Read Kuranko Saraka-Masɔlɛnuta Tɔnnu 8 Bible Online

Saraka-Masɔlɛnuta Tɔnnu 8 - Kuranko bible

Saraka-Masɔlɛnuta Tɔnnu 8

¹Mari ya a fɔ Musa ye ko,

²“Aruna anubɛ ala den-keminɛnu bi ka ta anu na nta Fani-Bɔn tenbi-bolɔn la. I ni na saraka-masɔ-kurɛnu na anubɛ tuli min si anu sɛninya nde, Mari yala. I ni na sarakɛ kɛnu na, tura-bulan min si ma hakɛ-sarakɛ la anubɛ saga-yigi fila anubɛ sende-nya kelen biredi la isiti sa min tɔ. Isirɛla mɔgɛ damasi ladɛn anu nyɔgɔn fɛ ka na wo taran nta Fani-Bɔn bolon dɛ la.”

⁴Musa ya a ma iko Mari ya a fɔ a ye nya min. Mɔgɛ damasi nara tumɛ min,

⁵Musa ya a fɔ anu ye ko, “N bi nala min mala wo yakɔrɔ kɛ la gbɛ, Mari nyɛrɛ le ya n sɔ wo la ka wo ma.”

⁶Musa ya Aruna anubɛ ala den-keminɛnu sɔ mɔgɛnu yakɔrɔ. A ya a fɔ anu ye ko anu ni anu nyɛrɛ ku iko tɔn ya a fɔ nya min.

⁷A ya duruku-kɔrɔ-don anubɛ duruku-ba-wɛ don Aruna kan na anubɛ a butɛ-kiri-fan. Wo kɔma, a ya duruku-nɛ[4] do bi min karanɛ tɛ-kiri-fan do ma.

⁸A ya kɔgɔ-dala-kurɛ bila a kan na anubɛ fen filɛ[5] min bi wo ma, anu si Alla sako lɔn min fɛ.

⁹Musa ya saraka-masɔla-kun-tigiya-fulɛ wo bi ka a don Aruna salɛ la. A ya sɛnɛ-fagbataranɛ kiri ala fulɛ yarɔ. Sɛnɛ wo si a yira mɔgɛnu na ko ale dantɛgɛnɛ Mari ma. Musa ya wo dama ma iko Mari ya a fɔ a ye nya min nun.

¹⁰Wo kɔma, Musa ya tuli bi ka fan wonu dantɛgɛ Mari ma wo la. A ya a pusen Marita Fani-Bɔn ma anubɛ miran min bɛɛsi ye a burɔ.

¹¹A ya tuli wo do bi tun ka a pusen saraka-mintan-tinɛ anubɛ a mirannu kuma iko wɔrɔnfila. Wo kɔma, a ya tuli pusen yi-sigi-miran anubɛ a sigi-fan ma iko wɔrɔnfila ka wo bɛɛsi dantɛgɛ Mari ma wo nya na le.

¹²Wo kɔma, a ya tuli kɛ Aruna salɛ rɔ ka a dantɛgɛ Mari ma.

¹³A banta wo mala tumɛ min, a ya Arunala den-keminɛnu nana ka anu sɔ mɔgɛnu yarɔ. A ya duruku-kɔrɔ-don don anu kan na ka anu butɛ kiri butɛ-kiri-fan wo la. A ya saraka-masɔlɛta-fulɛnu minimini anu salɛ ma iko Mari ya a fɔ a ye nya min nun.

¹⁴Musa nara tura-bulan wo la anu hakɛ-sarakɛla ko la. Aruna anubɛ ala den-keminɛnu ya anu bole sa a kunyɛ ma.

¹⁵Musa ya a faga ka a bolo-nɔlɔnɛ layigi a yele rɔ ka do sosa saraka-bɔ-tinɛ bolon nanɛ ma ka wo dantɛgɛ Mari ma. A ya a yele-toe bi ka a rawuya dugi ma saraka-mintan-tinɛ kɔrɔ. Wo le ya a ma, a ya saraka-bɔ-tinɛ dantɛgɛ Mari ma ka a sɛninya.

¹⁶A ya tura-bulan wo burɔ-kɛɛnnu bi anubɛ a kɔ-kili filɛ ka wonu sa a benya-bɛrɛ kuma ka wo bɛɛ sa tɛ rɔ saraka-mintan-tinɛ kuma.

¹⁷A ya a gbole anubɛ a sogenu anubɛ a nugi bi ka ta wonu na dagɛ kɔma ka anu mintan nyɔ gburr, iko Mari ya a fɔ ale Musa ye nya min nun.

¹⁸Musa banta wo mala tumɛ min, a nara a saga-yigi fɔlɔtɛ la ka a ma saraka-mintantɛ la. Aruna anubɛ ala den-keminɛnu ya anu bole sa wo kunyɛ kuma.

¹⁹Musa ya sagɛ wo faga ka a yele lakɛ saraka-mintan-tinɛ tɔnkɔn nanɛ bɛɛ ma.

²⁰A ya sagɛ wo boso ka a burɔ-fan bɛɛsi anubɛ a wore filɛ maku. A ya a kunyɛ anubɛ a kɛɛn anubɛ a soge mumɛ bɛɛsi sa tɛ rɔ iko Mari ya a fɔ a ye nya min nun. Sarakɛ kɛ sumɛ ya a diya don Mari rɔ.

²²Wo kɔma fanan, Musa nara a saga-yigi fila nyɔgɛ la ka Aruna anubɛ ala den-keminɛnu dantɛgɛ Mari ma. Aruna anubɛ ala den-keminɛnu ya anu bole sa sagɛ kɛ fanan kunyɛ kuma tun.

²³Musa ya saga-yigi wo faga ka a yele do bi ka a don Aruna bolo-nyimama-tolo-lafɛlafɛ ma anubɛ a bolo-nyimama-gbungburu-wɛ ma anubɛ a bolo-nyimama-kin-gbungburu-wɛ ma.

²⁴Wo kɔma, Musa nara Arunala den-keminɛnu na ka anu sɔ mɔgɛnu yakɔrɔ. A ya yele wo do bi tun ka a don anu bolo-nyimama-tolo-lafɛlafɛ ma anubɛ anu bolo-nyimama-gbungburu-wɛ anubɛ a bolo-nyimama-kin-gbungburu-wɛ ma. Musa ya a yele-toe lakɛ saraka-mintan-tinɛ tɔnkɔn nanɛ bɛɛ ma.

²⁵A ya a kɔɛ anubɛ a kɛɛn bi anubɛ a burɔ-kɛɛn mumɛ bɛɛsi. Wo kɔma, a ya a kɔ-kili filɛ bi anubɛ a bolo-nyimama-wore ka wonu damasi sa a benya-bɛrɛ kuma.

²⁶A ya biredi-lɔngbɔn kelen bi sende rɔ isiti sa min tɔ min dantɛgɛnɛ Mari ma. A ya biredi kelen bi fanan min tamagara tuli la anubɛ keki-dɔgɔmanɛ do. A ya wonubɛ sogo-kɛɛn sa bolo-nyimama-wore kuma

²⁷ka wonu bi ka anu sa Aruna anubɛ ala den-keminɛnu bole tɔ. Wonu fanan ya a di Mari ma.

²⁸Wo kɔma, Musa fanan ya wonu bi anu bolo tun ka anu sa tɛ rɔ saraka-mintan-tinɛ kuma ka a ma anu dantɛgɛ-sarakɛ la. Wonu sumɛ ya a diya don Mari rɔ.

²⁹Musa ya sogo wo sisi bi ka a ma Mari nyansɛ la. Musa fanan, ata niyi-sarakɛ le wo sogo-sisi wo la a ya min dantɛgɛ Mari ma. Musa ya a ma iko Mari ya a fɔ a ye nya min nun.

³⁰Musa ya tuli do bi anubɛ yele min bi saraka-mintan-tinɛ kɔrɔ ka wo pusen Aruna anubɛ ala den-keminɛnu ma anubɛ anuna saraka-masɔ-kurɛ minnu bi anu kan na. Kɛ le ya a ma, anubɛ anuna kurɛnu dantɛgɛra Mari ma.

³¹Musa ya a fɔ Aruna anubɛ ala den-keminɛnu ye ko, “Wo ni saga-yigi kɛ soge bi ka ta a la Marita Fani-Bon-dɛ la. Wo wa ban a tela nyɔ, wo si biredi wo bi min bi sende wo rɔ ka anubɛ wo dɔn anu nyɔgɔn fɛ. Tɔn le kɛ la Mari ya min fɔ.

³²Ni soge anubɛ biredi-toe minnu tora, wo si wonu mintan.

³³Wo kɔma, wo si to siginɛ Marita Fani-Bɔn tenbi-bolon-dɛ la tele wɔrɔnfila kɔrɔ. Tele wɔrɔnfilɛ wo wa ban tumɛ min, wola dantɛgɛ-koe ara kanbali worɔ Mari yala.

³⁴Ma ya min bɛɛsi ma bi, Mari le ya ma sɔ ka wonu ma alako wola hakɛnu yama ni togon.

³⁵Wo ni to siginɛ tenbi-bolon-dɛ la su-ke banda-ka ha tele wɔrɔnfilɛ da si fa. Ni wo ya wo tinya, wo si faga. Wo le kɛ la Mari ya min fɔ n ye ka a gbɛlɛya gben!”

³⁶Aruna anubɛ ala den-keminɛnu ya a ma iko Mari ya a fɔ Musa ye nya min.