Read Kuranko Yɛrɛmaya 1 Bible Online

Yɛrɛmaya 1 - Kuranko bible

Yɛrɛmaya 1

¹ Nde, Helikayala den Nɛbi Yɛrɛmaya, anubɛ n na-kelen-nyɔgɔ bɛrɛbɛrɛnu bi saraka-masɔlayɛ la Anatɔti soe burɔ Bɛnyamɛ nyamanɛ rɔ. Amɔnna den Yosayata san tan-ni-sawa nyɔgɛ ma mansayɛ la Yuda nyamanɛ rɔ, Mari fɔlɔta kumala nde, Nɛbi Yɛrɛmaya ye san wo le la. Yahoyakim siginɛ a fa Yosaya gbɛ rɔ mansayɛ la tumɛ min, Mari kumara n ye tun. Mansa Yosayala den-gbɛrɛkɛ Sɛdɛkaya, wo ya san tan-ni-kelen anubɛ karɛ loli le bɔ mansayɛ la Yuda nyamanɛ rɔ. Wati wo mumɛ bɛɛ kɔrɔ, Mari kumara n ye iko siyaman. Wo kɔma, kɛlɛ tara Yerusalɛm kɛnu na. Nde, Yɛrɛmayata kumɛ le kɛnu na.

⁴Mari ya a fɔ nde, Yɛrɛmaya ye ko

⁵yanni n ni ma mɔgɔni-finyɛ la n na burɔ, a ya n yabɔ. Yanni n ni sɔrɔn, a ya wɔli-gbɛrɛ dantɛgɛ n ma a dan na. A ya n ma nɛbi la sibole bɛɛ ye.

⁶N ya a fɔ wo rɔ ko, “Kɔnɔ n Tigi Mari, dennɛ le nde la. N ma kusan kumala.”

⁷Ale Mari ya a fɔ n ye ko n kana a fɔ ko dennɛ le nde la. A ko a wa n nata kan-bo-kan, n ni ta nyɔ. A ko a wa fenfen fɔ n ye, n ni wo rakaran nyɔ-mɔgɛnu ye.

⁸A ko n kana kilan mɔgɔ-wo-mɔgɔ la bawo a ye n fɛ. A si n nakanan. Ale Mari kan le.

⁹Mari ban kɛ fɔla, a ya a kɔɛn lana ka a tugun n dɛ la. A ya a fɔ n ye ko, “I ma a yen, n bi nna kumɛnu donna i da rɔ.

¹⁰Ka a dabira bi ma, n bara sibole anubɛ nyamanɛnu natenbi i ma. I si donu wurun ka donu fanka mayigi. I si donu kasara ka donuta mansayɛ bi anu bolo. I si donu sigi mansayɛ la ka donu sɔ fanka rɔ fanan.”

¹¹Wo kɔma, Mari ya a fɔ n ye tun ko, “Yɛrɛmaya, i ya nfen yen kɛ la?” N ya a fɔ ale Mari ye ko, “I ya bɛni-bolɔn[1] le yira n na.”

¹²Mari ya a fɔ n ye ko, “I wara ale le tagbɛ wo la, yɔ, ado n yɛ bɛnnɛ ka a lɔn ni nna kumɛ wonu si bɔ-a-la, yɔ!”

¹³Mari kumara n ye tun, a ko, “Yɛrɛmaya, i wara nfen yen kɛ la tun?” Nde, Yɛrɛmaya ya a fɔ Mari ye ko, “N ya yi le yen gbonsanna dagɛ rɔ. A ara to sɛ, a ra ni wuya n bara la ka bɔ kantɔ-wara la.”

¹⁴Mari ya a fɔ n ye tun ko, “Kasarɛ si bɔ kantɔ-wara la. Kasarɛ si ke mɔgɛ bɛɛ ma nyamanɛ kɛ rɔ.

¹⁵Wati-kundu-nɛ wa tenbi, nyamanɛ minnu bi kantɔ-wara la, n si wo mɔgɛnu natugu wo ma. Nyɔ-mansɛnu si na Yerusalɛm soe tarɛ bira-a-la ka soe damasi bira-a-la Yuda nyamanɛ rɔ. Anu si na anuna mansaya-waganɛnu sigi Yerusalɛm tarɛ don-dɛnu na.

¹⁶N bi nna mɔgɛnu tɔrɔla nya min, n si wo ragbɛ anu ye. N si anu tɔrɔ bawo anu bara hakɛ kɛ ka anu kan-kɔ sɔ n na. Anu bi bɛsɛnu nadanna ka nta sarakɛnu di anu ma, ado anu bi bɛsɛ wonu nadanna anu bole nyɛrɛ-nyɛrɛ le la.”

¹⁷Mari ko, “I ni wuli ka kuma mɔgɛnu na. N ba min fɔ i ye, i ni wo bɛɛ latenbi anu ma. I kana kilan mɔgɛnu na kaka. Ni i kilanta anu na kaka, i tenbi anu tɛma, wo kilan si tenbi kakatɛ la.

¹⁸N si i ma iko so-latankanɛ, ni wo ma, nɛgɛ-sɛnbɛrɛn-kɔn, ni wo ma, sila-tarɛ. Mɔgɛ bɛɛ si i ragbɛrɛn Yuda nyamanɛ rɔ, a mansa wo, a kun-tigi wo, a saraka-masɔla wo, anubɛ a mɔgɛ toenu.

¹⁹Anu si i kɛlɛ kɔnɔ anu ti i nɔ bawo n bi i fɛ. Nde le si i lakanan.”