Read Kuranko Yɛrɛmaya 27 Bible Online

Yɛrɛmaya 27 - Kuranko bible

Yɛrɛmaya 27

¹ Sɛdɛkayala den Yosaya mɛ mansɛ la Yuda nyamanɛ kun na, Mari ya a fɔ nde, Yɛrɛmaya ye ko

²n ni kɔlɔma anubɛ gbole do bi ka sara-ninki kanma-kɔlɔma ladan wo la. A ko n ba ban a ladanna, n ni n kan ladon a rɔ yɔliti!

³Wo ya a taran, Idɔm mansɛ wo, Mohabu mansɛ wo, Amon mansɛ wo, Taya mansɛ wo, anubɛ Saidon mansɛ wo, wonu ya anuna mɔgɔ-banu nana Mansa Sɛdɛkaya kɔndɔn tinɛ Yerusalɛm soe burɔ. Mari ya a fɔ n ye ko n ni n sara nyamanɛ kɛnuna mansɛnu na kilayɛ kɛnu bolo.

⁴Isirɛlata Mari Alla Sɛnbɛ-Bɛɛ-Tigi ya a fɔ n ye ko kilayɛ kɛnu ni ta ala kilayɛ latenbi anuna mansɛnu ma ko

⁵a mɔgɔ wo, a sogo wo, a dugu-kolo wo, Mari ko ale le ya wonu nadan a sɛnbɛ-makawanɛ la. A ko mɔgɛ min ba diya ale ye, a ye fan kɛ bɛɛ latenbila wo le ma.

⁶A ko ale le kelen pe ya nyamanɛ kɛ bɛɛ don ala wɔli-kɛla, Babilɔn Mansa Nɛbukanasa bolo. A ko hali bintɔ-sogenu si a kan to a gbɛ rɔ.

⁷Ale mansɛ wo, ala dan wo, a mamanɛ wo, nyamanɛ bɛɛ si mansɛ wonu sako kɛ ha ale fananna nyamanɛ bu-wati ni ke. Wo wati wa ke, ale fananta mɔgɛnu kunyɛ si don mansa-gbɛrɛkɛnu bolo min sɛnbɛ kolo aletɛ ko.

⁸Nde, Yɛrɛmaya ya n sara kilayɛ wonu na ka ta a fɔ anuna mansɛnu ye ko ni nyamanɛ min ma sɔn a kunyɛ ladonna ale Nɛbukanasata kanma-kɔlɔma rɔ, Mari ko a si nyamanɛ wo tɔrɔ kɛlɛ anubɛ kɔnkɔ-fitinɛ anubɛ kirayɛ la. Nɛbukanasa si nyamanɛ wo halaki pɔ!

⁹N ya a fɔ kilayɛ wonu ye ko anu ni n kan natenbi ko anuna mansɛnu kana anu tole sigi foninya-nɛbinu anubɛ bolo-tafɛlɛnnɛnu kan kɔrɔ minnu bi a fɔla ko anu ni anu ban Babilɔn mansɛ la. Ni kiyo-rakarannɛnu kumara anu ye yarɔ-koenu fɔ-tinɛ, ni wo ma, ka yarɔ-koenu fɔ iko furinu denu ya a fɔ anu ye, ni wo ma, ka yarɔ-kumɛnu fɔ kofo-denyɛ rɔ, anu kana anu tole masɔ wo do-wo-do la.

¹⁰Foninya-nɛbi wonu bi anu yanfa-tinɛ le. Wonu si a ma, anu ni ta nyamani-gbɛrɛnu tɔ, ado ale Mari ko a si anu gben ka anu kasara.

¹¹Kɔnɔ a ko ni nyamanɛ fenfen ya a nyɛrɛ latenbi Babilɔn mansɛ ma, Mari ko a si a ma, nyɔ-mɔgɛnu ni to anu halala-nyamanɛ rɔ ka to sɛnɛ sala nyɔ tolon!

¹²Nde, Yɛrɛmaya ya kumɛ kɛ le nyɔgɔn fɔ Mansa Sɛdɛkaya ye Yuda nyamanɛ rɔ. N ya a fɔ a ye ko, “I ni i nyɛrɛ latenbi Mansa Nɛbukanasa ma. Ni wobɛ ila mɔgɛnu wɔlita ale mansɛ anubɛ ala mɔgɛnu ye, wo si to wo niyi la

¹³bawo a ma kin wobɛ ila mɔgɛnu ni faga kɛlɛ anubɛ kɔnkɛ anubɛ kirayɛ bolo. Mari nyɛrɛ le ya a fɔ ko ni nyamanɛ min ma a nyɛrɛ don Babilɔn Mansa Nɛbukanasa bolo, ko sufa kɛnu denu bi sigila wo ma.

¹⁴Foninya-nɛbi minnu bi a fɔla ko i ni murutiya Nɛbukanasa ma, i kana i wɔlɔ matɔlɔ wonu na de! Anu bi i bolo-labira-tinɛ le.

¹⁵Mari nyɛrɛ ko ale ma kunta-kumalɛ kɛnu sɔ mumɛ! A ko anu bi ale Mari da-ragbala-tinɛ le. Woletɔ ile anubɛ nɛbi minnu bi foninyɛ fɔla i ye, a ko ale nyɛrɛ si tugu wo la ka wo faga.”

¹⁶Wo kɔma, nde, Yɛrɛmaya ya a fɔ saraka-masɔlɛnu anubɛ wole fanan ye ko Mari ya kɛ le fɔ. A ko foninya-nɛbinu bi a fɔla ko Babilɔn kɛnu tara Bato-Bon-miran minnu na, wonu ti mɛ nala tun. A ko wo kana wo tole masɔ nɛbi wonu na. A ko anu bi foninya-nɛbiya-kumɛnu denu fɔla wo ye tolon!

¹⁷A ko wo kana wo tole masɔ foninya-nɛbi wonu na mumɛ! A ko wo ni wɔli Babilɔn mansɛ ye alako wo ni to wo niyi la. Hali wo ma ko ladan min si a ma, Yerusalɛm ni kasara.

¹⁸Ni nɛbi-bɛrɛ le anu denu na, ado ale Marita kumɛ le ye anu da rɔ, a ko anu ni ale Alla Sɛnbɛ-Bɛɛ-Tigi madiya alako Bato-Bon-miran-toenu wo, a bolon-miran-toenu wo, a Yerusalɛm fen-kolomɛ toenu wo, wo fenfen kana ta Babilɔn nyamanɛ rɔ.

¹⁹Babilɔn Mansa Nɛbukanasa tara Yahoyakimna den Yuda Mansa Yɛhoyasin na Babilɔn tumɛ min, anubɛ Yuda anubɛ Yerusalɛm mɔgɔ-banu, a ya Bato-Bon-miran donu to a kɔma, anubɛ bolon-miran donu anubɛ Yerusalɛm fen-kolomɛ donu. Wo donu denu bi a sɛnbɛrɛn-kɔnnu wo, a sila-yi-sigi-kunan-wɛ wo, a yi-sigi-kunan sigi-kenkirɛnu wo, anubɛ a Bato-Bon-miran donu, a ya wonu to a kɔma Yerusalɛm.

²²Mari Sɛnbɛ-Bɛɛ-Tigi, Isirɛlata Alla ya kɛ le fɔ Bato-Bon-miran anubɛ bolon-miran kɛnuna ko la minnu tora Yerusalɛm. A ko fɔ kɛ bɛɛ wa ta Babilɔn. A ko anu si to nyɔ ha ale Mari ni ta anu bi-tinɛ. A ko a si sɛgi anu na ka anu sigi anu gba kɔrɛ rɔ tun wo wati rɔ.