Read Kuranko Yɛrɛmaya 36 Bible Online

Yɛrɛmaya 36 - Kuranko bible

Yɛrɛmaya 36

¹ Yosayala den Yahoyakim, wola mansayɛ san nani nyɔgɛ ma Yuda nyamanɛ rɔ, Mari ya a fɔ nde, Yɛrɛmaya ye ko

²n ni gbolo-kolonɛ do bi. A ko a ye min fɔla Isirɛla anubɛ Yuda anubɛ sibolo-gbɛrɛnu bara-koe rɔ, n ni wo bɛɛ sɛbɛ gbole wo ma. Ka a bi Mansa Yosayata wati ma, ka a sigi kaka la, a ko a ara min bɛɛ fɔ, n ni wo bɛɛ sɛbɛ.

³A ko tumado, a ara kasarɛ min tabɛn Yuda kɛnu kan ma, ni anu suira wo ma ka anu bɔ anu sɔn-yogomɛ da-kun tɔ, a si anu makoto anu sɔn-yogomɛ anubɛ anu hakɛ la.

⁴Wo le ya a ma, n bara Nɛrayala den Baruki kele. Mari ya min bɛɛ fɔ n ye, a ya wo sɛbɛ gbole wo ma n ye.

⁵Wo kɔma, n ya a fɔ ale Baruki ye ko, “Anu sa sɔnna ko n ni ta Mari Bato-Bɔn la tun.

⁶Mɔgɛnu tenbi sunyɛ rɔ lunyɛ min, n bi a fɛ, i ni ta Bato-Bɔn la. I ni i kuli mayɛlɛ sɛbɛli wo karan tinɛ alako n ya Mari kuman-kan min fɔ a ye, i ya min sɛbɛ, anu ni wo lamɔɛn. Bɛɛ si a kan lamɔɛn kan min, i ni a karan nyɔ. Bɛɛ ni a lamɔɛn katarala Yuda kɛnu ma minnu bi bɔla so-mɛsɛnu tɔ.

⁷Bawo Mari ara anu tagbɛrɛn ata fondo-bɔɛ la, tumado anu si Mari madiya ka anu bɔ anu gbɛ da la.”

⁸Yahoyakimta mansayɛ san loli nyɔgɛ, karɛ kɔnɔntɛ ma Yuda nyamanɛ rɔ, Isirɛla mɔgɛnu ya sunyɛ don ka Marita duwɛ nyini. A Yerusalɛm kɛnu anubɛ a Yuda kɛ toe bɛɛ ladɛnta Bato-Bɔn la ka sunyɛ don. Baruki ya Marita kumɛ wo karan Bato-Bɔn la iko nde, Yɛrɛmaya ya a fɔ a ye nya min. Bɛɛ tole masɔnɛ a la. A sɔra Safanna den Kɛmirayala konko la a karan tinɛ. Ale Kɛmiraya ye mansɛla kɛdi-sɛbɛlɛ la. Konko wo ye Bato-Bon-kata burɔ kantɔ wo don-dɛ dafɛ min tɔgɛ, “Don-Da-Kurɛ.”

¹¹Kɛmirayala den Mɛkaya, Safan mamanɛ, kɔni, Baruki ya Marita kumɛ min karan, a lamɔɛn ale Mɛkaya bolo,

¹²a tara bolɔn la anuna kɛdi-sɛbɛlɛ Ilasama ye wɔlila kan min. Ale Mɛkaya ya a taran, mɔgɔ-ba bɛɛ kundɛnnɛ nyɔ. Sɛmayala den Dalaya anubɛ Akiborila den Ɛlinetan anubɛ Safanla den Kɛmiraya anubɛ Hananayala den Sɛdɛkaya anubɛ mɔgɔ-ba donu bi nyɔ.

¹³Baruki ya min bɛɛ karan mɔgɛnu ye, ale Mɛkaya ya wo bɛɛ rakaran mɔgɔ-ba wonu ye.

¹⁴Mɔgɔ-ba wonu ya Yɛhudi sɔ Baruki kele-tinɛ ko a ni na sɛbɛli-kɛnɛ wo la. (Yɛhudi kɛ, wo fa tɔgɛ le Nɛtanaya. Wo fanan fa tɔgɛ le Sɛlimaya. Sɛlimaya wo fanan fa tɔgɛ le Kusi.) Baruki tara gbolo-sɛbɛnɛ wo la.

¹⁵Anu ko, “I sigi, i ni a karan ma ye.” A ya wo karan anu ye.

¹⁶A ban wo karanna, mɔgɔ-ba wonu miran bɔra anu ma. Anu ya a fɔ Baruki ye ko, “Fɔ ma wa kɛ rakaran mansɛ ye.”

¹⁷Anu ya ale Baruki manyinika ko, “Nfenna i ya kɛ bɛɛ sɛbɛ? Yɛrɛmaya le ya i sɔ kɛ la?”

¹⁸Baruki ko, “Min bɛɛ sɛbɛnɛ gbole kɛ ma, Yɛrɛmaya kan le a bɛɛ la tɛrr!”

¹⁹Wo kɔma, anu ya a fɔ a ye ko, “Wobɛ Yɛrɛmaya ni wo dogon. Mɔgɔ kana wo dogon-tinɛ lɔn.”

²⁰Mɔgɔ-ba wonu ya gbole wo sa kɛdi sɛbɛla Ilasamata konko la. Anu tara wo bɛɛ rakaran mansɛ ye ala tongbɛ la nyɔ.

²¹Wo kɔma, mansɛ ya Yɛhudi sɔ gbole wo bi-tinɛ. A tara a bi Ilasamala konko la ka wo karan mansɛ anubɛ ala mɔgɔ-banu ye minnu kinkinɛ a la nyɔ.

²²Wo bɛnta dafere-kimɛ le ma. Mansɛ siginɛ tɛ fɛ, a ye a gbalala.

²³A wa ban kan-tina-kundi min karanna, mansɛ ni nyɔ tɛgɛ muru-nɛ la ka a labui tɛ rɔ. A banta gbole wo tɛgɛla a la wo nya na le ka a bɛɛ mintan gburr!

²⁴Ale mansɛ anubɛ ala mɔgɔ-banu ya kɛ lamɔɛn min kɛ, anu yisi ma tɔrɔ. Anu ma kilan defan!

²⁵Yanni mansɛ ni a mintan nun, wo ya a taran, Ɛlinetan anubɛ Dilaya anubɛ Kɛmiraya ara mansɛ madiya ko a kana gbole wo mintan kɔnɔ ale mansɛ ma anu denkun defan!

²⁶Wo kɔma, ale mansɛla den Yɛramɛli wo, Asireyɛlila den Sɛraya wo, Abidilila den Sɛlimaya wo, mansɛ ya kɛnu denu sɔ mabɛ Baruki bira-tinɛ. Kɔnɔ Mari ya ma dogon.

²⁷Baruki ya Marita kumɛ min sɛbɛ gbole ma n ye, Mansa Yahoyakim ban gbole wo mintanna, Mari ya a fɔ n ye ko

²⁸n ni ta gbolo-kurɛ bi. A ko min bɛɛ sɛbɛnɛ gbolo-fɔlɔtɛ ma nun, n ni wonu sɛbɛ-kura-kɛ tun.

²⁹Mari ko n ni a fɔ Mansa Yahoyakim ye ko, “I wara gbolo-sɛbɛnɛ mintan, ado ka tenbi wo la, i wara nde, Yɛrɛmaya manyinika n bara a sɛbɛ minna ko la ko Babilɔn mansɛ si nyamanɛ kɛ kasara, a mɔgɔ wo, a kolo-fen wo.”

³⁰Woletɔ Mari ye a fɔla ale Mansa Yahoyakimla ko la ko a ti den-wo-den sɔrɔn min si Mansa Dawuda gbɛ bi hali! A ko anu si a furi lakɛ a rɔ, tele si to a mamintanna, duri si to a kimala suyi rɔ.

³¹Ale mansɛ wo, a kegeyɛ wo, ala mɔgɔ-ba wo, Mari ko a si anu dama tɔrɔ tɛrr ka a tɛgɛ anu hakɛ ma. Ale mansɛ wo, a Yerusalɛm ka wo, anubɛ a Yuda kɛ toe wo, a ko anu do-wo-do ma anu tole masɔ ata kawandili-kan la. Woletɔ a ara kasarɛ min wara-koe fɔ tɛrr, a ye nala wo sigila anu ma.

³²Woletɔ nde, Yɛrɛmaya ya gbole do bi ka a don nna sɛbɛli-kɛlɛ bolo. A ya wo bɛɛ sɛbɛ tɛrr! Wo le ya a ma, min bɛɛ sɛbɛnɛ gbolo-fɔlɔtɛ ma wo, anubɛ n ya min fɔ tɔ-a-la wo, Baruki ya wo bɛɛ sɛbɛ tun.