Read Kuranko Aiseya 66 Bible Online

Aiseya 66 - Kuranko bible

Aiseya 66

¹ Mari ko ata mansaya-waganɛ le san-kole la. A tontɛ rasagan tinɛ le dugu-kumɛ la. Wole lara a la, wo si ke nfen bon-sufa sɔla ale ye? A ko a si a sulen kan-tina-nyuman tɔ?

²A ya fan bɛɛ dan a kɔɛn le la. Fan bɛɛ ye gbɛ kɛ le ma bawo ale le ya wonu nadan. Mari ko a si sewa mɔgɔ-sufa kɛnu na, minnu ma wasi, ado anu tole ma gbɛlɛ. Anu bi kilanna a la ka a sako kɛ.

³Minnu bi turɛ fagala sarakayɛ la, wonu manɛ ale Mari yala iko mɔgɔni-gbu-fagalɛ. Minnu bi sagɛ fagala sarakayɛ la wonu manɛ fanan iko minnu bi wuli-kan kerila. Minnu bi fui-fan mala sarakɛ la wonu mani de iko minnu bi ale Mari kɔla kɔsɔ-yele rɔ. Minnu bi isɛnti mintanna sarakayɛ la wo, minnu bi bɛsɛ kɔla wo, fen kelen de wonu na ale Mari yala. Mɔgɛ kɛnu bi anu nyɛrɛ sɔndɔmɛ le fɛ, aleta ma de! Anu bi kisimiriya-koe min kun na, wonu di anu ye kosɛbɛ!

⁴Woletɔ a ko fɔ a wa anu tɔrɔ serr! Anu bi kilanna min na wɛ kɛ, a si anu tɔrɔ wo la. A ya anu takele kɔnɔ mɔgɔ-wo-mɔgɔ ma a denkun. A kumara anu ye kɔnɔ mɔgɔ-wo-mɔgɔ ma a tole masɔ a la. Ale ara a fɔ koe minnu ma ko anu yogo, anu denu bi tola wonu mala. Koe minnu ma di Mari ye, anu denu tora wonu denu mala.

⁵Wole min bi Marita kumɛ birala, wo ni wo tole masɔ a kan la. A ko wo gboyara wo na-kelen-nyɔgɛnu ye. Anu wulita wo kan ma bawo wo bilanɛ ale Mari fɛ. Anu bi wo rasɛ-kumɛnu fɔla ko, “Nba, alamɛ ata fanka ya wo lakisi, woletɔ ma si to wo sewanɛ yenna.” Kɔnɔ Mari ko fɔ mɔgɔ-mayɛlɛnnɛ kɛnu ba tɔrɔ le serr!

⁶Wo ni wo tole masɔ yerelen-kan la Yerusalɛm soe burɔ. Wo ni wo tole masɔ sɔnkɔ-sɔnkɔ-kan la Bato-Bɔn la. Mari le a yogenu tɔrɔ tinɛ wo la. Tɔrɔyɛ min bɛnnɛ anu ma yɔ, a ye wo le sigila anu ma wo la.

⁷ Musi ti dan sɔrɔn bi, sina, a dumɛ ni wuli a la. A ti den-kei sɔrɔn fɔlɔn, dumɛ ni na to nala wo kɔma.

⁸Ha bi, mɔgɔ ma wo sufa lamɔɛn bɛ, ado ha bi, mɔgɔ ma wo rayen bɛ. A ye wo nya na le fanan ko ha bi, mɔgɔ ma nyamanɛ yen bɛ a lasɔla tele-kelen-kirikiri! Ha bi, mɔgɔ ma wo lamɔɛn bɛ fanan ko nyamanɛ ara a lasɔ tele-kelen-kirikiri! Kɔnɔ Yerusalɛm buyi wa a lamaga nya min wo, a si ala dan sɔrɔn.

⁹Mari ko a ye wo nya na le fanan, buyi ti a lamaga, a rakolɔn ni to. Mari ko ni ile Yerusalɛm buyi ya i lamaga a ti tɔn sigi i ma sibolo-kurɛ sɔrɔn-koe la.

¹⁰Ile Yerusalɛm, i ni sewa. Nyɔ di wole min ye, wo ni nyagalen. Wole min donu yisi-magboyanɛ Yerusalɛm wara-koe la nun, wo ni sewa ala ko la gbɛ!

¹¹Wo si a tɔnɛ dɔn, a ni wo rabɔ dass, iko dan na kin-yi ye a rabɔla nya min.

¹²Mari ko a si to yisi-kimɛ dila wo ma iko bɛ ye yigila nya min beyabeya! Duninya-nɔnfulinu si anu kun sa wo ma iko bɛ. Wo si to wo susunna iko den-pulan. Wo si to sigini Mari kɔnkɔn tɔ. Mari si to den-pulan wo radɔnna a tontɛ kuma.

¹³Mari ko a yɛyɛ si to wo fɛ iko denbɛ-yɛyɛ ye tola ala dan fɛ nya min, ado Mari-yɛyɛ si to ile Yerusalɛm fɛ wo nya na le.

¹⁴Wo wa kɛ damasi rayen wo yɛ la tumɛ min, wo si sewa dɔgɔma-ma-de! Wo si to sabatila iko binyɛ. Marita wɔli-kɛlɛnu si ata sɛnbɛ yen kɔnɔ Mari yogenu si a diminya-nya yen anu ma.

¹⁵I ma Mari yen nala tɛ la a bolo? Marita kɛlɛ-dannu bi nala kirindi la anu bolo iko fɔn-digidigi-wɛ. A si a yogenu tɔrɔ ata fondo-bɔ-belebele la. A si anu tɔrɔ ta-mɛlan la.

¹⁶Mari si kiti tɛgɛ tɛ la. A si hadama-dan bɛɛ tɔrɔ faan la, ado a ye minnu wara-koe kala-a-la, wonu denu siya.

¹⁷Mɔgɛ wonu bi anu nyɛrɛ mala mɔgɔ-sɛninyanɛ la alako anu si ta anuna bɛsɛnu kɔ nya min anuna kan-tina-hakikɛnu tɔ. Anu kungban-kungban kɛnɛna bilala anu nyɔgɔn fɛ ka ta kan-tina-hakikɛ wonu tɔ. Anu bi kɔsɔ-soge anubɛ tula-soge anubɛ fen-haramunɛ donu dɔnna nyɔ. Kɔnɔ Mari ko anu dama si na halaki anu nyɔgɔn fɛ tiriya!

¹⁸Mari ko a ya anu miriya-yoge anubɛ anu kɛ-nya-yoge lɔn. Woletɔ a ko a ye nala anu tɔrɔla. A si kan-siyamɛ-mɔgɛnu nadɛn kan-tina-kelen ala gbiliyɛ yen-koe la.

¹⁹Minnu bara to anu niyi la, a si tamasere sa wonu ma ka wo donu nata sibolo-toenu ma. Anu si donu nata Tasisi, anubɛ Libiya, anubɛ Ludi, anubɛ Misɛki, anubɛ Rɔsi,[21] anubɛ Tubali, anubɛ Kirisi. A si donu nata kɔgɔ-yi-dafɛ-sigilɛnu ma minnu bi wula-yan la. A ko a si anu nata mɔgɛ donu ma kan tinɛ wonu tɔ minnu ma a mankan anubɛ ata gbiliyɛ wara-koe lɔn bɛ. Anu ba ke nyɔnu tɔ, anu si ata gbiliyɛ wara-koe rakaran anu ye.

²⁰Wonu tenbi sɛgila, anu si sɛgi wo ta-nyɔgɛ Isirɛla mɔgɛnu na anu bolo. Anu si to nala ata kɔnkɔ-sɛnimɛ kuma Yerusalɛm. Minnu bi nala anu dununa, wo le kɛnu na, soee wo, kirindi wo, maka wo, sofɛlɛ wonubɛ nyomɛ. Anu si ma iko fui-fen-sarakɛ mɔgɛnu bi nala min na miran-sɛnimɛ rɔ Mari Bato-Bɔn la.

²¹Mari ko anu si mɔgɛ wo donu yabɔ ko wonu ni ma saraka-masɔlɛ la anubɛ Lifayi bɔnsɔnnu na.

²² Wola dannu anubɛ wole tɔgɛ mankan si to iko san-kolo-kurɛ anubɛ dugu-kolo-kurɛ si to nya min.

²³Bɛɛ si na Mari bato tinɛ. Anu si to nala a batola Karɛ-Kurɛ-Ladɛn kuma anubɛ Sulen-Tele bɛɛ ma.

²⁴ Minnu bi Mari kan ma, Mari-batolɛnu si ta wonu furinu bolokanɛ yen belenna soe kɔma. Tunbi minnu bi wonu dɔnna, wonu ti faga. Tɛ min bi furi wonu mintanna, wo ti dufen. Furi wonu mafɛlan ti a diya don mɔgɛ rɔ.