Read Kuranko Yɛrɛmaya 15 Bible Online

Yɛrɛmaya 15 - Kuranko bible

Yɛrɛmaya 15

¹ Wo kɔma, Mari ya a fɔ nde, Yɛrɛmaya ye ko hali Nɛbi Musa anubɛ Samuwɛli ya madiyali-kɛ wole, Yuda mɔgɛnu ye, a ko a ti kinikini wo ma. A ko wole ni wo masɛgi a la fasi! Wo ni wo mata pon!

² Ni wo ko, “Mintɔ,” a ko ka a fɔ wo ye ko ni kirayɛ la ara tɛgɛ min ma, wo ni faga kirayɛ bolo. Ni min kunyɛ ye tola kɛlɛ rɔ, wo kunyɛ ni to kɛlɛ rɔ. Ni kɔnkɔ-fitinɛ ye tala min na, kɔnkɛ ni ta wo la. Ni min kunyɛ ye tola biralɛ rɔ nyamani-gbɛrɛ rɔ, wo kunyɛ ni to birɛ rɔ.

³Mari ko a si kasara-su nani natugu wole, Yuda kɛnu kan ma. A ko a si kɛlɛ lana min si wo lato. Wo kɔma, a si wulinu nana minnu si wo furi sagan. Wo kɔma, a si konanu anubɛ firarɔ-sogenu nana minnu si furi wonu tafarafara anu dɔn-tinɛ.

⁴ A ko a si a ma, wole Yuda kɛnu si ma mɔgɔ-makawanɛ la duninya-mɔgɛ bɛɛ ye. Mari ko a si kɛ ma ka a tɛgɛ Yuda Mansa Hɛsakayala den Mansa Manasa sɔn ma Yerusalɛm soe burɔ.

⁵Mari ko, “E, Yerusalɛm kɛnu, yon si kinikini wo ma? Yon yisi si tinya wola ko la ka di? Yon si ka kilɛ ma ka wo manyinika ni wo kɛndɛ?”

⁶Mari ko wole, Yerusalɛm mɔgɛnu bara wo ban a la, ado wo ye tola tala le tun. Wo sa wo yɛ lasɛgila. Woletɔ a ko a ye wo dan labirala ka wo tɔrɔ. A ko wola koe min nakɔlɔn-kɔlɔnnɛ a burɔ, a ti ke wo birala-a-rɔ tun.

⁷Ale Mari ko a si wole, ata mɔgɛnu gbesi foron-tagbesi-bosɛ la ka wo ranyɛnsɛn soe tarɛ don-dɛnu na. A ko bawo wole, ata mɔgɛnu sa wo kɛ-nya yɛlɛmana, a si wo kasara pɔ! A si wola dannu gbɔrɔndo wo kɔrɔ ka anu faga.

⁸Wole Yuda musu-siyaman si foo wola keinu na. A ko kɛɛ-nyaganɛ si siyaya ka tenbi ba-kɛnkɛn la. A ko a si kasarɛ lana tele-latelen-wati wole, Yuda kemini-mɛsɛnu kan ma. A ko kɛ si kilan anubɛ dumɛ lana anu nanu kuma.

⁹Wo yogenu ba na wo kɛlɛ-tinɛ, ni wole, Yuda kɛ minnu tora wo niyi la, a ko a si wo kunyɛ don fagali-kɛlɛnu bolo. Hali den-kei mɔgɔ wɔrɔnfila le ye musu kelan bolo, a bɛɛ si ta sala a ma nɛnɛrɛ! Anu na wo si to yɛlɛla a ma diyi-kɛ bolo fekufeku! A kɔndɔ si fili yisi-tinya bolo pirikali! Mari ko tele-mansa-di-kɔlibilɛ si yɛlɛma pinpi-mansa-di-kɔlibilɛ la. Nde Mari kan le kɛ la.

¹⁰E, n na, alako i kana n sɔrɔn nun. N ma di mɔgɔ-wo-mɔgɔ ye Yerusalɛm soe burɔ. N ma yili tɛgɛ hali ka fen sinka mɔgɔ ma kɔnɔ hali wo, mɔgɛ bɛɛ ye n dankala.

¹¹Mari ko a ye nde, Yɛrɛmaya latankala kɔrɔ le la. Kasarɛ anubɛ tɔrɔyɛ wa na, Mari ko a si a ma, n yogenu ni n manyinika ko n ni madiyali-kɛ anu ye.

¹²Iko mɔgɔ ti ke nɛgɛ anubɛ silɛɛ rakerila nya min, wo ti ke wo yogenu nɔla minnu bi bɔla kantɔ-wara la wo nya na le.

¹³Wodi anubɛ fen-kolomɛ minnu bi wole, Yuda kɛnu bolo, Mari ko a si wonu don wo yogenu bolo, hali anu ma tɔrɔ wo la. A ko a si wo ma ka a tɛgɛ wole, Yuda kɛnu hakɛ ma, wo ye min mala kan-tinɛ bɛɛ rɔ.

¹⁴A ko a si wo don yɔɔnyɛ rɔ wo yogenu bolo. Anu si ta wo la nyamani-gbɛrɛ rɔ, wo ma min lɔn kɔrɔma la. A ko a fonde kaliyanɛ iko ta-belebele-wɛ. A si wo dama mintan gburr!

¹⁵E, Mari, ile min ya ko lɔn, i fonde lamiri n ma ka n nakanan. N tayili sara n tasɛlɛnu na. I kana i munyu anu kɔrɔ, ha anu ni n faga. Mari, anu bi tɔrɔyɛ min bɛɛ sigila n ma, wo bɛɛ tɛgɛnɛ ile le ma.

¹⁶I kumara n ye tumɛ min, n ya n tole masɔ a kin na! Ila kumɛ ara a diya don n tɔ. N sewanɛ bawo mɔgɛnu bi n kelela ko ile Mari Sɛnbɛ-Bɛɛ-Tigita mɔgɛ.

¹⁷Nyama tenbi yɛlɛn anubɛ diyɛ kun na wati min, nde mako sa anu na. N sigira n dan na bawo ile le ya kilɛ yira n na. I wara n burɛ lafa yisi-bɔɛ la ka a tɛgɛ anu sɔn-yogomɛ ma.

¹⁸Nfenna dumɛ sa foola n kun na. Nna tɛlɛ sa sɔnna kɛndɛyala. Mari, i kana ma n ma iko yi min bi gbalala a worɔn la todo! I kana ma n ma iko tenke min sa yigila tun.

¹⁹Mari ya nde, Yɛrɛmaya yabi ka le ko ni n sɛgira a wara la, a ko a si n yisi kurakuraya. Wo kɔma, a ko n si ke ata wɔlɛ kɛla le worɔ. A ko ni a sɔgɛ ye n na ka ma nɛbi-bɛrɛbɛrɛ la, fɔ n ba n fara kun-takolonya-kuma-fɔɛ la ka don hɛnkilimaya-kuma-fɔɛ rɔ. A ko a bɛnta, wole Yuda kɛnu ni na nde wara la kɔnɔ a ma bɛn, nde ni ta wole wara la.

²⁰Mari ko a si n ma wole ye iko dandan tagbɛlɛ. A ko n ta si gbɛlɛya iko sila-dandan. A ko wo ya n kɛlɛ nya-wo-nya, wo ti n nɔ worɔ. A ko ni wo ya a yen wo ye mala bawo ale Mari ye n fɛ. A ko a si n kumafunfan ka n nakanan.

²¹A ko a si n nakanan wola karagbɛlɛyɛ-masibɛ ma. A si n tanka wola wunduyogoyɛ ma. Ale Mari kan le kɛ la.