Read Kuranko Saraka-Masɔlɛnuta Tɔnnu 24 Bible Online

Saraka-Masɔlɛnuta Tɔnnu 24 - Kuranko bible

Saraka-Masɔlɛnuta Tɔnnu 24

¹Mari ya a fɔ Musa ye ko,

²“I ni Isirɛla mɔgɛnu nabila tɔn kɛnu na. A fɔ anu ye ko anu ni na ɔlifi-tulu-hakikɛ la min bi kɛla ta-bara-gbagalamɛ rɔ min bi ndeta Fani-Bɔn la. Su-wo-su, fɔ tɛ ni taran a rɔ.

³Fɔ Aruna ni ta lɛnpu wo lamalan tinɛ wura-wo-wura. Anu ni ki malanna ha banda ni ka. A si malan kan-tina-sɛnimɛ rɔ yorolan dunnɛ wo ya-telenma bonda-dɛ wara la. Yorolan dunnɛ wo le sansannɛ tɔn-kenkirɛ ya ma.

⁴Aruna si lɛnpu wonu mafɛlɛn min bi lɛnpu sigi tinɛ. A si a ma, lɛnpu wonu si to malanna su-wo-su.

⁵ “Wo ni dɛgɛ-munku-hakikɛ pani-kunbɛ-nya fila bi ka wo ladan biredi-lɔngbɔn tan-ni-fila la.

⁶Wo ni biredi wo ladɛn sigi tina fila la wɔrɔ-wɔrɔnyɛ ma sɛnɛ-tebulu kuma min bi nta Fani-Bɔn la.

⁷Wo si isɛnti fanan sigi biredi-ladɛnnɛ wonu tɔnkɔn rɔ. Sulen-Tele wo Sulen-Tele, wo si biredi kɛnu kunka isɛnti kɛ la nde, Mari ye ka isɛnti mintan tɛ rɔ. A si ma worɔ iko wo ara biredi kɛnu denu mintan nde, Mari ye.

⁸Ado Sulen-Tele wo Sulen-Tele fanani, wo si biredi kɛnu nyɔgɛ sɛgi biredi-gbɛrɛkɛ la. Wo si to kɛ le mala Isirɛla mɔgɛnu ye ha tumɛ min di nde, Mari ye.

⁹ Kɔnɔ biredi kɛnu, Aruna anubɛ ala denbayɛnu denutan kɛ la yɛ! Anu si to a dɔnna kan-tina-sɛnimɛ rɔ bawo saraka-masɔlɛnuta dɔnta-sɛnimɛ le min bɔra nde, Marila saraka-sɛnimɛnu tɔ.”

¹⁰Isirɛla musi do ye nyɔ nun min tɔgɛ Sɛlomiti. A fa tɔgɛ le Dibiri min bɔra Dan bɔnsɔn rɔ. Sɛlomiti wo ya den-kei do sɔrɔn Iyipiti kei do ma. Anuna den-keminɛ wonubɛ Isirɛla kei do sɔnkɔ-sɔnkɔra. Anu bi sɔnkɛ kɛ kun na, kei wo min sɔrɔnta Iyipiti kei ma, wo ya Alla tɔgɔ lafɛya dankali-kɛ-tinɛ. Mɔgɛnu ya anu nadɛn ka a bira ka ta a la Musa warɛ.

¹²Anu ya a makandan nyɔ ka a makɔni Mari si na min fɔ Musa ye kei wola ko la.

¹³Mari ya a fɔ Musa ye ko,

¹⁴“Wo ni kei wo bi ka ta a la dagɛ kɔma. Mɔgɛ min bɛɛsi ya kei kɛ dankali-kɛ-kuli lamɔɛn n tɔgɔ rɔ, wo damasi ni a bole sa kei kɛ kunyɛ kuma ka hakɛ latuntun ale kuma ka a yira a la ko a yilikinɛ. Wo kɔma gbɛ, Isirɛla mɔgɛ bɛɛsi ni a mabon kuri la ka a faga.

¹⁵A fɔ Isirɛla mɔgɛnu ye tun ko ni mɔgɔ-wo-mɔgɔ si dankalɛ kɛ n tɔgɔ rɔ, wo tigi fanan bi tɔrɔyɛ sɔrɔnna ka le.

¹⁶Wota hakɛ dunɛ si ma sayɛ la a bolo. Mɔgɔ-wo-mɔgɔ min siginɛ Isirɛla nyamanɛ rɔ, ni wo ya dankalɛ kɛ nde, Mari tɔgɔ rɔ fufafu, Isirɛla mɔgɔ damasi si wo mabon kuri la.

¹⁷ “Min sanɛ wo kuma fanani, ni min ya mɔgɔ faga, wo ni wo fanan faga.

¹⁸Ni min ya a ta-nyɔgɛla kolo-fan faga, a ni a nyɔgɔ lasɛgi. Kɛ si ma wo kɛ-nya la gbɛ, niyi si sara niyi la.

¹⁹“Ni min ya a ta-nyɔgɛ kan-tinɛ do magba, anu si wo tayili sara a la ka ale fanan magba.

²⁰ Ni min ya a ta-nyɔgɛ kole rakeri, anu si ale fanan kole keri. Ni min ya a ta-nyɔgɛ yɛ tii, anu si wo fanan tayili sara ka ale fanan yɛ tii. Ni min ya a ta-nyɔgɛ nyin do keri, anu si wo fanan tayili sara a la ka atɛ keri. Ni min ya a ta-nyɔgɛ tanban nya min, wo ni ale fanan tanban wo nya na le.

²¹Ni min ya a ta-nyɔgɛla kolo-fan faga, a ni a nyɔgɔ lasɛgi kolo-fan la. Ni min ya a lawuli a ma ka a ta-nyɔgɛ hadama-dan faga, wo ni ale fanan faga.

²² Tɔn kɛ siginɛ Isirɛla mɔgɛnu kuma anubɛ sundannu bawo nde le wota Mari Alla la min ya kɛ fɔ.”

²³Mari ban kɛnu fɔla Musa ye, a ya kuman-kan kɛnu natenbi mɔgɛnu ma. A ban, anu ya a ma iko Mari ya a fɔ Musa ye nya min. Anu ya Selemetila den-keminɛ wo bi ka bɔ a la dagɛ kɔma ka a mabon kuri la ha a fagara.