Read Kuranko Yɛrɛmaya 25 Bible Online

Yɛrɛmaya 25 - Kuranko bible

Yɛrɛmaya 25

¹ Yosayala den Mansa Yahoyakimna mansayɛ san nanɛ ma Yuda nyamanɛ rɔ, Mari ya kilayɛ kɛ le don nde, Yɛrɛmaya bolo wole, Yuda mɔgɛnuna ko la. (Nɛbukanasala mansayɛ san fɔlɔtɛ le kɛ la Babilɔn nyamanɛ rɔ.)

²Nde, Yɛrɛmaya ya a fɔ wole, Yerusalɛm so-burɔ-mɔgɛnu anubɛ Yuda nyamanita-mɔgɛ toenu ye ko

³ka a bi Amɔnna den Yosayala mansayɛ Yuda nyamanɛ rɔ san tan-ni-sawɛ ma ka a sigi wati kɛ la, wo ara san mogan-ni-sawa bɔ. San-dande kɛ mumɛ bɛɛ kɔrɔ, Mari ya kumɛ min bɛɛ fɔ n ye, n ma n ban wo do-wo-do fɔla wo ye kɔnɔ wo ma wo tolo-wo-tolo masɔ.

⁴Hali Mari ye tola ala wɔli-kɛlɛnu nanala wo ma minnu bi nɛbiya-wɔli kɛla, wo ma wo tole masɔ wonu na, ado wo bɔrɔ ma taran wo ye.

⁵Anu ko wo ni fara wola ko-yogomɛnu na. Wo ni tɔn sigi wola karagbɛlɛyɛnu na alako wo siginɛ ni to wo halala-nyamanɛ rɔ Mari ya min di wobɛ wo benbanu ma.

⁶Nɛbi wonu ya a fɔ wo ye ko Alla ma minnu na, wo kana wonu kɔ. Anu bi a fɔla fanan tun ko wo kana Alla ladiminya wola bɛsi-kɔ-koe fɛ wo ya minnu nadan wo bole la. Ni wo ya Mari sako kɛ nun, a ti wo tɔrɔ nun.

⁷Kɔnɔ Mari nyɛrɛ ko wo ma wo tole masɔ a kin na! A ko wo ara a fonde magboya wola bɛsɛnu na, ado a ko wole le ya tɔrɔyɛ wo sanba wo nyɛrɛ ma.

⁸Wo ma sɔn wo tole masɔla ale Mari Sɛnbɛ-Bɛɛ-Tigi la min kɛ, a ko

⁹a si kantɔ-mɔgɛ bɛɛ kele wo kan ma katarala Babilɔn Mansa Nɛbukanasa ma, ata wɔli-kɛlɛ, kɔni. A ko mansɛ wo si na wole Yuda nyamanita-mɔgɛ bɛɛ kɛlɛ anubɛ wo dan-masa-nyɔgɛnu. Anu ba ban wo kɛlɛla, anu si wola nyamanɛ kasaranɛ to. Mɔgɛ min ba nyɔ yen, wo kuma si tɛgɛ.

¹⁰ Mari ko a si tɔn sigi wola sewa-tolɔn la. A si yili kiri wola kɔnyɔ-masɔ-tolɔn la. A si tɔn sigi wola kolon-tugu-kan la. Ta-yi wo ta-yi ti taran nyamanɛ rɔ.

¹¹ Nyamanɛ mumɛ bɛɛ kasaranɛ si to. San bi-wɔrɔnfila dɛgɛdɛgɛ, wobɛ wo dan-masa-nyɔgɛnu bi Babilɔn mansɛ kɔrɔ.

¹²San bi-wɔrɔnfilɛ kɛ wa tenbi tumɛ min, Mari ko a ni na to Babilɔn anubɛ ala mansɛ tɔrɔla ka a tɛgɛ anuna yogoyɛ ma. A ko nyamanɛ wo kasaranɛ si to tolon!

¹³Mari ara kasarɛ minnu bara-koe fɔ sibolo-gbɛrɛnuna ko la, wonu fɔra nde, Yɛrɛmaya ye, ado wo sɛbɛra buku kɛ rɔ. A ko a si Babilɔn tinya kasarɛ wonu na.

¹⁴Mari ko a si sibolo-gbɛrɛ donu tayili sara Babilɔn kɛnu na ka a tɛgɛ anu sɔn-yogomɛ ma. Sibolo siyamɛ anubɛ anuna mansɛnu si anu ma anuna yɔɔn la.

¹⁵Isirɛlata Mari Alla ya a fɔ nde, Yɛrɛmaya ye ko n ni yi-lafɛ bi a kɔɛn rɔ min nafanɛ ata fondo-bɔɛ la. A ko a ye n sɔla sibolo-gbɛrɛ minnu bara, n ni ta yi-lafɛ kɛ la wo bɛɛ warɛ. Anu ni anu min a la.

¹⁶Anu ba anu min a la tumɛ min, anu yɛ la si fin, anu ni to tonko-tankanna iko baantoe. Mari ye kɛlɛ min nanala anu kuma, yi-lafɛ-misalɛ le kɛlɛ wo la.

¹⁷Woletɔ n ya yi-lafɛ bi a kɔɛn rɔ. N tara sibole wo bɛɛ warɛ alako anu ni anu min a la.

¹⁸N ya do di wole, Yerusalɛm kɛnu ma anubɛ Yuda nyamanita-mɔgɛ toenu, a mansa wo, a mɔgɔ-ba wo. N ya wo ma le alako yan kasaranɛ ni to. Mɔgɛnu ba anu tinya-bole mafɛlɛn, anu kuma si tɛgɛ. Wo si a ma, mɔgɛnu ni anu mamɔɛn ka anu tɔgɛ ratɛgɛ dankali-kɛ-tinɛ, ado a ye wo nya na le ha bi.[4]

¹⁹Minnu ya anu min Marita tɔrɔya-yi-lafɛ kɛ la, wo le kɛnu na, Iyipiti mansɛ anubɛ ala mɔgɔ-banu anubɛ nyɔ-kun-tiginu wo, Iyipiti dugurannu anubɛ

²⁰sundannu wo, Yusi nyamanita mansɛnu wo, Filisiti so-tigi minnu bi Asikalɔn wo, Kesa wo, anubɛ Ɛkirɔn soenu, anubɛ Asadadi soe toe min tonɛ wo,

²¹Idɔm mɔgɛnu anubɛ Mohabu mɔgɛnu anubɛ Amon mɔgɛnu wo,

²²Taya so-tigi anubɛ Saidon so-tigi wo, nyamani-tigi minnu bi Mɛdetereniyan kɔgɔ-yila-foolɛ rɔ wo,

²³Didan, Tema, anubɛ Busi so-tiginu wo, mɔgɛ minnu si anu kun-sigi wuruya wo,

²⁴Arebiya nyamanita mansɛnu wo, sibole minnu bi wula-da-rakolɔn, nyɔ-mansɛnu wo,

²⁵Simiri nyamanɛ wo, Ilam nyamanɛ wo, Midiya nyamanɛ wo, nyɔ-mansɛnu wo,

²⁶anubɛ kantɔ-nyamani-mansɛ minnu fɛ-yan wo, minnu fɛ ma yan wo. Sibole minnu bi duninya kɛ rɔ, wo bɛɛ ya Marita tɔrɔya-yi-lafɛ min kɛ la. A laban min ya a min a la, wo le Babilɔn mansɛ la.

²⁷Mari Sɛnbɛ-Bɛɛ-Tigi, Isirɛlata Alla, kɔni, wo ya a fɔ n ye ko n ni a ma, bɛɛ ni a min kɛ la alako bɛɛ yɛ la ni fin ha anu ni teseri. Anu ba bui, anu ti ke anu nasɔla tun ka a tɛgɛ kɛlɛ ma, ale Mari ye min natugula anu damasi kan ma, kɔni.

²⁸A ko ni wo ya wo ban yi-lafɛ bila n bolo ka wo min a la, n ni a fɔ wo ye ko Mari Sɛnbɛ-Bɛɛ-Tigi ko wo sɔnta, wo banta, fɔ wo wa wo min a la le serr!

²⁹A ko a ye ala kasarɛ dabirala ale Mari nyɛrɛta so-karantan Yerusalɛm fɔlɔn ma. Woletɔ wo kana wo miri ko kasarɛ sa nala kɛla wo ma. A ti foo mɔgɔ-wo-mɔgɔ la bawo fɔ duninya-mɔgɛ bɛɛ wa kasarɛ wo sɔrɔn. Mari Sɛnbɛ-Bɛɛ-Tigi kan le kɛ la.

³⁰Mari ko nde, Yɛrɛmaya ni a kuman-kan kɛ bɛɛ rakaran wole, ata mɔgɛnu ye ko ale Mari bɔrɔndɔ-bɔrɔndɔ-kan si bɔ Arinyɛni tɔ. A si san-sɛran nabɔ san-kole kɔma pon! A si bɔrɔndɔ-bɔrɔndɔ ala mɔgɛnu ma. A si yerelen tɛgɛ iko konima-dannu. A si kuma duninya-mɔgɛ bɛɛ ma.

³¹Sɔnkɛ wo si duninya mumɛ bɛɛ bira-a-la wuu! Wo ye mala bawo Mari ye nala sibole bɛɛ tɔrɔla le. A si mɔgɛ bɛɛla fɛɛ yira a la kiti-kɛ-tinɛ. A si wunduyoge bɛɛ halaki pɔ!

³²Mari Sɛnbɛ-Bɛɛ-Tigi ko kasarɛ si to bɔla nyamanɛ do rɔ ka ta nyamanɛ do rɔ. A si ta iko banda-fin-fɔn-bɛ ha ka ke wula-yanna-nyamanɛnu ma duninya bɛɛ rɔ.

³³Wati wo, Mari ara minnu faga a fondo-bɔnɛ la, wonu furi-bolokanɛ si to belenna duninya-tonko-nanɛ bɛɛ rɔ. Mɔgɔ-wo-mɔgɔ ti anu di. Anu togonna ti taran. Anu bolokanɛ si to belenna iko ninki-nyɛ.

³⁴Wole kun-tigi minnu bɛnta ka ma Marita mɔgɛnu kandannɛ la, wo ni sɔnkɔ di-kɛ-tinɛ. Wo ni di ka wo forongbesi gbangban rɔ. Wo ratii-tumɛ ara ke. Anu si wo ratii iko bɔnku-dagɛ wa fɛrɛn dugi la.

³⁵Wo ti buri-kɛ-kila-wo-kila sɔrɔn. Wo ti wo dogon-tinɛ fenfen sɔrɔn.

³⁶N bi wole, kun-tiginu yerelen-tɛgɛ-kan lamɔɛnna. N bi wole, mɔgɔ-banu di-kɛ-kan lamɔɛnna. Wo ye mala le bawo Mari ye wola nyamanɛ kasarɛ kun na.

³⁷Wola ninki de-nyini-tinɛnu bi gbalala. Wo ye mala le bawo Mari fonde ye bɔla dɔgɔma-ma-de!

³⁸Mari ara ala nyamanɛ boloka iko yarɛ wa bɔ faran la dɔnta-nyini-tinɛ a yisi ma. Mari ara wola nyamanɛ bɛɛ tinya a fondo-bɔnɛ la, ado yan bara ma nyamani-makilannɛ la ka a tɛgɛ kɛlɛ ma.