonu tɛma. A ko minnu famayiginɛ, a si ni kurɛ di wonu ma. Minnu nimisanɛ, a si wonu niyi kurakuraya.

¹⁶A ko a ti to wo kɛlɛla. A ti kɔrɔtɔ wo ma. Ni a tora wonu mala wo la, hadama-dan bɛɛ si firan dugu-kole ma. A ya sɔndɔmɛ min bɛɛ ladan, a ti wo bɛɛ lato dogbe!

¹⁷A ko a kɔrɔtɔnɛ wo ma ka a tɛgɛ wola kin-kɔrɔla-fasɛ ma. A ko a ya a kan-kɔ sɔ wo la ka wo tɔrɔ ala fondo-bɔɛ la. A ko hali wo, wo ma wo bɔ wo gbɛ da la. Wo ye ko-yogomɛ kun na tolon!

¹⁸A ko hali wo ye wo sɔn-yogomɛ da kun tɔ, a ko hali wo, a si to wo lakɛndɛyala. A ko a si wo bila kila-telennɛ fɛ ka wo lafɛrɛ.

¹⁹ Min nimisanɛ, wonu si a matɔgɔ. A ko minnu fɛ-yan a la wo, minnu fɛ-wuru a la wo, a ko a si yisi-kima-bɛrɛbɛrɛ anubɛ kɛndɛyɛ di wonu ma.

²⁰A ko karagbɛlɛnu mani de iko kɔgɔ-yi ye tugula a rɔ nya min. Anu ti bandan yi dundula bore la.

²¹ Alla ko karagbɛlɛnu ti yisi-kimɛ sɔrɔn.