Read Kuranko Saraka-Masɔlɛnuta Tɔnnu 7 Bible Online

Saraka-Masɔlɛnuta Tɔnnu 7 - Kuranko bible

Saraka-Masɔlɛnuta Tɔnnu 7

¹(5) Yiliki-Sarakɛnu Musa ya Mari kuman-kan kɛ latenbi Aruna anubɛ a kegeyɛnu ye ko, “Yiliki-sarakɛ[3] si bɔ nya min, wo tɔn le kɛnu na.

²Saraka-sɛnima-bɛrɛ le kɛ la. Wo si sarakɛ kɛ faga saraka-mintan-tinɛ bolo-maran wara la, anu si saraka-mintantɛnu faga kan min. Wo si a yele bi ka a lakɛ saraka-mintan-tinɛ tɔnkɔn nanɛ ma.

³Wo si a kɛɛn mumɛ bi ka a sa tɛ rɔ saraka-mintan-tinɛ kuma. Wo si a kɔɛ anubɛ a kɛɛn bi anubɛ a burɔ-kɛɛnnu anubɛ

⁴a kɔ-kili filɛ anubɛ a benya-bɛrɛ.

⁵Saraka-masɔlɛ si a kɛɛn wonu damasi mintan Mari ye. Kɛnu si ma yiliki-sarakɛ la.

⁶Saraka-masɔlɛnu kebila-mɔgɔ-keimɛnu de dɔrɔn si kɛ dɔn. Kɔnɔ anu si a dɔn kan-tina-sɛnimɛ rɔ bawo saraka-sɛnima-bɛrɛ le.

⁷“Tɔn kelen bi nyɔ min kofunɛ hakɛ-sarakɛ kɛnu ma anubɛ yiliki-sarakɛnu. Wo le ko saraka-soge, saraka-masɔlɛ wo nyɛrɛtɛ le wo la.

⁸Saraka-sogo-mintantɛ wo gbole, saraka-masɔlɛ wo nyɛrɛtɛ le wo la.

⁹Wo si dɛgɛ-toe minnu nadan biredi mintan tinɛ wo, anubɛ wo si minnu mintan dagɛ rɔ wo, anubɛ wo si min yilan pani-tasangbɛ rɔ wo, wonu si ma saraka-masɔlɛ wo nyɛrɛtɛ la.

¹⁰Dɛgɛ-munke-mintanbɛlɛ, ni a yabasannɛ tuli la, ka, ni a yabasanni ma tuli la, wo dama si to Aruna kebila-mɔgɛnu ye. Anu si a tala anu nyɔgɔn tɛma ka a rakɛnya. (6) Yisi-Kimɛ-Sarakɛnu

¹¹“Yisi-kima-sarakɛnu si bɔ nya min, wo tɔn le kɛnu na.

¹²Ni mɔgɛ do ye saraka sufa kɛnu bɔla, a si baraka bira Mari ye wonu fɛ. Mɔgɔ tenbi kolo-fan bɔla ka a di Mari ma, a si biredi do sa wo kuma isiti sa min tɔ. Ni a diyara a ye, a si biredi-dɔgɔmɛ mintan ka tuli sosa a kumɛ ma. Ka, ni a diyara a ye fanan, a si a ma biredi-kinamɛ la min yabasannɛ tuli la, ni wo ma, a si keki ladan min yabasannɛ tuli la.

¹³A si kɛ do kelen bi ka a ma sarakɛ la Mari ye anubɛ biredi-lɔngbɔn isiti kɛnɛ min tɔ. Wonu si to saraka-masɔlɛ ye min si saraka-yele bi ka a lawuya saraka-mintan-tinɛ kɔrɔ.

¹⁵Saraka-soge min bi tola, anu si wo dɔn tele wo nyɛrɛ rɔ. Wo fenfen kana sigi ha sɔgɔma.

¹⁶“Ni kei do nara yisi-kima-sarakɛ la Mari ye bawo a sewanɛ, ka, ni a ye nala a la bawo a ara a dakan bɔ, ni saraka-masɔlɛ ya sarakɛ wo faga, anu si a soge dɔn. Ni anu ma ke a banna tele wo rɔ, anu si a toe lamara ha wo banda-ke sɔgɔma.

¹⁷Ni soge do tora anu bolo ha a tele sawa nyɔgɛ, fɔ ni anu ya wo mintan worɔ.

¹⁸Ni anu ya a soge wo do dɔn a tele sawa nyɔgɛ, Alla ti sɔn kei wota sarakɛ la worɔ tun. Saraka-bɔlɛ ti tɔnɔ mumɛ sɔrɔn wo rɔ tun, ado sarakɛ wo sɛninyani ma tun iko tɔn ya a fɔ nya min. Ni mɔgɔ-wo-mɔgɔ ya a dɔn, wo tigi si a hakɛ sɔrɔn.

¹⁹“Saraka wo saraka, ni a tugura fan do la min sɛninyani ma iko tɔn ya a fɔ nya min, mɔgɔ-wo-mɔgɔ kana a dɔn. Fɔ ni anu ya a mintan gbɛ! Mɔgɔ-wo-mɔgɔ min sɛninyanɛ, wo si yisi-kima-saraka-soge dɔn de!

²⁰Kɔnɔ ni mɔgɛ min sɛninyani ma, wo ni ta saraka-soge bila a dɛ rɔ, mɔgɔ kana a miri a ma ko Allata mɔgɛ le wo la tun.

²¹Ni mɔgɛ do ya a bole tugu fenfen-sɛninyabɛlɛ la, a mara mɔgɔ la wo, a mara sogo la wo, ni wo nara yisi-kima-sarakɛ kɛ do dɔn, mɔgɔ kana a miri wo ma ko Allata mɔgɛ le wo la tun.”

²²Mari ya tɔn do di Musa ma Isirɛla mɔgɛnuna ko la. Musa ya Mari kuman-kan wo latenbi Isirɛla mɔgɛnu ma ko, “A ninki wo, a sagɛ wo, a baa wo, wo kana wonu kɛɛn dɔn mumɛ!

²⁴Kolo-fan min bɛnta ka ma sarakɛ la Mari ye, mɔgɔ tenbi wo kɛɛn dɔnna tumɛ min, mɔgɔ kana a miri a ma ko Allata mɔgɛ le wo la tun. Ni kolo-fen wo kolo-fen fagara a nyɛrɛ ma, ka, ni sogo-feremɛ do ni kolo-fan wo do faga, wo kana a kɛɛn dɔn kɔnɔ wo si a bi le ka a ma wo mako-dogbɛrɛ la.

²⁶ Tɔn le kɛ la Isirɛla mɔgɛnu ye, anu tara kan-bo-kan. Anu kana sogo-yele fenfen dɔn, a mara kona-yele la wo, a mara kolo-fen-yele la wo. Ni mɔgɔ-wo-mɔgɔ ya wo dɔn, mɔgɔ kana a miri a ma ko Allatɛ le wo mɔgɛ la tun.” (7) Saraka-Latankanɛ Sɔrɔn-Koe

²⁸Musa ya Mari kuman-kan kɛ latenbi Isirɛla mɔgɛnu ma ko, “Ni a sɔgɛ ye mɔgɛ min na ka na yisi-kima-sarakɛ la,

³⁰fɔ ale nyɛrɛ-nyɛrɛ ni na saraka-latankanɛ la Mari ye. Mɔgɛ wo si sarakɛ wo kɛɛnnu anubɛ a sisi bi ka wonu di Mari ma.

³¹Saraka-masɔlɛ wo si a kɛɛn wonu mintan kɔnɔ a sisi wo si to saraka-masɔlɛnu ye.

³²A bolo-nyimama-wore si ma saraka-masɔlɛ wo niyi la.

³⁴A wore wo, a sisi wo, Mari ya kɛnu filɛ di saraka-masɔlɛnu ma ka bɔ Isirɛla mɔgɛnu bolo. Ni Isirɛla mɔgɛnu bi nala yisi-kima-sarakɛ kɛ la tumɛ min, anu si to fen filɛ kɛnu dila saraka-masɔlɛnu ma ha tumɛ min di Alla ye.”

³⁵“A mara Aruna anubɛ ala den-keminɛnu na wo nya na le wo tumɛ anu bi anu dantɛgɛla Mari ma ka saraka-masɔ-wɔlɛ kɛ.

³⁶Wo tele nyɛrɛ rɔ, Mari ya sarakɛ kan tinɛ kɛnu ma anu nyɛrɛtɛ la. Tɔn le kɛ la Isirɛla mɔgɛnu ye ka a fɔlɔ anu denu ma ha ka a sigi anu kegeyɛnu na. (8) Kuma-Laban Saraka-Bɔ-Nyala Ko La

³⁷“Ma ya sarakɛ minnu damasila ko fɔ, wonu tɔgɛ le kɛnu na, saraka-mintantɛnu, dɛgɛ-munku-sarakɛnu, hakɛ-sarakɛnu, yiliki-sarakɛnu, yisi-kima-sarakɛnu, anubɛ saraka-masɔlɛnu dantɛgɛ-ko-sarakɛnu.”

³⁸Wo tumɛ Musa ye Sinayi Kɔnkɛ kɔrɔ, Mari ya saraka bɔ tɔn kɛ di a ma nyɔ ka a latenbi Isirɛla mɔgɛnu ma.