Read Kuranko Yɛrɛmaya 17 Bible Online

Yɛrɛmaya 17 - Kuranko bible

Yɛrɛmaya 17

¹Mari ko wole, Yuda mɔgɛnu, wo ara hakɛ minnu kɛ, wonu gbɛni de mɔgɛnu ye. A mani de iko mɔgɛ wa fen sɛbɛ nɛgɛ la farɛ ma. Wo hakɛ mani de iko anu sɛbɛra saraka-mintan-tinɛ bolon nanɛ ma.

²Hali wola dannu yili ti bɔ bɛsi-kɔ-tinɛnu ko, ado anu ti nyina wola bɛsi Asura fanan ko. Wola bɛsɛ minnu bi kɔlɔma-kuru-wɛnu kɔrɔ, anu yili ti bɔ wonu ko, ado hali minnu bi kɔnkɔ-layan-bɛnu kuma, anu yili ti bɔ wonu fanan ko.

³Mari ko bɛsi-kɔ-tinɛ minnu bi kɔnkɛnu ma wo, anubɛ wola nɔnfuli anubɛ wola fen-kolomɛnu wo, a ko a si wonu toronde wo la ka wonu natenbi wo yogenu ma bawo wo ara hakɛ kɛ ka a dan-natenbi wola nyamanɛ bɛɛ rɔ.

⁴A ko a ara nyamanɛ min di wo ma, wo si foo wo la, ado wo gbɛ le wo la. A ko a si a ma, wo yogenu ni wo ma yɔɔn la. Wo si taran yɔɔnyɛ wo rɔ nyamanɛ do rɔ wo ma min lɔn mumɛ! Ni wo ara a yen wo ye mala, wo mara bawo a fonde kaliyanɛ iko tɛ min si to mintanna kudai!

⁵Mari kan le kɛ la, a ko dankɛ ye wo tigi kuma min bi a yigi sala a hadama-den-nyɔgɛ rɔ, ado wo ye a tola mɔgɔ-bagbuyi anubɛ a sɛnbɛ dɔrɔn le ma ka a kan-kɔ sɔ Mari la.

⁶Mɔgɛ wo mani de iko fan min kinɛ dugu-ragbalanɛ rɔ, ado a ye kan min, mɔgɛ ti ke sigila nyɔ. Nyɔ kaliyanɛ kodokodo, ado dugu-karakasɛ le. Alla ye ko-nyimɛ minnu niyi la, ale ti wo nya-yen.

⁷Kɔnɔ a ko mɔgɛ min lanɛ ale Mari la, duwɛ ye wo tigi fɛ, ado a yili latɛgɛnɛ Mari ma.

⁸ Mɔgɛ wo ra si gbɛlɛya gbon, iko yi-dafɛ-kɔlɔma. Kɔlɔma wo sulinu si yigi saru, ado a si yi sɔrɔn duk! Hali tele fafara a ma nya-wo-nya, wo ti kilan. A nɔrɔnni de tuma-wo-tuma. Hali san tenbira a kun na fɛlɛlɛ, banda ma na, wo ti a tɔrɔ. A gbɔɛ ye a la wati bɛɛ.

⁹Mari ko hadama-dan-sɔn yogo ha ka a dan-natenbi. A ti a sɔn yɛlɛma mumɛ, ado mɔgɛ ti ban hadama-dan-sɔn nya-yenna.

¹⁰ Kɔnɔ Mari ko ale le si ke mɔgɔ-burɛ lɔnna. Ale le si mɔgɔ-miriya kɔrɔbɔ. Woletɔ a ko min bɛnnɛ mɔgɛ bɛɛ ma, ale le si ke wo latɛgɛla. A ko a si bɛɛ sara a sara-nya la.

¹¹Kona wa kɛwɔli do latii ale ma min sa, wo mani de iko mɔgɛ wa ma-a-la kensunteyɛ rɔ. Mɔgɛ wo siyi wa tala a tɛma, ala nɔnfuli bɛɛ si ban. Yanni a siyi ni ban, bɛɛ si a lɔn kuntan la.

¹²Kebi fɔlɔ, mala Bato-Bɔn ye gbiliyɛ rɔ bawo Marita mansaya-waganɛ le nyɔ la.

¹³Mari, Isirɛla mɔgɛnu yigi le ile la. Mɔgɔ-wo-mɔgɔ wa a kan-kɔ sɔ i la, wo tigi si miliya. Min bi a bɔla ile Marita kilɛ fɛ, wo tigi mani de iko tɔgɛ min sɛbɛnɛ gbangban rɔ. Wo sa mɛla bawo a ara ile Mari boloka. Tenke-kimanɛ le ile Mari la.

¹⁴Mari, ni i ya n nakɛndɛya, wo tenbira lakɛndɛyɛ bɛɛ la. Ni ile ya n nakisi, wo tenbira lakisiyi bɛɛ la. Mari, n bi ile le kelen pe matɔgɔla.

¹⁵Yuda mɔgɛnu bara nɔrɔ n manyinikɛ ma fantin! Anu bi tola n mayɛlɛnna ko, “Marita wɔlɔyiya-kumɛ kɛ ye kama? Nba, a ni bɔ-a-la ma yala.”

¹⁶N Mari, i ya n ma ila mɔgɛ kɛnu saga-fɛ-biralɛ la, ado n ma n ban wo ma. A ma di n ye tele-makilannɛ ni na nun. Mari, n bara min bɛɛ fɔ, i ye wo bɛɛ kalama.

¹⁷I yandi Mari, i ma kana kilan n ye. Tɔrɔyɛ tenbi nala n magbenna, n burumatoe ye tala ile le wara.

¹⁸Minnu bi n yakɔrɔ-mamɔla, alamɛ wonu yarabira miliyɛ bolo pɔ! I yandi, n Mari, i kana n namiliya. Anu kumakɔ n ye kɔnɔ i kana sɔn, nde kun ma ni kɔ. Alamɛ i ya kasarɛ sigi n yogenu ma. I ni anu tinya ka anu tabunden n ye iko kɔrɛ.

¹⁹Mari ya a fɔ nde, Yɛrɛmaya ye ko n ni ta n sɔ Yerusalɛm soe don-da-wɛ la, wole Yuda mansɛnu bi tenbila min tɔ. A ko n ba bɔ nyɔ, n ni ta sɔ Yerusalɛm don-dɛ doinu na.

²⁰N ni a fɔ wo ye nyɔ ko wo ni wo tole masɔ Marita kumɛ la. Wole Yuda mansɛnu ni wo tole masɔ. Wole Yuda mɔgɛ bɛɛ min bi wo kunyɛ ladonna Yerusalɛm don-dɛ kɛnu na, wo ni wo tole masɔ.

²¹ Mari ko wo ni a ma wo fɛrɛma. Wo kana dunɛ bi Sulen-Tele ma, ni wo ma, ka na a la Yerusalɛm don-dɛ la yan.

²² Wo kana dunu-wo-dunu labɔ wola bɔn la wulɔn-tele ma. Wo kana wɔli-wo-wɔli kɛ wo wulɔn. Wo ni tele wo to sɛninyɛ rɔ, ado tɔn le wo la a ya min sa wo benbanu kuma.

²³Kɔnɔ Mari ko wo benbanu ma sɔn anu tole masɔla a la hali ka ata kumɛ bira. A ko anu tengberenta. A ko Mari ara wo benbanu tɔrɔ nun kɔnɔ anu ma anu bɔ anu gbɛ dala. A ko anu ma anu tole masɔ a la mumɛ!

²⁴Mari ko wo ni a ma wo fɛrɛma ka ata kumɛ bira a kilɛ fɛ. Wo kana na dunu-wo-dunu la Yerusalɛm don-dɛnu na Sulen-Tele ma. Wo ni Sulen-Tele bira wo bolo filɛ la ka a to sɛninyɛ rɔ. Wo kana wɔli-wo-wɔli kɛ wulɔn.

²⁵A ko ni wo ya ata sereya kɛnu bira, min bi mala, wo le kɛ la. Mansɛ minnu bi sigila Mansa Dawuda gbɛ rɔ, wonu si to tenbila Yerusalɛm don-dɛ kɛnu na anubɛ anuna mɔgɔ-banu. Wonu si to kirindinu anubɛ soeenu naburila. Anu si to tala wole, Yuda anubɛ Yerusalɛm nyama tɛma yan. Mɔgɛnu si to sigini Yerusalɛm soe burɔ yan tolon!

²⁶A Yuda so-mɛsɛ wo, a so-mɛsɛ minnu bi Yerusalɛmna foolɛ rɔ wo, a Bɛnyamɛ nyamanita-mɔgɔ wo, a kɔnkɔ-nyamanita-mɔgɔ wo, a dugula-mɔgɔ wo, wole dama si na sarakɛnu na ale Mari Bato-Bɔn la, a saraka-mintanta wo, a fui-fen-saraka wo, a saraka-suma-diyama wo, anubɛ a baraka-bira-sarakɛnu.

²⁷Ni wo ya wo tui ka to dunɛnu madununa Sulen-Tele ma ka tenbi anu na Yerusalɛm don-dɛnu na, Mari ko a si ta fitinɛ layigi Yerusalɛm don-dɛnu na min ti dufen muk! Hali wola kan-tina-latankanɛnu si mintan gburr!