Read Kuranko Yɛrɛmaya 35 Bible Online

Yɛrɛmaya 35 - Kuranko bible

Yɛrɛmaya 35

¹ Yosayala den Yahoyakim ye mansayɛ la Yuda nyamanɛ rɔ tumɛ min, Mari kumara n ye tun.

²A ko n ni ta kuma Rɛkabu kebilɛ ye. N ni anu bi ka ta anu na Bato-Bon-konko do la ka nɔnbɔ-gbɔ-yi di anu ma.

³Woletɔ Habasanayala den n tɔgɔma Yɛrɛmaya, wola den Yeyasanaya, wonubɛ a na-kelen-nyɔgɛnu anubɛ ala dannu, n tara wonu kele. N tara a kebilɛ mumɛ bɛɛ kele.

⁴Wo bɛɛ tara n fɛ Bato-Bɔn la. N tara anu na Ikalayala den Nɛbi Henanna karan-dannuta konko la. Salamula den Meyaseya min bi Bato-Bon-kandan la, wola konko ye matɛ kɔrɔ. Konko wo ye mɔgɔ-ba donutɛ dafɛ.

⁵N ya yi-lafɛnu nafa nɔnbɔ-gbɔ-yi la ka wonu sigi Rɛkabu kebilɛ wonu kɔrɔ. N ko, “Wo ni wo min.”

⁶Anu ko, “Male ti nɔnbɔ-gbɔ-yi-wo-yi min bawo ma benba Rɛkabula den Yonadabu ara a fɔ ma ye nun ko ma kana nɔnbɔ-gbo-yi min mumɛ!

⁷A ya a fɔ ma ye fanan ko ma kana bɔn sɔ. Ma kana sɛnɛ sa. A ko ma kana ki-fan ki. A ko ma ni to fani-bɔnnu na dɛɛ alako ma ni mɛ nyamanɛ kɛ rɔ iko sundan.

⁸Ma ye ma benba Yonadabu kuman-kan bɛɛ latɔnbagayala. Ha bi, male wo, mala musinu wo, mala dannu wo, ma do-wo-do ti nɔnbɔ-gbɔ-yi sɔ ma dɛ la.

⁹Ma ti bon-wo-bon sɔ fani-bɔn kɔma. Nako ti taran ma bolo, ni wo ma, ki-fan. Ma benba Yonadabu ya min bɛɛ fɔ, ma ye wo bɛɛ latɔnbagayala.

¹¹Mansa Nɛbukanasala bui nyamanɛ ma, wo le ya a ma, ma donta Yerusalɛm soe burɔ alako ma ni kanan Babilɔn anubɛ Siriya kɛlɛ-dannuna masibɛ ma. Wo le wara ma sigi Yerusalɛm yan.”

¹²Mari Sɛnbɛ-Bɛɛ-Tigi Isirɛlata Alla ya a fɔ nde, Yɛrɛmaya ye tun ko n ni Yerusalɛm anubɛ Yuda mɔgɛ toenu manyinika ko nfenna anu bi anu banna anu tole masɔla a kan la? Anu sa a sako kɛla.

¹⁴A ko Yonadabu kebilɛ ara anu benba kan bira. Ha bi, anu denu ma nɔnbɔ-gbɔ-yi sɔ anu dɛ la. Kɔnɔ ale Mari ara kuma wole, Isirɛla mɔgɛnu ye. Hali wo, wo tengberenyanɛ.

¹⁵A ko a ara mɛ ala wɔli-kɛlɛnu sɔla wo wara ala nɛbinu, kɔni, alako wo ni wo fara karagbɛlɛyɛ la ka don ko-latelenni-kɛ rɔ. Anu ya wo lasɛgi bɛsi-kɔ-koe ma alako wo ni a laban nyamanɛ kɛ rɔ, a ya min di wobɛ wo benbanu ma, kɔni. Kɔnɔ a ko hali wo, wo ti wo tole masɔ a la ka a kan to a gbɛ rɔ.

¹⁶A ko Yonadabu mamanɛnu bara anu benba kan to a gbɛ rɔ kɔnɔ wole, Isirɛla mɔgɛnu ma sɔn ale Mari kan tola a gbɛ rɔ.

¹⁷Woletɔ ale Mari Sɛnbɛ-Bɛɛ-Tigi Isirɛlata Alla ko a ara kasarɛ min bɛɛ rabɛn wole, Yerusalɛm kɛnu anubɛ Yuda mɔgɛ toenu kan ma, a si wo bɛɛ lana wo kuma. A ko a ye wo mala le bawo a wa kuma, wo ti a kan bira. A wa wo rakele, wo ti a denkun.

¹⁸N ya a fɔ Rɛkabu kebila-mɔgɛ wonu ye ko, “Mari Sɛnbɛ-Bɛɛ-Tigi Isirɛlata Alla ko wo benba Yonadabu ara tɔn min sigi wo ma, wo ara wo balan a kalɛ la min kɛ,

¹⁹a ara lanyiri kiri wo ye ko Yonadabu kebilɛ si to den-keinu sɔrɔnna min si to wɔlɛ kɛla ale Mari ye.”