Read Kuranko Yɛrɛmaya 39 Bible Online

Yɛrɛmaya 39 - Kuranko bible

Yɛrɛmaya 39

¹Sɛdɛkayala mansayɛ san kɔnɔntɔ nyɔgɛ wo karɛ tan nyɔgɛ ma Yuda nyamanɛ kun na, Babilɔn Mansa Nɛbukanasa anubɛ ala kɛlɛ-dan mumɛ nara bui Yerusalɛm soe ma.

²Sɛdɛkayala mansayɛ san tan-ni-kelen-nyɔgɛ wo karɛ nanɛ, a tele kɔnɔntɛ ma, anu ya soe tarɛ keri tele wo le ma.

³(Yerusalɛm birɛ anu bolo, Babilɔn mansɛla mɔgɔ-banu nara anu sigi tarɛ don-dɛ tɛmatɛ dafɛ. Mɔgɔ-ba wo donu denu bi kɛnu na, Nɛragali Sarisa, Samika Nibɔ, Sasakim, anubɛ Nɛragali Sarisa gbɛrɛ.)

⁴A lɔn Mansa Sɛdɛkaya anubɛ ala kɛlɛ-dannu bolo ko anu nɔ-ko sa kɛlɛ rɔ, anu ya anu taya ka tunu suyi rɔ. Anu bɔra mansɛla nakorɔ-kilɛ la. Anu tenbira tarɛ kun-da filɛ latugun-tinɛ don-dɛ la. Anu tara anu burila Yorodan-ba-lɛɛ telen tɔ.

⁵Kɔnɔ Babilɔn kɛlɛ-dannu ya anu sagaran ka ale Mansa Sɛdɛkaya bira gbɛkole do ma Yɛrikɔ soe dafɛ. Anu tara a la Nɛbukanasa wara Ribila soe burɔ Hamati nyamanɛ rɔ. Nɛbukanasa ya a yiliki-koe latɛgɛ nyɔ le.

⁶Ale mansɛ ya ala den-keinu anubɛ Yuda mɔgɔ-banu faga a yala Ribila soe burɔ nyɔ.

⁷Wo kɔma, a ya ale Mansa Sɛdɛkaya yɛ tii pɔ, ka yɔlɔkɛ kɛ a ma alako anu si ta a la anu bolo Babilɔn nya min.

⁸Babilɔn kɛlɛ-dannu ya Yerusalɛm mansɛla bolɔn mintan anubɛ so-burɔ-bɔnnu ka a tarɛ toe keri.

⁹Tɔ-a-la, a mɔgɛ toe minnu tora soe burɔ anubɛ minnu bara kofu a ma, Nɛbukanasala kɛlɛ-den-kunyɛ min tɔgɛ Nɛbusaradan, wo tara anu denu na Babilɔn.

¹⁰Ale kɛlɛ-den-kunyɛ ya fugarɛ donu to Yuda nyamanɛ rɔ. A ya sɛni-sa-tinɛ anubɛ ki-fan donu di anu ma.

¹¹Babilɔn Mansa Nɛbukanasa ya a fɔ ala kɛlɛ-den-kunyɛ Nɛbusaradan ye ko a ni a fɔ ala kɛlɛ-dannu ye ko

¹²anu ni ta nde, Yɛrɛmaya nyini ka n fɛ-bira a kin na! N ba nyini fenfen ma, anu ni wo kɛ n ye. Anu ka ko-yogoma ma n na.

¹³Woletɔ ale kɛlɛ-den-kunyɛ wo, mansɛla mɔgɔ-ba min tɔgɛ Nɛbusasaban wo, anubɛ Nɛragali Sarisa wo, anubɛ mansɛla mɔgɔ-ba toenu wo,

¹⁴wonu ya nde, Yɛrɛmaya labɔ yele la kata burɔ. Anu ya n don Ahaikamna den Kɛdalaya bolo, Safan mamanɛ, kɔni. N bi wo le bolo gbɛ ha n kera n barɛ n fanbolo. N tora nna mɔgɛnu bolo nyɔ.

¹⁵N bi yele la kata burɔ tumɛ min, Mari ara a fɔ n ye ko

¹⁶n ni sarakanɛ kɛ fɔ Ibɛdi-Milɛki Sudan kɛ wo ye. Ale Mari Sɛnbɛ-Bɛɛ-Tigi Isirɛlata Alla ko a si na kasarɛ la soe kɛ kuma iko a ya a fɔ nya min, ta-n-yarɔ ko ma de! Wo wa ma tumɛ min, a ko wo si kɛ ale Ibɛdi-Milɛki nyɛrɛ yala.

¹⁷A ko a kilannɛ mɔgɛ minnu na, a ti a don wonu bolo.

¹⁸Ale Mari ko a si a lamara-nyimɛ-kɛ. Anu ti a faga. A ye wo mala bawo a ara a yigi sa ale Mari rɔ. Ale Mari kan le kɛ la.