Read Kuranko Saraka-Masɔlɛnuta Tɔnnu 9 Bible Online

Saraka-Masɔlɛnuta Tɔnnu 9 - Kuranko bible

Saraka-Masɔlɛnuta Tɔnnu 9

¹Saraka-masɔlɛ wonu dantɛgɛ-tele wɔrɔnfilɛ dafara tumɛ min, Musa ya Aruna anubɛ ala den-keminɛnu kele anubɛ Isirɛla mɔgɔ-ba gboda-gbodɛnu.

²Musa ya a fɔ Aruna ye ko, “Na tura-bulun kelen na i bolo, fɛɛ sa min na ka a ma hakɛ-sarakɛ la anubɛ saga-yigi, fɛɛ sa min na ka a ma saraka-mintantɛ la.

³A fɔ Isirɛla mɔgɛnu ye ko anu ni na baa-kɔrɔn kelen na ka wo ma anu hakɛ-sarakɛ la. Anu tenbi nala baa-kɔrɔn wo la anu bolo, anu ni na san-kelen-ninki-dan la anubɛ san-kelen-saga-dan la anu bolo ka wonu filɛ ma saraka-mintantɛ la.

⁴Wo kɔma, anu ni na tura kelen na anubɛ saga-yigi kelen ka wonu sa sarakɛ doi kɛnu kuma. Kɛnu filɛ fanan si ma yisi-kima-sarakɛ la. Anu ba na sarakɛ min nyɔgɔn na Mari ye, anu si na wo nyɔgɔn dɛgɛ la min tamaganɛ tuli la. Wo ni kɛnu ma bi bawo Mari si a nyɛrɛta tamasere yira wo la bi.”

⁵Anu nara kɛ damasi la Marita Fani-Bɔn bolon dɛ la iko Musa ya a fɔ anu ye nya min. Isirɛla mɔgɛ bɛɛsi nara nyɔ rɔ ka anu sɔ Mari yakɔrɔ nyɔ.

⁶Musa ya a fɔ anu ye ko, “Mari ya wo sɔ ka kɛ damasi ma alako a si ata wan-takanɛ yira wo la.”

⁷ A ya a fɔ Aruna ye tun ko, “Ta hakɛ-sarakɛ anubɛ saraka-mintantɛ bɔ saraka-mintan-tinɛ kuma. Wonu si ile anubɛ Isirɛla mɔgɛnu hakɛ yamatogon worɔ iko Mari ya a fɔ nya min nun.”

⁸Woletɔ Aruna tara ka wo tura-bulan ma a hakɛ-sarakɛ la.

⁹Ala dannu nara wo yele la. Aruna ya a bolo-nɔlɔnɛ layigi a yele wo rɔ ka do sosa saraka-mintan-tinɛ bolon nanɛ ma. A ya a yele-toe bi ka a rawuya dugi ma saraka-mintan-tinɛ kɔrɔ.

¹⁰A kɛɛn wo, a kɔ-kili wo, a benya-bɛrɛ wo, a ya wonu sa tɛ rɔ saraka-mintan-tinɛ kuma ka anu mintan. A soge wo, a gbole wo, Aruna bɔra wonu na dagɛ kɔma ka wonu filɛ mintan nyɔ gburr! Anu ya a ma iko Mari ya a fɔ Musa ye nya min.

¹²Aruna ya saga-yigi wo faga ka a ma ata saraka-mintantɛ la. Ala den-keminɛnu nara a yele la a wara. A ya wo lakɛ saraka-mintan-tinɛ tɔnkɔn nanɛ ma.

¹³Anu ya a kunyɛ anubɛ a kɛɛn-kundinɛnu di anu fa ma. Wo ya wonu fanan sa tɛ rɔ saraka-mintan-tinɛ kuma.

¹⁴Wo kɔma, Aruna nyɛrɛ ya sarakɛ burɔ-fannu maku anubɛ a woro filɛ. A ya wonu fanan bi ka anu sa tɛ rɔ saraka-mintan-tinɛ kuma doi wonu fɛ.

¹⁵Wo kɔma, Aruna ya Isirɛla mɔgɛnuna hakɛ-sarakɛ bɔ. A ya baa-kɔrɔn faga ka wo ma anu hakɛ-sarakɛ la. A ya a di Mari ma iko a ya a nyɛrɛta hakɛ-sarakɛ bɔ nya min nun.

¹⁶A ya ninki-dan anubɛ saga-dan ma saraka-mintantɛ la Isirɛla mɔgɛnuna hakɛla ko la iko anu duruta sarakɛ doinu bɔla nya min.

¹⁷A ya dɛgɛ-munku-sarakɛ bɔ ka wo dantɛgɛ Mari ma. A ya a bolo-nya kelen bi ka wo sa tɛ rɔ. (Kɛnu denu sanɛ tele-wo-tele sarakɛnu kuma.)

¹⁸ Wo kɔma, a ya turɛ anubɛ saga-yigi ma yisi-kima-sarakɛnu na mɔgɛnu ye. Ala den-keminɛnu nara wonu yele la. Ale ya wo lakɛ saraka-mintan-tinɛ tɔnkɔn nanɛ ma.

¹⁹A ya sarakɛ wonu kɛɛnnu bi anubɛ anu kɔ-kili filɛnu anubɛ anu benya-bɛrɛ ka wonu sa saraka-soge kɛ sisinu kuma ka a kɛɛnnu dɔrɔn sa tɛ rɔ saraka-mintan-tinɛ kuma.

²¹Aruna ya a bolo-nyimama-worenu anubɛ a sisinu bi ka wonu di saraka-masɔlɛnu ma. Kɔ-fan le wonu na Mari ya min di saraka-masɔlɛnu ma iko Musa ya a fɔ anu ye nya min.

²² Aruna banta sarakɛ kɛ mumɛ bɛɛsi bɔla tumɛ min, a ya a bolo filɛ rasagan mɔgɛnu kuma. A duwara anu ye. Aruna bɔra saraka masɔ tinɛ kuma ka yigi dugi ma.

²³Wo kɔma, Musa anubɛ Aruna donta Marita Fani-Bɔn burɔ. Anu bɔra nyɔ tumɛ min, anu duwara mɔgɛnu ye. Marita wan-takanɛ bɔra gbɛ rɔ mɔgɛ bɛɛsi yala.

²⁴Tiriya-tiriyɛ wo rɔ, Mari nyɛrɛ ya ta-belebele layigi ka bɔ san-kole rɔ. Tɛ wo ya a saraka-toenu mintan gburr! Mɔgɛnu ya tɛ yen tumɛ min, anu kilanta ka gbele-gbelen ka anu naburun a ma dugi ma Mari kɔrɔ.