Read Kuranko Yɛrɛmaya 22 Bible Online

Yɛrɛmaya 22 - Kuranko bible

Yɛrɛmaya 22

¹Mari ya a fɔ n ye ko n ni ta Yuda mansɛla bolɔn la, Mansa Dawuda kegeyɛnu, kɔni. N ba ke nyɔ tumɛ min, a mansa wo, a mɔgɔ-ba wo, a Yerusalɛm ka wo, wo ni wo tole masɔ Marita sarakanɛ la.

³Mari ko wo ni ko-latelennɛ kɛ. A ko mɔgɛ min kensunnɛ, wo ni wo tanka a kensunte ma. A ko a sundan wo, a kelenni wo, a kɛɛ-musu wo, wo kana anu bira boloko-yogomɛ-kɛ. Min ma ko-yogomɛ kɛ, wo kana wonu faga kan-tinɛ kɛ rɔ.

⁴A ko ni wo ya ale Marita kumɛ bira, mansayɛ ti bɔ Mansa Dawudala bɔn la worɔ, ado min tenbinɛ wo la, wola mansa wo, wola mɔgɔ-ba wo, wonu si to tenbila tenbi-bolɔn la soeenu anubɛ kirindinu na anu bolo. Anu si to tala wole, Yuda anubɛ Yerusalɛm nyama tɛma yan.

⁵ Kɔnɔ a ko ni wo ma ala kumɛ bira, Mari ya a keli ko wola bolɔn kɛ si ma sundu-kunyɛ la. Ale Mari kan le kɛ la.

⁶Mari ko Yuda mansɛla bolɔnta kinyɛ manɛ iko Kaliyadi nyamanɛ anubɛ Lɛbanan kɔnkɛnuna kinyɛ. Kɔnɔ a ko hali wo, a si a tinya ka a ma tonbɔn la.

⁷A ko a si mɔgɛnu nata minnu si a kasara. Anu si na anuna tɛgɛrannu na anu bolo alako anu ni bolɔn kɛ sɛnbɛrɛn-kɔnnu nabui ka wonu nakɛ tɛ rɔ hali anu nadanta fɛrɛn-hakikɛnu na.

⁸Wo kɔma, sundan-siyaman tenbimatoe si anu nyɔgɔn manyinika ko, “Nfen ya a ma, Mari ya ko sufa kɛ sigi so-karantan kɛ ma?”

⁹A si fɔ anu ye ko, “Kɛ mara le bawo anu ya sarama-kan tinya min bi anubɛ anuta Mari Alla tɛma ka don bɛsi-fuyinu kɔ-koe rɔ.”

¹⁰Wole Yuda mɔgɛnu kana Mansa Yosaya di. Wo kana a saya-di-kɛ kɛ. Kɔnɔ wo ni ala den Yɛhowahasi di biribiri! Anu ba ta a la, a ti sɛgi yan muk! A ti a sɔrɔn-nyamanɛ yen tun!

¹¹Mansa Yɛhowahasi min ya a fa Yosaya gbɛ bi, Mari ya a fɔ wo lela ko la ko a ara bɔ yan, ado a ti sɛgi yan tun!

¹² Anu tara a la nyamanɛ min tɔ, a ye tala fagala nyɔ le. A ti a yɛ masa nyamanɛ kɛ ma tun!

¹³Mari ko gbalo ye ale mansɛ ma, ale min bi ala bolɔn sɔla wunduyogoya-fan rɔ. A kɛnɛna mɔgɛnu bole labirala alako a ni ala bolɔn lakoloya. A ye a fɔla ko a si bolon-ba-belebele sɔ a nyɛrɛ ye. San-bɔn wo konkonu si ma fulan! A si wundan-ba-dɛgbɛnu sɔ ka sida-fɛrɛnnu sa a dandan ma tala. A wa ban, a si nɛrɛ-wulan nɔrɔn a ma. Kɔnɔ a ye ala mɔgɛnu nawɔlila, a sa fenfen dila anu ma. Hali fen-yantarani, a ti a di anu ma.

¹⁵Mari ko ale mansɛ miri ko sida-fɛrɛn-siyamɛ si a ma mansa-tɔgɔlamɛ la ka tenbi a fa la. A fa ye mansayɛ la tumɛ min, dɔn-fan le dɔrɔn ya wo wasa. Mari ko wo ya ko-telennɛ anubɛ ko-nyimɛ le ma a siyi-tele-bɛɛ kɔrɔ. Woletɔ koe bɛɛ tara a kilɛ fɛ a bolo.

¹⁶A ko a fa wo taranta bolo-kolɔn anubɛ fugarɛnu dɛnbɛna wulɔn. Woletɔ a wara-koe bɛɛ tara a kilɛ fɛ. A ko ale Mari lɔn kɔrɛ le wo la.

¹⁷Kɔnɔ a ko ale Mansa Yahoyakim, kensunya-fen-sɔrɔn, wo le dɔrɔn bi a hɛnɛna. Ka to hɔnna a nyɛrɛ la tolon, wo di a ye kosɛbɛ! Mɔgɛ min ma ko-yogomɛ ma tele-kelen-bɛrɛni, a si wo faga. A ye a lagbɛlɛyala mɔgɛnu kuma.

¹⁸ Mari le ya kɛ fɔ Yuda Mansa Yosayala den Yahoyakim ma, a ko, “Yuda mɔgɛnu ti anu dɛ sa-a-rɔ i san-koe kuma. Ila kinikini ti taran anu tɔ. Hali ka a fɔ i kebilɛ ma, ‘Sɛkɔrɔ,’ anu ti wo ma.

¹⁹Yerusalɛm kɛnu si i furi sagan dugi la. Anu si a lakɛ a rɔ Yerusalɛm soe tarɛ kɔma iko sofɛlɛ.”

²⁰Wole Yerusalɛm kɛnu, wo ta Lɛbanan nyamanɛ rɔ ka wo dɛ bolobɔ. Wo ta di Basan nyamanɛ rɔ. Wo ni wo kuli mayɛlɛ di-kɛ-tinɛ Mohabu kɔnkɛnu ma bawo wo yogenu bara wo dɛnbɛnɛnu nɔ.

²¹Fen bi wo bolo wati min, Mari kumara wo ye kɔnɔ wo ma wo tole masɔ a la, ado kebi wo dennɛ pɔipɔi, wo tora a mala wo nya. Lun kelen, lun tala, wo ma Mari sako kɛ.

²²Kɛlɛ si wola mɔgɔ-banu anubɛ wo ta-nyɔgɛ bɛɛ bira iko fɔnyɔ si fan bi nya min ka ta a la. Ka a tɛgɛ wola wunduyogoyɛ wonu ma, wo mawurannɛ si to yarabiyi bolo.

²³Wola mansɛla bɔn sɔra sida-fɛran minnu na ka bɔ Lɛbanan kɔnkɛnu kuma, ale mansɛ lafɛrɛnɛ sanɛ wo burɔ! Kɔnɔ dumɛ wa tagbaya a ma, a makinikininɛ si to iko nyaganɛ wa sigi tin kɔrɔ.

²⁴ Mari ya a fɔ Yuda Mansa Yahoyakimna den Yɛhoyasin ye ko ale Mari ya a keli a nyɛrɛ rɔ ko hali ile mansɛ mara a bolola-dɛɛn-kɔlɔnɛ-tamasere le la, a si a pope.

²⁵A ko ale mansɛ kilannɛ mɔgɛ minnu na, a si a kunyɛ don wonu bolo, Babilɔn Mansa Nɛbukanasa anubɛ ala kɛlɛ-dannu, kɔni.

²⁶A ko a si anubɛ a na don birɛ rɔ. Anu si ta nyamanɛ do rɔ, anu fenfen ma sɔrɔn kan min, ado anu filɛ bɛɛ ye fagala nyɔ le.

²⁷Nyamanɛ-kɛ-sɔgɛ si anu bira dɔgɔma-ma-de, kɔnɔ anu ti anu yɛ masa yan ma tun.

²⁸Yɛhoyasin mani de iko bɔnku-daga-kore min nakɛnɛ a rɔ. Mɔgɔ-wo-mɔgɔ mako ti taran a la tun. Nfen bi a mala, Yɛhoyasin anubɛ ala dannu na ye kɛla a rɔ? Nfenna anu na ye kɛla a rɔ sibolo-gbɛrɛnuna nyamanɛ rɔ?

²⁹E, wole Yuda nyamanita-mɔgɛnu! Wo ni wo tole masɔ Mari kan la.

³⁰Ale Mari ko a ara ban a latɛgɛla ko fɔ ale Mansa Yɛhoyasin kɔrɔ wa kolonya filili! A wara-koe ti ta yarɔ muk! A kegeya-wo-kegeya ti taran a gbɛ rɔ Yuda nyamanɛ kun na Mansa Dawudata bɔn la. Mari kan le kɛ la.