Read Kuranko Aiseya 7 Bible Online

Aiseya 7 - Kuranko bible

Aiseya 7

¹ Mansa Yotamna den, Mansa Ehasi, Mansa Yusaya mamanɛ, kɔni, wo ye Yuda nyamanɛ kun na tumɛ min, kɛlɛ donta nyamanɛ kun na. Siriyanuna Mansa Risen anubɛ Isirɛla mansɛ Rɛmalayala den Peka, wonu nadɛnta ka Mansa Ehasi kɛlɛ Yuda nyamanɛ rɔ. Kɔnɔ anu ma ke Yerusalɛm nɔla, Yuda nyamanɛla so-karantan, kɔni.

²A lamɔɛn Yuda mansɛ bolo nun ko Siriya kɛlɛ-dannu bara don Isirɛla nyamanɛ rɔ, anubɛ ala nyamanita-mɔgɛnu kilanta ha anu tora yɛrɛyɛrɛnna iko fɔnyɔ tenbi kɔlɔmanu namagala.

³Mari ya a fɔ nde, Aiseya ye ko mabɛ nna den Seyari-Yasubu[2] ni ta Mansa Ehasi taran. Yi min nadɛnnɛ kɔnkɛ kun tɛma, wo worɔn ye yigila ha kura-ku-tinɛ wo dafɛ. A ko ma si mansɛ taran kilɛ la nyɔ.

⁴A ko n ni a fɔ mansɛ ye ko a kana kilan. A yisi ni kimɛ poi! A ni a yɛ bɛn Alla ma. Mansa Risen anubɛ ala Siriya kɛlɛ-dannu wo, anubɛ Mansa Peka wo, a ko wonuta yisi-bɔ-masibɛ ma yogo ka ke sɔgɔ-kundu fila sisi rɔ.

⁵A ko Siriya mansɛ anubɛ ala mɔgɛnu anubɛ Isirɛla mansɛ, anu bara yanfɛ don.

⁶Anu miriya bɛnni ma fenfen ma fɔ ka bui Yuda nyamanɛ ma ka ala mɔgɛnu takilan alako ala nyamanita-mɔgɛnu si kofu anu ma nya min. Wo kɔma, anu ni na to Tabiyɛlila dan mala mansɛ la a gbɛ rɔ.

⁷Kɔnɔ ale Mari ko a ara wo latɛgɛ ko kɛ ti ma muk!

⁸A ko min ya a to a ya kɛ fɔ, Siriyanu ta ma gbɛlɛ ka ke anuna so-karantan Damasika kɛnu tɔ. Damasika kɛnu fanan ta ma gbɛlɛ ka ke anuna Mansa Risen tɔ, ado yanni san bi-wɔrɔ ani san loli (65) gbɛ, a ko Isirɛla mɔgɛnu ta ara ban nyɛnsɛnna. Mɔgɛ ti anu lɔn fenfen na wo rɔ tun.

⁹A ko Isirɛla mɔgɛnu ta ma gbɛlɛ ka ke anuna so-karantan Samariya kɛnu tɔ. Samariya kɛnu fanan ta ma gbɛlɛ ka ke anuna Mansa Peka rɔ. Mari ko ni wo ya a kuman-kan to a gbɛ rɔ, wo si simayɛ sɔrɔn.

¹⁰Mari ya n sɔ Mansa Ehasi wara tun. A ko n ni a fɔ a ye ko

¹¹a ni tamasere manyinika ale, ata Mari Alla la. Tamasere wo ni bɔ dugi burɔ pon, ni wo ma, san-kole rɔ pon!

¹²Kɔnɔ Mansa Ehasi ya kilayɛ wo yabi, a ko, “N sa tamasere-wo-tamasere manyinikala. N kana Mari kɔrɔbɔ.”

¹³Nba, nde, Aiseya ko, “Wole Mansa Dawuda kegeyɛnu, wo ni wo tole masɔ a kin na! Nde ma n munyu wo sɔn ma. Wo kana a ma, Alla ni a munyu wo sɔn ma.

¹⁴ Woletɔ Mari nyɛrɛ ko a si tamasere yira i la. Sunkurun-nasɔlɔnɛ si buyi bi ka den-kei sɔrɔn. Wo si a tɔgɔ sa Imanuwɛli.[3]

¹⁵Yanni a hɛnkili la ni kiri, a ye fɛnɛ anubɛ liyi dɔnna tumɛ min,

¹⁶yanni wo wati ni ke, mansa filɛ minnu bi i rakilanna, wonuta nyamanɛ ta ara kolonya filili!

¹⁷“Mari ko a si nyankankantan min nana ile mansɛ anubɛ ila mɔgɛnu kuma, wo da-rakolo, ado kebi Yuda nyamanɛ anubɛ Isirɛla nyamanɛ farata, wo nyɔgɔn tɔrɔyɛ ma na wɛ nyamanɛ kɛ kuma. Mari ko hali Asiriya mansɛ, a si wonubɛ ala kɛlɛ-dannu natugu wo ma.

¹⁸“Wo wati wa ke, Mari ko a si Iyipiti kɛnu kele fuli rɔ ko anu ni na ka bɔ Iyipiti iko sisɛnu minnu bi nala ka bɔ Nayɛli bɛ bolon-laban la pon! Asiriya kɛnu fanan si na ka bɔ anuta nyamanɛ rɔ iko li-kolenu.

¹⁹A ko anu na si dɛn kɔnkɔ-gbɛran tɔ anubɛ farannu na. Anu si anu daga makɛ wɔnɔ-firɛnu dafɛ anubɛ yi-bi-tinɛnu tɔ.

²⁰“Wo wati wa ke, Mari ko a si Asiriya mansɛ masan ko wo ni na ka bɔ Yufereti bɛ kɔgɔma pon! A si na nyamanɛ sɛninya iko kun-siilɛ si kunyɛ gbana nya min anubɛ buyɛ anubɛ nyarasiyi.

²¹“Wo wati wa ke, a ko ni mɔgɛ ya a raya ka ninki-yɛrɛ kelen anubɛ baa fila lamara,

²²wonu si nonɛ min nabɔ, wo si a makoe bɛɛ nyinya nonɛ wo rɔ, ado a mɔgɛ toe min tonɛ nyamanɛ rɔ, wonu si to fɛnɛ anubɛ liyi dɔnna.

²³“Wo wati wa ke tumɛ min, a ko ki-fan min kelen-kelennamɛ si wodi-gbɛ-gbu waga kelen-kelen sɔrɔn, wonu si ma wɔnɔ-gbansan na.

²⁴Mɔgɛnu si donsoyɛ kɛ kalabɛn la nyɔnu tɔ, ado nyamanɛ wo mumɛ bɛɛ, wɔnɔ-gbansan de!

²⁵Anuna sɛnɛ sa tinɛ minnu bi kɔnkɛnuna minɛ rɔ, wonu si ma wɔnɔ-gbansan na ha mɔgɔ ti ke bɔla nyɔ. Nyɔ si ma ninkinu anubɛ sagɛnu de-nyini-tinɛ la.”