Read Kuranko Saraka-Masɔlɛnuta Tɔnnu 13 Bible Online

Saraka-Masɔlɛnuta Tɔnnu 13 - Kuranko bible

Saraka-Masɔlɛnuta Tɔnnu 13

¹Mari ya tɔn kɛnu di Musa anubɛ Aruna ma ko,

²“Puripuri wo, sumunɛ wo, yiri wo, ni wonu siginɛ mɔgɛ do ma, a si na a la saraka-masɔlɛ wara ka a yira a la. Wo si a mafɛlɛn, tumado a ye nala mala kiraya-yogomɛ la a fɛrɛ ma min si tenbi mɔgɛ donu ma.

³Saraka-masɔlɛ wa a mafɛlɛn tumɛ min, ni a ya a yen ko a fɛrɛma-siyi min bi ala tɛlɛ-dɛ rɔ, wonu bara gbɛ, ado a ni a taran, tɛlɛ-dɛ rayiginɛ kibon-kibon, saraka-masɔlɛ si a fɔ worɔ ko, ‘I ma sɛninya. Fɛrɛma-kiraya-yogomɛ ye i ma.’

⁴“Ni a taranta, ala tɛlɛ-dɛ lagbɛnɛ kɔnɔ tɛlɛ-dɛ rasinni ma, ado a fɛrɛma-siyi min bi tɛlɛ-dɛ rɔ, wo fanan gbɛni ma, saraka-masɔlɛ si tɛlɛtoe wo lamara kan tinɛ do rɔ.

⁵A si to nyɔ ha tele wɔrɔnfilɛ si tenbi, a ni na to a mafɛlɛnna. Ni saraka-masɔlɛ ya a mafɛlɛn wo rɔ, a ni a yen tɛlɛ wo ma ta yarɔ, a si a to nyɔ tun ha tele wɔrɔnfila gbɛrɛkɛ ni tenbi tun.

⁶Ni a ya a mafɛlɛn a tele tan-ni-nanɛ ma, a ni a yen tɛlɛ la ara gbala, a si a fɔ worɔ ko tɛlɛtoe kɛ sɛninyanɛ de! Tɛlɛ dɔrɔn de! Kiraya-gbɛrɛkɛ ma. Mɔgɛ wo si ala kurɛ ku. Wo kɔma, a si sɛninya ka sɛgi dagɛ rɔ.

⁷A wa ban kela dagɛ rɔ tumɛ min, a ni a yen ala tɛlɛ ara fafa a ma tun, a si ta saraka-masɔlɛ wara tun.

⁸Wo si a mafɛlɛn worɔ, ni tonya-bɛrɛbɛrɛ le ka na a fɔ ko a ara fafa a ma. Saraka-masɔlɛ si a fɔ worɔ ko a ma sɛninya. Kiraya-yogomɛ le kɛ la min si tenbi mɔgɛnu ma.

⁹“Ni fɛrɛma-kiraya-yogomɛ bɔra mɔgɛ do ma, mɔgɛ do si na a la saraka-masɔlɛ wara.

¹⁰Saraka-masɔlɛ wo wa a mafɛlɛn tumɛ min, a ni a taran, a fɛrɛma-siyi min bi ala tɛlɛ-dɛ rɔ, wo ara gbɛ, ado a ni a taran fanan, tɛlɛ wo nɛɛ donnɛ,

¹¹saraka-masɔlɛ si a fɔ worɔ ko, ‘Kiraya-kuma-kinɔgɔnɛ le kɛ la. I ma sɛninya.’ Hali a ma a mafɛlɛn tele wɔrɔnfila kɔrɔ bawo a gbɛnɛ de worɔ, ko kiraya-bɛrɛ le.

¹²“Ni kiraya su kɛ bɔra a fɛrɛ mumɛ bɛɛ ma, saraka-masɔlɛ si a mafɛlɛn a kilɛ fɛ.

¹³Ni a ya a yen ko tonyɛ le, a ara a fɛrɛ mumɛ bɛɛ bira-a-la, nɛɛ wonu bara gbala a fɛrɛ ma tɛlɛ wonu tɔ, a si a fɔ ko a ara sɛninya.

¹⁴Ni tɛlɛ-nɛɛ bɔra tumɛ min kɛ kɔma, tɛlɛtoe si ta a yira saraka-masɔlɛ la tun. Wo fanan ni a yen a nɛɛ ye bɔla tun, a si a fɔ tɛlɛtoe ye worɔ ko, ‘I sɛninyani ma.’ Ni tɛlɛ-nɛɛ ye bɔla, wo si a yira saraka-masɔlɛ la ka na a fɔ ko kiraya-yogomɛ le ye a fɛrɛ ma.

¹⁵

¹⁶Ni nɛɛ ara gbala a rɔ, tɛlɛ ara kɛndɛya, a si a yira saraka-masɔlɛ la tun.

¹⁷Ni wo ya a yen ko tonyɛ le, tɛlɛ wo ye kɛndɛya-koe rɔ, a si a fɔ worɔ ko tɛlɛto-kɔrɛ wo ara sɛninya.

¹⁸“Ni sumunɛ sigira mɔgɛ do ma kɔnɔ a ara kɛndɛya nun,

¹⁹wo kɔma, sumunu-gba-kɔrɛ wo ya a nɛɛ don tun, a si ta wo yira saraka-masɔlɛ la tun.

²⁰Ni wo ya a mafɛlɛn, a ni a yen sumunɛ wo denkɛ rayiginɛ kibon-kibon, a ni a yen fanan a fɛrɛma-siyi min bi sumunɛ wo dɛ rɔ, wo fanan gbɛnɛ, saraka-masɔlɛ si a fɔ worɔ ko sumunu-tigi sɛninyani ma. Kiraya-yogomɛ le kɛ la min ya a dabira sumunɛ rɔ.

²¹Ni saraka-masɔlɛ ya a yen a fɛrɛma-siyi min bi sumunu dɛ rɔ, a gbɛni ma, ado sumunu-denkɛ rayiginɛ ma, a ni a yen a yirini ma fanan, a si a lamara kan tinɛ do tele wɔrɔnfila kɔrɔ.

²²Kɔnɔ ni a ya a yen, kirayɛ ara fafa a ma, a si a fɔ worɔ ko a sɛninyani ma.

²³Ni saraka-masɔlɛ ya a yen sumunɛ wo ma fafa a ma, a ni a yen, a pɛrɛ wo le dɔrɔn bara to, a si a fɔ worɔ ko a ara sɛninya.

²⁴“Ni tɛ ya mɔgɛ do mamintan, wo ni fɔlɔ a nɛɛ donna,

²⁵saraka-masɔlɛ si a mafɛlɛn. Ni a fɛrɛma-siyi min bi a mintan gbɛ wo ma, a ni a yen wo gbɛnɛ, a rayiginɛ kibon-kibon, kiraya-yogomɛ le wo la min ya a fɔlɔ a mamintan gbɛ wo ma. Saraka-masɔlɛ si a fɔ worɔ ko a ma sɛninya.

²⁶Kɔnɔ ni a ya a yen, a fɛrɛma-siyi wo gbɛni ma ani tɛlɛ-denkɛ wo rayigini ma kibon-kibon, wo ni a taran, a gbolo-kurɛ ara na, saraka-masɔlɛ si a lata a dan na kan tinɛ do tele wɔrɔnfila kɔrɔ.

²⁷Tele wɔrɔnfilɛ wo wa tenbi, saraka-masɔlɛ si a mafɛlɛn tun. Ni a ya a yen, a fafara a ma tun, a ara ma fɛrɛma-kiraya-yogomɛ la tun, saraka-masɔlɛ si a fɔ worɔ ko a ma sɛninya.

²⁸Kɔnɔ tɛlɛ wo ma fafa a ma, a gbolo-kurɛ ara fɔlɔ sɛgila a gbɛ rɔ, wo ti ma fɛrɛma-kiraya-yogomɛ la. Saraka-masɔlɛ si a fɔ worɔ ko a ara sɛninya. A mamintanta kan min, wo tɛlɛ-gba-kɔrɛ le.

²⁹“Kei wo, musu wo, ni tɛlɛ sigira min kunyɛ ma hali a gbengberɛ,

³⁰saraka-masɔlɛ si wo mafɛlɛn. Tɛlɛ wo, ni a rayigini de kibon-kibon, a ni a yen a kun-sigi ara wulen, ado a ma siya a ma, fɛrɛma-kiraya-yogomɛ le wo la. Saraka-masɔlɛ si a fɔ worɔ ko wo tigi ma sɛninya.

³¹Ni saraka-masɔlɛ wo ya a yen ko ala tɛlɛ-dɛ rayigini ma kɔnɔ a kun-sigi wo ma kin, a si a lamara a dan na kan tinɛ do tele wɔrɔnfila.

³²A tele wɔrɔnfila nyɔgɛ wo ma, saraka-masɔlɛ si a mafɛlɛn tun. Ni a ya a yen, ala tɛlɛ fafani ma a ma, a kun-sigi kin, tɛlɛ-dɛ rasinni ma,

³³mɔgɛ wo si a kunyɛ gbana, fɔ tɛlɛ ye kan min. Saraka-masɔlɛ si a lata a gbɛ rɔ ha a nyɔgɔn tele wɔrɔnfila tun.

³⁴A tele tan-ni-nani nyɔgɛ ma, saraka-masɔlɛ si tɛlɛ wo mafɛlɛn tun. Ni a ya a yen, tɛlɛ wo rasinni ma ado a ma fafa a ma, saraka-masɔlɛ si a fɔ worɔ ko a sɛninyanɛ le. Mɔgɛ wo si ala kurɛnu ku. A si sɛninya worɔ iko tɔn ya a fɔ nya min.

³⁵Hali saraka-masɔlɛ ya a fɔ ko a sɛninyanɛ de kɔnɔ ni ala tɛlɛ wo sɛgira tun, a ni ma yɔgɔdɔlɔ,

³⁶saraka-masɔlɛ si a mafɛlɛn tun. Ni a ya a yen, a ara fafa a ma, tamayi mumɛ sa worɔ, a sɛninyani ma. Hali a ma a kun-sigi mafɛlɛn tun.

³⁷Ni saraka-masɔlɛ ya tɛlɛtoe wo mafɛlɛn, a ni a yen, tɛlɛ wo fafani ma a ma, a ni a yen, a buyɛ anubɛ a kun-sigi-kurɛ ara bɔ min kin, a si a lɔn wo rɔ ko tɛlɛ wo ara kɛndɛya. Saraka-masɔlɛ si a fɔ worɔ ko a sɛninyanɛ le iko tɔn ya a fɔ nya min.

³⁸“Kei wo, musu wo, ni kakɛ-gbɛ lamuninyɛ bɔra mɔgɛ do fɛrɛ ma, fɔ saraka-masɔlɛ ni mɔgɛ wo mafɛlɛn a kilɛ fɛ kɔnɔ a ni a taran, a fɛrɛ nunkuni ma pinapina, fan min bi mɔgɔ fɛrɛ ma, wo mafɛlɛn ma kin de dɔrɔn. Mɔgɛ wo sɛninyanɛ de worɔ iko tɔn ya a fɔ nya min.

³⁹

⁴⁰“Ni mele bɔra kei do kunyɛ kɔma, ni wo ma, a yarɔ, wo ti a ma kei-sɛninyabɛlɛ la.

⁴¹

⁴²Kɔnɔ ni tɛlɛ sigira kei wo kunyɛ ma, a kun-sigi sa kan min tun, ni tɛlɛ ara fɔlɔ a nɛɛ donna, fɛrɛma-kiraya-yogomɛ le wo la.

⁴³Wo kɔma, a si ta saraka-masɔlɛ wara. Ni saraka-masɔlɛ wo ya a mafɛlɛn a kilɛ fɛ, a ni a lɔn ko tonyɛ le, nɛɛ ye a rɔ,

⁴⁴a si a fɔ wo rɔ ko tɛlɛtoe wo sɛninyani ma.

⁴⁵“Ni saraka-masɔlɛ banta a latɛgɛla mɔgɔ-wo-mɔgɔ ma ko a ma sɛninya, kirayatoe wo si duruku-rafaranɛ don a kan na, a kana a kunyɛ rabɔ. A tenbi tala mɔgɛnu tɛma, a si kura-kundi-fugbɛ do bi ka a burun a sunyɛ anubɛ a dɛ la. A tenbi tala, a si a fɔ ko, ‘Sɛninyabɛlɛ ye nala kɔɔ, sɛninyabɛlɛ ye nala kɔɔ.’

⁴⁶Fananta kiraya su kɛ ye mɔgɛ wo ma, anu si a labɔ dagɛ kɔma. A kana to a ta-nyɔgɛnu kurun tɔ.

⁴⁷“Ni mɔgɛ dola duruki findikira, ni a mara kura-wo-kura la min bi findikila, ni a mara kasa-kurɛ la wo, ni a mara gbama-kurɛ la wo, ni a mara gbolo-duruki la wo,

⁴⁸

⁴⁹ni findiki wo pɔrɔkɔsɛ le kurɛ ma, ka, ni a wulennɛ le, fɔ a tigi ni ta a yira saraka-masɔlɛ la.

⁵⁰Saraka-masɔlɛ si duruku-findikinɛ wo mafɛlɛn ka a sa a dan na kan tinɛ do ha lɔgɔkun kelen.

⁵¹A tele wɔrɔnfila nyɔgɛ, saraka-masɔlɛ si a mafɛlɛn tun. Ni findiki ara basan kurɛ la, a si a fɔ worɔ ko kurɛ wo sɛninyani ma.

⁵²Saraka-masɔlɛ si kurɛ wo mintan gburr! Ni i ya a yen, a ye kurɛ wo mintanna, alako findiki kɛ sufa kana nyɛnsɛn anuna kurɛnu ma, fɔ ka findiki kɛ halaki tɛ la.

⁵³“Kɔnɔ ni saraka-masɔlɛ ya a mafɛlɛn, a ni a yen ko duruki wo findikini-siyaman sa a rɔ tun,

⁵⁴a si a fɔ worɔ ko, ‘Wo ni a ku.’

⁵⁵Ni a ya a yen worɔ, findiki wo ara a boloka feufeu, wo kɔma, a si kurɛ wo ku tun. Kurɛ wo si sɛninya iko tɔn ya a fɔ nya min. Kɔnɔ anu ya kuyi min kɛ, ni a ya a yen, findiki wo ma a boloka, a si kurɛ wo sa kan tinɛ do rɔ ha tele wɔrɔnfila kɔrɔ. Wati wo wa ban, a si a mafɛlɛn tun. Ni a ya a yen, a findikinɛ ma siyaya a rɔ, ado a findikinɛ wo su ma yɛlɛma, hali wo, a ma sɛninya. Hali findiki wo ye kurɛ a ya-bɛrɛ ma, ni wo ma, a ya-yoge le ma, fɔ ka kurɛ wo mintan gburr! Ni a ya a yen, a findikini-su wo ara yɛlɛma, a ni ma iko a ye gbɛla, a si a kan-tina-findikinɛ wo fara a kɛndɛ la. Wo kɔma, do farata min na, ni wo findikira tun, a tigi si a toe wo mintan gburr, bawo findikiyi wo ara siyaya kurɛ ma tun.

⁵⁶

⁵⁷

⁵⁸

⁵⁹“Min bɛɛsi fɔnɛ kɛ la ka a tɛgɛ findiki-koe ma mala kurɛnuna ko la, wonu tɔn le kɛnu na.”