Read Kuranko Saraka-Masɔlɛnuta Tɔnnu 15 Bible Online

Saraka-Masɔlɛnuta Tɔnnu 15 - Kuranko bible

Saraka-Masɔlɛnuta Tɔnnu 15

¹Mari ya tɔn kɛnu di Musa anubɛ Aruna ma

²Isirɛla mɔgɛnuna ko la. Mari ko, “Ni kei dola kirayɛ bɔra a yatelenmɛ ma, kiraya-yi wo sɛninyani ma iko tɔn ya a fɔ nya min.

³Ni a tora bɔla le tuma-wo-tuma, ka, ni a latogonta le, kirayatoe wo ma sɛninya.

⁴“Ni kirayatoe kɛ ya a sigi fenfen tɔ, ka, ni a ya a sa fenfen min tɔ, fan wo sɛninyani ma.

⁵Ni mɔgɔ-wo-mɔgɔ ya a sigi kirayatoe wola sofa wo rɔ, hali ka a sosa a la, a si ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ le Mari yala ha wurɛ la.

⁷Ni mɔgɛ do ya a tugu kirayatoe wo la, wo tigi sɛninyani ma. Mɔgɛ min tugura kirayatoe wo la, a si ala kurɛ anubɛ a fɛrɛ-bɔnkɛ ku. Hali wo, a sɛninyabɛlɛ si to ha wurɛ la.

⁸“Ni kirayatoe wo da-yi kera mɔgɔ-sɛninyanɛ do ma, fɔ mɔgɛ wo ni ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ si to ha wurɛ la.

⁹Ni kirayatoe sigira fenfen tɔ hali min bi buri-kɛ-fannu kɔ tɛma, a sigira fan wo min kuma, wo sɛninyani ma.

¹⁰Ni mɔgɔ-wo-mɔgɔ tugura fan wo la gbɛ, ni wo ma, ka a bi, wo tigi sɛninyani ma fanan. Fɔ ni a ya ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ si to ha wurɛ la.

¹¹Ni a taranta, kirayatoe wo ya a bolo lakubɛlɛ tugu mɔgɔ-sɛninyanɛ do la, wo fanan sɛninyani ma. Fɔ ni a ya ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ si to ha wurɛ la.

¹²Ni kirayatoe ya a bole tugu bɔnku-dagɛ min na, wo si wo ratii. Ni a ya a bole tugu miran do la min nadannɛ kɔlɔma la, fɔ anu ni miran wo raku.

¹³“Ni kirayatoe kɛ ya a yen ko a ara kɛndɛya, a si a makɔni ha tele wɔrɔ ni tenbi. A tele wɔrɔnfila nyɔgɛ wo ma, a si ala kurɛnu anubɛ a fɛrɛ-bɔnkɛ ku tenke-yi la. A si sɛninya wo nya le.

¹⁴A tele segin nyɔgɛ ma, a si purulen fila bi, ni wo ma, kangbo fila. A si koni filɛ wo don saraka-masɔlɛ bolo Marita Fani-Bɔn tenbi-bolɔn dafɛ.

¹⁵Saraka-masɔlɛ si kelan ma hakɛ-sarakɛ la. A si kelan doi wo ma saraka-mintantɛ la. Saraka filɛ kɛnu si ma kirayato-kɔrɛ wo hakɛ-yamatogon-fan la.

¹⁶“Ni kei do keiya-yi bɔra a yatelenmɛ rɔ, a si a fɛrɛ-bɔnkɛ mumɛ bɛɛsi ku. A sɛninyani ma ha wurɛ la.

¹⁷Ni keiya-yi kɛra ala kurɛ ma, a mara gbolo-kolonɛ la wo, a mara kasa-kurɛ la wo, wonu ma sɛninya. Fɔ a ni a ku kɔnɔ hali wo, wonu sɛninyabɛlɛ si to ha wurɛ la.

¹⁸“Ni kei anubɛ ala musi ya anu sa, anu ni forɔn gbesi, anu mɔgɔ filɛ si anu ku worɔ. Anu sɛninyabɛlɛ le Mari yala ha wurɛ la.

²⁴Ni kei do ya a tui ka a sa ala musi fɛ min bara ala karɛ yen, kei wo fanan sɛninyani ma tele wɔrɔnfila kɔrɔ. A ya a sa a fɛ sofa min tɔ, wo fanan sɛninyani ma. “Ni musi do ya ala karɛ yen, a sɛninyabɛlɛ le Mari yala ha tele wɔrɔnfila kɔrɔ. Ni mɔgɛ do ya a bole tugu musi wo la wati wo rɔ, mɔgɛ wo fanan sɛninyabɛlɛ si to ha wurɛ la. Ni musi ya a sigi fenfen kuma wati wo rɔ, ka, ni a ya a sa fan min tɔ, wonu sɛninyani ma. Ni mɔgɛ min nara a bole tugu fan wo la a ya a sigi min kuma, ka, ni a ya a sa fan min kuma, mɔgɛ wo fanan sɛninyani ma. Fɔ a ni ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ si to ha wurɛ la.[12]

²⁵“Ni musi tora ala wati yenna tuma-wo-tuma, fananta a ye a yenna, a sɛninyani ma worɔ.

²⁶Ni a ya a sa sofa min tɔ, sofa wo sɛninyani ma. Ni a ya a sigi waganɛ min kuma, wo fanan sɛninyani ma wo wati kɔrɔ.

²⁷Ni mɔgɛ ya a tugu sofa wo la anubɛ waganɛ wo la, mɔgɛ wo sɛninyani ma, fɔ a ni ala kurɛ anubɛ a fɛrɛ-bɔnkɛ ku. Hali a wa ban wo mala, a sɛninyabɛlɛ le Mari yala ha wurɛ la.

²⁸A ye ala wati min yenna, ni wo ratora tumɛ min, a si a makɔni ha tele wɔrɔnfila kɔrɔ, a si sɛninya worɔ.

²⁹A tele segin nyɔgɛ ma, a si purulen fila bi, ni wo ma, kangbo fila. A si koni filɛ wo don saraka-masɔlɛ bolo Marita Fani-Bɔn tenbi-bolɔn dafɛ.

³⁰Saraka-masɔlɛ si kelan ma hakɛ-sarakɛ la. A si kelan doi wo ma saraka-mintantɛ la. Saraka filɛ kɛnu si ma kirayato-kɔrɛ hakɛ-yamatogon-fan la.”

³¹Mari ya kɛ le fɔ Musa ye ko a ni Isirɛla mɔgɛnu makawandi ka a gbɛlɛya gben mɔgɛnuta sɛninyabɛlitayɛla ko la. Mari ko ni min ya ata tɔn kɛnu tinya, wo ara bila a la anubɛ ata Fani-Bɔn min bi dagɛ tɛma. Ni min bilara a la yati, wo si faga serr!

³²Wo tɔn le kɛnu na keinu kuma ka a tɛgɛ kirayɛ bɔ-koe ma a yatelenmɛ rɔ anubɛ a keiya-yi bɔ-koe.

³³Tɔn kɛnu tɛgɛnɛ musinuta wati yen-koe ma anubɛ kei minnu bi anu sala anuna musinu fɛ wo tumɛ anuna musinu bi anuna wati rɔ.