Read Kuranko Aiseya 59 Bible Online

Aiseya 59 - Kuranko bible

Aiseya 59

¹Wo kana wo miri ko Mari rafaganɛ wo lakanan-koe la. Wo kana wo miri ko a wɔlɔ-gbereni de, a sa wo kan namɔɛnna.

²Wola ko-yogomɛ le wara a ma, wobɛ wota Alla ara fara. Wo hakɛ le wara a ma, a ara a kan-kɔ sɔ wo la. Woletɔ a sa wo kan namɔɛnna tun.

³Wo ara mɔgɛnu faga wo bole la. Wo bole pagasɛ mɔgɔ-yele la. Wo dɛ lamunnɛ foninyɛ la. Karagbɛlɛya-kumɛnu bi wo nagan-sungban la.

⁴Wo wa ta kiti-bɔn la hali min yo, wo si yiliki sɔrɔn. Tonya-fɔla fenfen sa kiti-bɔn la. Wo ye karamɛ layɛlɛla wo nyɔgɔn ma. Wo ye nanparan ratɛgɛla donu kan ma ka ko-yogomɛ dan-natenbi.

⁵Karagbɛlɛyɛ ye a latiila iko duguma-fen-maralamɛ ye a latiila nya min. Min ba karagbɛlɛya-kɛwɔlɛ kɛ dɔn, wo tigi si faga. Ni karagbɛlɛya-kɛwɔlɛ kɛ do latiira a nyɛrɛ ma, duguma-fen-maralamɛ si bɔ a rɔ. Mɔgɛnuna foninyɛ mani de iko yalan-yalanna san-yili.

⁶Anu bi bila-bilala anu nyɔgɔn tɔ wo nya na le, mɔgɔ ti wo ma kurɛ la. Anu sa fenfen kun na fɔ ko-yogoma-kɛ. Anu bi mɔgɛnu matanbanna anu bole la.

⁷ Anu si anu buri tala ko-yogoma-kɛ-tinɛ tiriya! Anu natiri hakɛbɔnɛnu fagala. Anu miri bɛnnɛ ma fenfen ma fɔ wunduyogoyɛ. Anu ya anu kun telen kan-bo-kan na, fenfen ti taran nyɔ fɔ kasarɛ anubɛ halakiyi.

⁸Anu ma a lɔn anu si to yisi-kimɛ rɔ nya min. Anu kɛ-nya fenfen ma telen. Anu tadunɛ kɔnkɔrɔntɔn! Mɔgɔ-wo-mɔgɔ bilara kɛnu fɛ, wo tigi ti yisi-kima sɔrɔn.

⁹Mɔgɛnu bi a fɔla ko, “Ko-telennɛ fɛ-yan ma la pon! Telenbagayɛ, wo ma ma masɔrɔn. Ma ye waan makɔnɔna kɔnɔ pinpi burunnɛ ma kuma bɛff! Yaga, ma ye tagamana pinpi-dɛgbɛ le tɔ.

¹⁰Ma manɛ iko fiyɔn minnu bi anu bole mɛmɛla dandan ma. Ma ye kilɛ nyinina iko mɔgɛ min ya sa. Ma ye ma kian latugula tele tɛma iko surɔ-tagamanɛ. Ma manɛ kolo-gbɛlɛnu tɛma iko furi.

¹¹Ma dama ye kurunna iko suluki. Ma kuman-kan makinikininɛ iko purulantɛ. Ma ye ma yɛ lakalanna telenbagayɛ ma kɔnɔ ma sa a yenna. A sɔgɛ ye ma la, ma ni kisi kɔnɔ kisi-koe fɛ-yan ma la pon!

¹²“Ma ara ko-yogoma-siyaman ma mata Alla la. Ma hakɛ ye a yirala ma la ko ma ye kila-yogomɛ le fɛ. Ma ya a lɔn ko ma ara ma kan-kɔ sɔ Alla la. Male ya a lɔn ma ara karagbɛlɛya-koe minnu ma.

¹³Ma ara hakɛ kɛ ka bila Mari la. Ma ara ma kan-kɔ sɔ a la. Ma ya ma rabɛn mɔgɛnu tanban-koe la alako ma si Alla sɔsɔ nya min. Yanfanteyɛ anubɛ foninya-fɔɛ ye bɔla ma yisi le tɔ.

¹⁴Anu ko ma ara ko-telennɛ gben. Koe min bɛnnɛ, ma ara ma masɛgi wo la. Ma ye ma kian latugula tonyɛ la kila-kolenu na soe tɛma. Ma sa sɔnna ko-telennɛ-ladon-koe ma soe burɔ.

¹⁵Hali tonyɛ nyantaranɛ, a ti yen kan-bo-kan, ado ni mɔgɛ ya a fara ko-yogoma-kɛ la, anu si wo bira boloko-yogomɛ-kɛ.” Mari ya a kolan lakalan, a ma ke telenbagaya fenfen yenna mɔgɛnu tɛma. Wo ya a ma, a kɔrɔtɔra.

¹⁶ A ma mɔgɔ-den-kelen yen anu tɔ min si hina bolo-kolɔnnu na. Wo ya a tɛrɛna, a ma mɔgɛ yen anu tɔ min si dɛnbɛnɛ kɛ. Wo le ya a ma, Mari ya a fanka lawɔli ka mɔgɛnu dɛnbɛ alako anu si sɛnbɛ sɔrɔn nya min.

¹⁷ Marita ko-nyimɛ le manɛ a nyɛrɛta duruku-ba la. Kisi-koe le manɛ ata fulɛ la. Tayili-sarɛ le manɛ a fɛrɛya-bɔɛ la. Kerinteyɛ le manɛ ala kan-makɛ-fan la.

¹⁸Mari-yogenu bi min mala a la, a si a tayili sara wonu na. Minnu bi a kan ma, a si ata fondo-bɔɛ yira wonu na ka anu tɔrɔ. A si kɔgɔ-yi dafɛ-mɔgɛnu tɔrɔ iko a bɛnta anu ni tɔrɔ nya min.

¹⁹Wo si a ma, tele-yigi warala-mɔgɛnu ni kilan Mari la. Tele-bɔɛ-warala-mɔgɛnu ni a gbiliya. Mari si na tiriya iko bɛ fanɛ ye yigila a burila nya min, ado Mari karata fɔnyɔ le ye a mala, bɛ ye yigila fanka la wo nya na.

²⁰ Mari ko ale kunkalɛ ye nala Yerusalɛm, min si anu nakisi. Yakoba kebilɛ minnu bara anu sɔ anu hakɛ la ka sɛgi Alla ma, a si wonu kunka.

²¹Mari ko anubɛ ata mɔgɛnu bi nala sarama-kan min kirila anu nyɔgɔn tɛma, wo le kɛ la. A ko ata kumɛ anubɛ ata Sɛnbɛ ti bɔ anu fɛ. A ko a si to anu denu, anubɛ anuna dannu, anubɛ anu kebilɛnu fɛ burubukai!