Read Kuranko Yɛrɛmaya 13 Bible Online

Yɛrɛmaya 13 - Kuranko bible

Yɛrɛmaya 13

¹Mari ya a fɔ n ye ko n ni ta linɛn-fanɛ san ka a ma kufama la. A ko n ni kufama don n na kɔnɔ n kana a ku de!

²Nde fanan ya a ma iko Mari ya a fɔ n ye nya min.

³Wo kɔma, Mari ya a fɔ n ye tun ko

⁴n ni ta wo la Para soe dafɛ. A ko n ni kufama wo bɔ ka a dogon fara-woe rɔ.

⁵Woletɔ n tara a dogon fara-woe rɔ Para soe dafɛ iko Mari ya a fɔ n ye nya min.

⁶Tele-dande tenbinɛ wo kɔma, Mari ya a fɔ n ye ko n ni sɛgi n gbɛ rɔ Para soe dafɛ. A ko n ni kufama wo bi tun.

⁷Woletɔ n tara ka a labɔ farɛ kɔrɔ. Kɔnɔ n ya a taran, a la ara murun. A ti ko-wo-ko nyinya mɔgɛ ma tun.

⁸Wo kɔma, Mari kumara n ye tun. A ko

⁹a si wole, Yerusalɛm so-burɔ-mɔgɛnu anubɛ Yuda nyamanita-mɔgɛ toe bɛɛta wasinteyɛ ma iko kura-kore wo.

¹⁰A ko wole, kalabantenu sa sɔnna wo tole masɔla ata makawandili-kan la. Wola tolo-gbɛlɛyɛ le ye a mala, wo ye wo nyɛrɛ diyana-koenu mala. Wo ye bɛsɛnu kɔla, woletɔ wo ye mala iko kufama kɛ. Wo ti ko-wo-ko nyinya mɔgɛ ma.

¹¹Iko kufama gbɛrɛnnɛ mɔgɛ ma nya min, Mari ko a ye a fɛ nun wole, Isirɛla mɔgɛnu anubɛ Yuda mɔgɛnu ni wo gbɛrɛn a ma wo nya na le. A ko a ya wo ma le alako wo ni ma a halalɛ la. Mankan wo, gbiliyɛ wo, matɔgɛ wo, anu si a ma, ale Mari ni wo bɛɛ sɔrɔn mɔgɛnu bolo. Kɔnɔ a ko wole, ata mɔgɛnu ma sɔn wo tole masɔla a la.

¹²Mari ko ka ala kumɛ latenbi wo ma ko ale Isirɛlata Mari Alla ko a bɛnta, baan-barɛ bɛɛ la ni fa baan la. Kɔnɔ a ko wole si a fɔ nde, Yɛrɛmaya ye ko, “Ɔn, ma ya a lɔn ko fɔ baan-barɛnu na wa fa le baan la.”

¹³Wo kɔma, a ko n ni wo yabi ko ale Mari si wo bɛɛ ma iko gbɛɛtoe nyamanɛ kɛ rɔ. A ko a mansa wo, Dawuda kegeyɛnu, kɔni, a nɛbi wo, a saraka-masɔla wo, anubɛ a Yerusalɛm kɛ bɛɛ, a ko a ye wole ma kɛ la.

¹⁴A ko a si a ma, wole Yuda mɔgɛnu ni to tonko-tankanna ka bui wo nyɔgɔn kuma. Den wo, fa wo, bɛɛ si bui a nyɔgɔn kuma. A ko wola hina-wo-hina ti don ale tɔ. A ko ata hinanteyɛ ti a ma, wo ni to wo niyi la.

¹⁵Nde, Yɛrɛmaya ko wole, Yuda mɔgɛnu ni wo tole masɔ Marita kumɛ la. Wo kana wasi bawo ale le ya kɛ fɔ wo ye.

¹⁶Wo ni wota Mari Alla gbiliya. Yanni pinpi ni don wo ma, wo ni a gbiliya. Yanni wo ni tonko-tankan kɔnkɛnu ma pinpi rɔ wo ni a tanto! Wo yili-madiyanɛ wan-takɛ min ma, Mari si wo yɛlɛma pinpi-fin-bɛ la.

¹⁷Ni wo ma ale Mari kan bira, n si to dila n yisi rɔ wola wasinteyɛla ko la. N si di biribiri! N ya-yi si n ya-denkɛ lafa bawo wole, Marita mɔgɛnu si taran biralɛ rɔ.

¹⁸Mari ya a fɔ n ye ko n ni kɛ fɔ Yuda mansɛ anubɛ a na ye. A ko anu ni anu nasɔ anuna mansaya-waganɛ rɔ. Anuna mansaya-fulɛ si bɔ anu kunyɛ la.

¹⁹Soe minnu bi wulɛ rɔ Yuda nyamanɛ dugu la, wonu yogenu bara kurɔn don wo ma. Wo masɔrɔn-kunya sa mɔgɔ-wo-mɔgɔ bolo. Wole Yuda nyamanita-mɔgɛ bɛɛ kunyɛ si don biralɛ rɔ nyamani-gbɛrɛ bolo. Anu si ta wo dama la tɛrr!

²⁰Ile Yerusalɛm kun-tiginu, wo ni wo kunyɛnu kɔrɔbi. Wo ni wo yɛ lata. Wo ma wo yogenu yen bɔla kantɔ pan? Alla ya mɔgɛ minnu kerifa wo la, wonu bi mintɔ gbɛ? Nba, wo wasinɛ wonu denu tɔ.

²¹Wo ye a fɔla minnu ma ko wo diyana-mɔgɛ le, wonu ba sigi wo kun na, wo si nfen fɔ? Wo ti yakɔrɔ-mamɔɛ anubɛ dumɛ sɔrɔn? Wo dumɛ si ma wo bolo iko musi buyi wa a lamaga.

²²Wo ni wo nyɛrɛ manyinika, wo ni a fɔ ko, “Nfen bi a tola, kɛnu bi mala ma la?” Wo hakɛ le ye a mala, wonu bi sigila ma ma, yɔ! Ka a tɛgɛ wo hakɛ wonu ma, anu ya wola kurɛ tɛgɛ wo la. Woletɔ anu buira wo ma ka digin wo ma.

²³Mɔgɔ ti ke a fɛrɛ yɛlɛmana. Kuli fanan ti ke a manyɛgannɛ bɔla a ma. Wole Yerusalɛm kɛnu fanan bi wo nya le. Wo ti ke yɛlɛmana tun ka ko-nyimɛ kɛ. Wo ye karagbɛlɛyɛ le la tolon!

²⁴Mari ko a si wole, Yerusalɛm kɛnu tanyɛnsɛn iko fɔnyɔ ye tala fɔrɔn min na.

²⁵A ko kɛ le ye nala sigila wo ma. A miriya bɛnnɛ min ma wo wara la, wo le kɛ la. Kɛ bɛɛ ye sigila wo ma bawo wo ara wo kan-kɔ sɔ ale Mari la ka la bɛsɛnu na.

²⁶Ile Yerusalɛm kɛnu, Mari ko a si wola kurɛ wusɔn wo kun na. Bɛɛ si wo lakolɔn yen. Wo si miliya.

²⁷Mari ko wo ye kinsin-kansan-koe minnu kun na, a ara wo bɛɛ yen. A ko wo ye bɛsi-kɔ-koe min bɛɛ kun na min manɛ iko yɛlɛnyɛ, a ya wo bɛɛ lɔn. Wo ye miliya-koe min bɛɛ la, a ye wonu kalama. Wo ye sɔn-yogoyɛ min kun na sɛnɛnu tɔ anubɛ kɔnkɛnu ma, a ko wo bɛɛ ragbɛnɛ le a bolo. Mari ko gbalo ye wole, Yerusalɛm kɛnu ma. Wo kɔsɔnɛ si to ha muntuma?