Read Kuranko Yɛrɛmaya 18 Bible Online

Yɛrɛmaya 18 - Kuranko bible

Yɛrɛmaya 18

¹Mari ya kumɛ min fɔ nde, Yɛrɛmaya ye, wo le kɛ la. A ko

²n ni ta daga-sɔlɛla bɔn la. A ko a si sarakanɛ di n ma nyɔ.

³N tara daga-sɔlɛla bɔn la tumɛ min, n ya a taran daga sɔɛ la ala daga-sɔ-fan la.

⁴A ye dagɛ min nadanna sinda-bɔnkɛ la, ni a ya fɛɛ yen wo la, a si sinda-bɔnkɛ wo nyɛrɛ ma daga-gbɛrɛkɛ la tun. A si dagɛ wo manunku a bole la iko a di a ye nya min.

⁵Wo kɔma, Mari ya ata sarakanɛ di n ma. A ko

⁶ale Mari ti wo sufa ma wole, Isirɛla kebilɛnu na, wa? A ko wo mani de iko sinda-bɔnkɛ tenbi daga-sɔlɛ bolo tɔ.

⁷A ko wo tumɛ ye nala, a si sibolo doi wara-koe fɔ. Tumado a si sibole wo wurun ka a fɛrɛn dugi la alako a si tinya pɔ!

⁸Kɔnɔ ni sibole wo ya a kan-kɔ sɔ a hakɛ la, a ko a si a fonde yɛlɛma. Kasarɛ min tabɛnnɛ sibole wo kan ma nun, a ko a ti wo sigi a ma tun.

⁹A ko tuma-gbɛrɛkɛ si na, a si sibolo doi wara-koe fɔ. Tumado a si sibole do lasɔ ka a ragbɛlɛya gbon!

¹⁰Kɔnɔ ni a ya a yen, sibole wo ye karagbɛlɛya-koe kɛla, a ko a si a fonde yɛlɛma. A miri ye ko-nyimɛ min ma a ye nun, a ti wo ma tun.

¹¹A ko n ni a fɔ wole, Yerusalɛm anubɛ Yuda nyamanita-mɔgɛ toe ye ko a ye kasarɛ rabɛn-tinɛ wo ye kaka. A ko wo ni wo fara wola karagbɛlɛya-koenu na wo ye min kun na kaka. Wo ni wola kɛ-nyanu yɛlɛma ka ko-latelennɛ kɛ.

¹²Kɔnɔ Mari ko wole, Yuda mɔgɛnu si na a fɔ worɔ ko wo ti wo dɛ bila wo rɔ. Wo si a fɔ fanan ko wo ye tola wo sako le tɔ. Wo si to wola yisi-gbɛlɛya-koe anubɛ wola tengberenya-koenu kun na.

¹³Mari ko wole, Isirɛla mɔgɛnu bara ko-yogoma-belebele ladan min kɛ, n ni sibolo-gbɛrɛ-mɔgɛnu manyinika ni anu bara ko sufa kɛ lamɔɛn nun.

¹⁴Lɛbanan kɔnkɛnu si to, duri ti taran anu ma, wa? Nyɔ-kɔnkɛrɔ yi-kimanɛnu si gbala, wa? Ade, wo ti ma dɛɛ!

¹⁵Kɔnɔ a ko wole, ala mɔgɛnu bara nyina a ko. Wo ye sarakɛnu bɔla bɛsi-fuyinu ye. Wo ara sama kilɛ ma. Wo ara sama ka wo benbanuna kila-kɔrɛnu bi. Wo ye bɔla kila-nɛnu fɛ ka kila-wɛnu to.

¹⁶Woletɔ wole, Yuda nyamanɛ si ma nyamani-fuyi la. Nyamanɛ wo si ma yɛlɛnma-fan la mɔgɛnu ye. Mɔgɛnu ba bɔ nyɔ, anu si kawa ka anu kunyɛ firifiri. Wola nyamanɛ wo tinya-koe si ma tɛrɛna-koe la mɔgɛnu bolo.

¹⁷Mari ko a si wo ranyɛnsɛn wo yogenu yakɔrɔ. A si wo ranyɛnsɛn iko tele-bɔ-fɔnyɔ wa gbangban ranyɛnsɛn a sɛnbɛ la. A si a kan-kɔ sɔ wo la. A ko wo tenbi tɔrɔyɛ rɔ, a ti wo dɛnbɛ.

¹⁸Nde, Yɛrɛmaya ban kɛ fɔla, wole ko, “Wo na, ma ni ko-rabɛn-kɛ Yɛrɛmaya kan ma. Saraka-masɔlɛ donu si taran a gbɛ rɔ ka ma labila. Hɛnkilimɛ donu si to ma hɛnkili kɔla. Nɛbinu si to Marita kumɛ dila ma ma. Ma mako sa Yɛrɛmaya kɛ la tun. Ma ni ta a la mɔgɔ-banu yakɔrɔ. Ni a ya fenfen fɔ, ma kana ma tole masɔ wo la.”

¹⁹N ko Mari, i wɔlɔ matɔlɔ n kuman-kan la. Anu bi min fɔla n bara-koe rɔ, i ni wo lamɔɛn.

²⁰A ma kin, mɔgɛ ni ko-nyimɛ yili sara ko-yogomɛ la. Anu bara ban denkɛ sinna n kɔrɔ n faga-koe la. Mari, i miri. Nde le sɔra i yakɔrɔ nun. N ya i madiya alako i ni ko-nyimɛ kɛ mɔgɛ kɛnu ye. N ya i madiya alako i fonde kana bɔ anu kuma.

²¹Nba, i ni a ma, anuna dannu ni faga kɔnkɛ bolo. I ni a ma, anu yogenu ni anu nɔ kɛlɛ rɔ. A ma, anuna musinu ni foo anuna dannu na. Anu ni ma kɛɛ-musinu na fanan. A ma, Yuda mɔgɛnu manyimanɛ ni faga. Anuna kemini-mɛsɛnu kunyɛ ni to kɛlɛ rɔ.

²²A ma, anu ni to gbele-gbelenna anuna bɔnnu na. A ma, anu yogenu ni na anu kɛlɛ tiriya! Kɛ bɛɛ ni ma bawo n yogenu bara denkɛ sin n bira-koe la. Anu bara gbɛrɛ-siyaman lasigi n ya rɔ.

²³Mari, ile ya n faga-koe lɔn anu bolo. I ka kinikini anu ma anuna ko-yogomɛnuna ko la. I kana anu hakɛ makoto. I ni anu nabɔ anuna sɔ-tinɛnu tɔ. Anu tɔrɔ i fondo-bɔnɛ la.