Read Kuranko Yɛrɛmaya 28 Bible Online

Yɛrɛmaya 28 - Kuranko bible

Yɛrɛmaya 28

¹ San kelan wo le ma, Sɛdɛkayala mansayɛ san nani nyɔgɛ, kɔni, wo karɛ lolɛ ma, Esurila den Hananaya min bi nɛbiyɛ la ka bɔ Kibiyon nyamanɛ soe do rɔ, wo kumara n ye Bato-Bɔn la. A kumara n ye saraka-masɔlɛnu anubɛ wole, mɔgɛ bɛɛ yala.

²Hananaya ko Mari Sɛnbɛ-Bɛɛ-Tigi, Isirɛlata Alla ko a ara Babilɔn mansɛ latinya.

³A ko Mari ko Nɛbukanasa tara Bato-Bon-miran min bɛɛ la, yanni san fila, ale Mari si sɛgi wonu na.

⁴Nɛbi Hananaya ko Mari si sɛgi Yahoyakimna den Yuda Mansa Yɛhoyasin anubɛ Yuda mɔgɔ-birani-kɔrɛnu na fanan. A ko Mari ko a si ale Babilɔn mansɛ latinya pɔ!

⁵Woletɔ nde, Yɛrɛmaya kumara Hananaya la saraka-masɔlɛnubɛ wole, mɔgɛ bɛɛ yala Bato-Bɔn la.

⁶N ko, “Sobore! Alamɛ Mari ya wo ma. Alamɛ ila wɔlɔyiya-kumɛ mara tonyɛ la. Alamɛ Mari sɛgira Bato-Bon-miran bɛɛ la anu gbɛ rɔ tun. Alamɛ a sɛgira mɔgɔ-birani-kɔrɛnu na anu barɛnu tɔ.

⁷Kɔnɔ n bi min fɔla wobɛ mɔgɛ kɛnu ye, i tole masɔ wo la.

⁸Yanni mabɛ ile Hananaya ni ma nɛbi la tumɛ min, wo ya a taran, nɛbinu bi nyɔ nun. Anu ya a fɔ wɔlɔyiya-kumɛnu tɔ ko kɛlɛ-fitinɛ anubɛ kɔnkɔ-fitinɛ anubɛ kiraya-fitinɛ si na nyamani-siyaman anubɛ nyamani-makawanɛnu tɔ.

⁹Kɔnɔ ni nɛbi nara yisi-kimɛ wara-koe fɔ-tinɛ, ala wɔlɔyiya-kumɛnu ba bɔ-a-la tumɛ min, mɔgɛ si nɛbi wo lɔn Marita nɛbi-bɛrɛ la wo rɔ.”

¹⁰N ban wo fɔla, Hananaya ya sara-ninki kanma-kɔlɔma bɔ n kan ma ka a rakerikeri.

¹¹A ya a fɔ mɔgɛ bɛɛ yala ko Babilɔn Mansa Nɛbukanasala kanma-kɔlɔma min bi anuna ko la, Mari ko a si wo rakerikeri wo nya na le. Ale Hananaya ko Babilɔn Mansa Nɛbukanasa ya kanma-kɔlɔma sa sibole bɛɛ kan ma kɔnɔ a ko Mari ko yanni san fila, a si wo rakeri. Kɛ fɔɛ Hananaya bolo, nde, Yɛrɛmaya bɔra Bato-Bɔn la ka ta n ye.

¹²A ma mɛ wo kɔma, Mari ya a fɔ nde, Yɛrɛmaya ye ko

¹³n ni ta a fɔ Hananaya ye ko ale Hananaya ara sara-ninki kanma-kɔlɔma rakeri kɔnɔ Mari ko a si sara-ninki kanma-kɔlɔma ladan a kurɛ la nɛgɛ la.

¹⁴Ale Mari Sɛnbɛ-Bɛɛ-Tigi, Isirɛlata Alla ko sara-ninki kanma-kɔlɔma min nadannɛ nɛgɛ la, a si wo sa sibolenu kan ma. A ko a ye wo mala le alako bɛɛ si wɔli Nɛbukanasa ye nya min. Anu si ma yɔɔn la a ye. Hali bintɔ-sogenu, wonu si to ale Mansa Nɛbukanasa kɔrɔ.

¹⁵Wo kɔma, nde, Yɛrɛmaya ya a fɔ Hananaya ye ko, “I tole masɔ. Mari ma i sɔ de! I wara a ma, Yuda kɛnu bara la ila foninyɛnu na.

¹⁶Woletɔ Mari ko a ti mɛ tun, a si i firan duninya ma. A ko bawo i wara a ma, mɔgɛnu bara anu kan-kɔ sɔ Mari la min kɛ, i si faga nyina san kɛ la.”

¹⁷Hananaya fagara san wo karɛ wɔrɔnfila nyɔgɛ ma.