Read Kuranko Saraka-Masɔlɛnuta Tɔnnu 4 Bible Online

Saraka-Masɔlɛnuta Tɔnnu 4 - Kuranko bible

Saraka-Masɔlɛnuta Tɔnnu 4

¹Mɔgɔ Ti Hakɛ minnu Nawuli a Ma, Wonu Sarakɛnu-Bɔ-Nya Mari ya a fɔ Musa ye ko, “N kuman-kan kɛ latenbi Isirɛla mɔgɛnu ma.” Musa ya a fɔ anu ye ko, “Ni mɔgɔ-wo-mɔgɔ ya hakɛ kɛ kɔnɔ a ma a lawuli a ma, wo tɔn le kɛnu na a si minnu bira. (1) Saraka-Masɔlɛ-Kun-Tigita Hakɛ-Saraka-Bɔ-Nya

³“Ni Saraka-Masɔla-Kun-Tigi ya hakɛ kɛ, Isirɛla mɔgɛ bɛɛ si wo yilikiyi sɔrɔn a fɛ. A si na tura-bulun kelen na, fɛɛ sa min na ka wo ma sarakɛ la Mari ye ata hakɛla ko la.

⁴A si na a la Marita Fani-Bɔn tenbi-bolɔn dafɛ ka a bole sa turɛ wo kunyɛ kuma ka a kan natɛgɛ nyɔ.

⁵Wo kɔma, Saraka-Masɔla-Kun-Tigi wo si tura-bulan wo yele do bi ka ta a la Marita Fani-Bɔn burɔ.

⁶Wo kɔma, a si a bolo-nɔlɔnɛ layigi yele wo rɔ ka a pusen iko wɔrɔnfila yorolan wara la min dunnɛ Kan-Tina-Sɛnimɛ anubɛ Sɛnima-Sɛnima-Tinɛ tɛma.

⁷A si tura-bulun-yele wo do sosa isɛnti mintan tinɛ, a bolon nanɛ wo kuma Marita Fani-Bɔn burɔ. A si a yele-toe rawuya dugi ma saraka-mintan-tinɛ kɔrɔ Marita Fani-Bɔn tenbi-bolɔn dafɛ.

⁸A si a burɔ-kɛɛnnu bi anubɛ a kɔ-kili filɛ ka wonu sa a benya-bɛrɛ kuma.

¹⁰Saraka-masɔlɛ si tura-bulan wo kɛɛn bi ka a sa tɛ rɔ saraka-mintan-tinɛ kuma iko a si a ma yisi-kima-sarakɛ la nya min.

¹¹Saraka-masɔlɛ wo si turɛ wo soge toe bi, a gbole wo, a kunyɛ wo, a gbɛlannu wo, a nugi anubɛ a burɔ-fan toenu. A si ta wonu na a bolo kan-tina-sɛnimɛ rɔ dagɛ kɔma, anu si ta saraka mintannɛnu ta-gbangban rawuya kan min. A si wonu mintan tɛ rɔ nyɔ gburr! (2) Isirɛla Mɔgɛ Bɛɛta Hakɛ Saraka Bɔ Nya

¹³“Ni Isirɛla mɔgɛ bɛɛsi lakofunɛ ya Marita tɔn do tinya anu ma min lɔn, anu bi anuna hakɛ-sarakɛ bɔla ka le.

¹⁴Ni anu ya a lɔn tumɛ min ko anu bara hakɛ kɛ, anu si na tura-bulun kelen na ka wo ma anu hakɛ-sarakɛ la. Anu si na a la Marita Fani-Bɔn tenbi-bolɔn dafɛ.

¹⁵Kun-tiginu si anu bole sa a kunyɛ kuma ka a faga nyɔ.

¹⁶Saraka-masɔlɛ si tura-bulan wo yele do bi ka ta a la Marita Fani-Bɔn burɔ. Wo kɔma, a ni a bolo-nɔlɔnɛ layigi a yele wo rɔ ka a pusen iko wɔrɔnfila yorolan wara la min dunnɛ Kan-Tina-Sɛnimɛ anubɛ Sɛnima-Sɛnima-Tinɛ tɛma.

¹⁸A si a yele do sosa isɛnti mintan tinɛ bolon nanɛ wo kuma Marita Fani-Bɔn burɔ. A si a yele-toe rawuya dugi ma saraka-mintan-tinɛ kɔrɔ Marita Fani-Bɔn tenbi-bolɔn dafɛ.

¹⁹A si tura-bulan wo kɛɛn mumɛ bi ka a mintan saraka-mintan-tinɛ kuma.

²⁰A si turɛ kɛ fanan ma iko komi a ya a nyɛrɛta hakɛ-sarakɛ ma nya min. A si sarakɛ bɔ mɔgɛnuna ko la alako wo ni mɔgɛnu hakɛ yamatogon ka makotolɛ sɔrɔn.

²¹A si a sogo mumɛ bɛɛsi bi ka ta a la dagɛ kɔma iko komi a ya turɛ wo mintan a nyɛrɛla hakɛla ko la nya min. Hakɛ-sarakɛ le kɛ la Isirɛla mɔgɛ bɛɛsi hakɛla ko la. (3) Kun-Tiginuta Hakɛ-Sarakɛ, Wo Bɔ-Nya

²²“Ni kun-tigi do ya Marita tɔn tinya a ma min lɔn, a si ata hakɛ-sarakɛ bɔ ka le.

²³Ni a ya a lɔn tun ko a ya hakɛ kɛ, a ni na baa-kɔrɔn la a bolo.

²⁴A ni a faga saraka-mintan-tinɛ bolo-maran wara la, anu si sogo-saraka-mintantɛnu faga kan min. Wo sarakɛ le kɛ la min si anu hakɛnu bɔ anu ma.

²⁵Saraka-masɔlɛ si a bolo-nɔlɔnɛ layigi baa-yele wo rɔ ka do sosa isɛnti mintan tinɛ bolon nanɛ wo kuma ka a toe rawuya dugi ma saraka-mintan-tinɛ kɔrɔ.

²⁶A si a kɛɛn bi ka a mintan saraka-mintan-tinɛ kuma iko komi a ya a ma yisi-kima-sarakɛ la nya min. Kun-tiginuta hakɛ-sarakɛ bɔ nya le kɛ la saraka-masɔlɛ bolo. Sarakɛ kɛ si a hakɛ yamatogon. Mari si a makoto worɔ. (4) Isirɛla Mɔgɔ-Toe Do Saraka-Bɔ-Nya

²⁷ “Ni Isirɛla mɔgɛ toe do ya Marita tɔn tinya a ma min lɔn, a si ata hakɛ-sarakɛ bɔ ka le.

²⁸Ni a ya a lɔn tun ko a ya hakɛ kɛ, a ni na baa-musumɛ la a bolo, fɛɛ sa min na, ni wo ma, saga-yɛrɛ.

²⁹A si a bole sa a kunyɛ kuma ka a faga saraka-mintan-tinɛ bolo-maran wara la anu si saraka-mintantɛnu faga kan min.

³⁰Saraka-masɔlɛ si a bolo-nɔlɔnɛ layigi baa-yele wo rɔ ka do sosa isɛnti mintan tinɛ bolon nanɛ wo kuma ka a toe rawuya dugi ma saraka-mintan-tinɛ kɔrɔ.

³¹A si a kɛɛn mumɛ bɛɛ bi iko anu ya yisi-kima-sarakɛ bɔ nya min. A si a mintan saraka-mintan-tinɛ kuma gburr! Wo le si a ma, a sumɛ si diya Mari ye. Isirɛla mɔgɛ toenu saraka-bɔ-nya le kɛ la saraka-masɔlɛ bolo. Sarakɛ kɛ si a hakɛ yamatogon. Mari si a makoto worɔ.

³²“Ni a nara saga-sarakɛ le la a bolo, a ni ma saga-yɛrɛ la, fɛɛ sa min na.

³³A si a bole sa a kunyɛ kuma ka a faga saraka-mintan-tinɛ bolo-maran wara la, anu si saraka-mintantɛnu faga kan min.

³⁴Saraka-masɔlɛ si a bolo-nɔlɔnɛ layigi saga-yele wo rɔ ka do sosa isɛnti mintan tinɛ bolon nanɛ wo kuma ka a toe rawuya dugi ma saraka-mintan-tinɛ kɔrɔ.

³⁵A si a kɛɛn mumɛ bɛɛ bi iko anu ya yisi-kima-sarakɛ bɔ nya min. A si a mintan saraka-mintan-tinɛ kuma gburr! Wo le si a ma, a sumɛ si diya Mari ye. Isirɛla mɔgɛ toenuna saraka-bɔ-nya le kɛ la saraka-masɔlɛ bolo. Sarakɛ kɛ si a hakɛ yamatogon. Mari si a makoto worɔ.