Read Kuranko Yɛrɛmaya 34 Bible Online

Yɛrɛmaya 34 - Kuranko bible

Yɛrɛmaya 34

¹ Babilɔn Mansa Nɛbukanasa buira Yerusalɛm soe anubɛ a dafɛ-so-mɛsɛnu ma tumɛ min, sibole min bɛɛ ye mansɛ kɔrɔ, wo damasi ya a dɛnbɛ kɛlɛ rɔ. Mari kumara n ye wo wati le tɔ.

²Isirɛlata Mari Alla ko n ni ta a fɔ Yuda Mansa Sɛdɛkaya ye ko ale Mari si Yerusalɛm soe kunyɛ don Babilɔn mansɛ bolo. Wo si a mintan gburr!

³A ko ale Mansa Sɛdɛkaya ti ke a burila. A yogenu si a bira ka a don Babilɔn mansɛ wo bolo. A ko anubɛ mansɛ wo ya-den filɛ si bɛn ka kuma anu nyɔgɔn na. Wo kɔma, anu si ta a la Babilɔn.

⁴A ko Sɛdɛkaya ni a tole masɔ ale Marila sarakanɛ kan la. A kunyɛ ti to kɛlɛ rɔ.

⁵A ko a si faga a fanbolo. Iko anu ya isɛnti mintan a benbanu saya-koe kuma nya min, anu si isɛnti mintan ale fanan saya-koe kuma wo nya na le. Anu si a di ka a fɔ ko, “E, mala mansɛ ara faga.” Ale Mari kan le kɛ la.

⁶Babilɔn kɛlɛ-dannu buira Yerusalɛm soe ma tumɛ min, nde, Yɛrɛmaya ya sarakanɛ kɛ latenbi ale Mansa Sɛdɛkaya ma wati wo le tɔ. Anu tara bui so-latankani fila ma, Lesi anubɛ Asika. Wonu denu dɔrɔn tonɛ so-latankaniyɛ la Yuda nyamanɛ rɔ.

⁸Mansa Sɛdɛkaya anubɛ Yerusalɛm kɛnu sɔnta ko kelen ma. Anu sɔnta ko bɛɛ ni a ta-nyɔgɛ Hiburu yɔɔn boloka, a keima wo, a musuma wo. A ko mɔgɔ kana a na-kelen-nyɔgɛ Isirɛla mɔgɛ ma yɔɔn la tun. Mɔgɔ-banu anubɛ anuna mɔgɛnu sɔnta yɔɔn-boloka-koe wo ma. Anu ko anu ti wo sufa ma tun. Anu ya anuna yɔɔnnu boloka kɔnɔ tɔ-a-la, anu ya anu miriya yɛlɛma. Anu ya anu nasɛgi yɔɔnyɛ rɔ tun ka a lagbɛlɛya anu kuma. Wo kɔma, Mari Isirɛlata Alla ya sarakanɛ don n bolo

¹³wole, ala mɔgɛnu ye ko a ya wo benbanu bɔ yɔɔnyɛ rɔ Iyipiti tumɛ min, a ya sarama-kan kiri anubɛ wo benbanu tɛma. A ko

¹⁴ san-wɔrɔnfila wo san-wɔrɔnfila, Hiburu mɔgɛ min bara san wɔrɔ bɔ yɔɔnyɛ rɔ, anu ni wo boloka. Kɔnɔ a ko wo benbanu ma anu tole masɔ wo la.

¹⁵A ko wole fanan bara wo miriya yɛlɛma kaka ka a diyana-koe ladan. Wo sɔnta wo na-kelen-nyɔgɛ boloka-koe ma. Wo ya sarama-kan kiri a Bato-Bɔn la Mari nyɛrɛ yala.

¹⁶Wo kɔma, wo ya wo miriya yɛlɛma tun ka a yira ko wo ma ale Mari gbiliya. Wo ara yɔɔn minnu boloka nun iko anu bi nyinina a ma nya min, wo ara wonu bira tun ka a lagbɛlɛya anu kuma.

¹⁷Woletɔ Mari ko wo ara a lafɛya bawo wo ma sɔn wo ta-nyɔgɛ Isirɛla mɔgɛnu boloka-koe ma. A ko ale nyɛrɛ-nyɛrɛ si wo boloka. Wo kɔrɛ ye min na ko ka wo to kɛlɛ anubɛ kirayɛ anubɛ kɔnkɛ bolo la. A ko a ye min sigila wo ma, sibolo-gbɛrɛnu ba wo yen, anu si anu bole sa anu dɛ la.

¹⁸A Yuda mɔgɔ-ba wo, a Yerusalɛm kun-tigi wo, a mansala mɔgɔ-banu wo, a saraka-masɔla wo, a kun-tigi-toenu wo, wonu dama tenbira tura-sɛnsɛnnɛ tɛma sarama-kan-misalayɛ la. Kɔnɔ wole ya sarama-kan wo tinya. Wo ma wo waralɛ latɔnbagaya. Woletɔ a ko a si wole fanan sɛnsɛn iko wo ya turɛ wo sɛnsɛn nya min.

²⁰Wo faga-sɔgɛ ye wo yoge minnu na, a ko a si wo don wonu bolo. Sogenu anubɛ konanu si to wo suyi dɔnna.

²¹Ale Yuda Mansa Sɛdɛkaya anubɛ ala mɔgɔ-banu faga-sɔgɛ ye a yoge Babilɔn kɛlɛ-dan minnu na, a ko a si wonu don wonu bolo. Wonu bara anu fara wo kɛlɛ la, a ko a si wo kunyɛ don wonu bolo.

²²A ko a wa wo kɛlɛ-koe fɔ wo yogenu ye tumɛ min, wonu si ta wo kɛlɛ-tinɛ ka wola soe bira ka a mintan gburr! A ko a si Yuda soenu ma wula-da-rakolɔn la, mɔgɔ sa kan min. Ale Mari kan le kɛ la.