Read Kuranko Yɛrɛmaya 40 Bible Online

Yɛrɛmaya 40 - Kuranko bible

Yɛrɛmaya 40

¹Anu bi tala mabɛ Yerusalɛm anubɛ Yuda kɛ toenu na Babilɔn tumɛ min, mansɛla kɛlɛ-den-kunyɛ Nɛbusaradan ya yɔlɔkɛ kɛnɛ yen n ma mɔgɛ kɛnu tɛma. A ya nde boloka Rema soe burɔ, Mari kumara n ye kan min.

²Kɛlɛ-den-kunyɛ wo tara n na n dan na, a ko, “Wota Mari Alla ara a fɔ nun ko kasarɛ si na wola nyamanɛ kɛ ma,

³ado a ya min fɔ, wo le wara bɔ-a-la kɛ la. Kɛ bɛɛ mara le bawo ila mɔgɛnu bara bila ale Mari la ka hakɛ kɛ.

⁴Hali wo, n si yɔlɔkɛ bɔ i bole la bi ka i boloka. Ni a sɔgɛ ye i la ka ta n fɛ Babilɔn, n si i fɛ-bira. Ni ta-sɔgɔ sa i la, tana ma. Nyamanɛ kɛ kan-bo-kan diyara i ye, i si ta nyɔ.”

⁵N ma kuma min kɛ, ale Nɛbusaradan ko, “Sɛgi Ahaikamna den Kɛdalaya wara, Safan mamanɛ, kɔni. Babilɔn mansɛ ara Yuda nyamanɛ kerifa wo le la. Ni a di i ye, i si to wo wara. Ni wo ma, kan-bo-kan diyara i ye, i ni ta nyɔ.” A ban wo fɔla, a ya n masara ka dɔn-fan di n ma, a ko n ni ta n ta-tinɛ.

⁶N tara sigi Kɛdalaya wara Misipa soe burɔ. N tora sigini nyɔ-mɔgɛ toe wonu tɛma, kɛlɛ ma to minnu na.

⁷ Yuda kɛlɛ-den-kunyɛ anubɛ kɛlɛ-dan donu ya anu buri, ado wonu ma sɔn dɛgɛ minna Babilɔn mansɛ ye. Kɛlɛ-maburilɛ wonu ya a lamɔɛn ko fugarɛ minnu ma ta birɛ rɔ Babilɔn, nyɔ-mansɛ ara wonubɛ Yuda nyamanɛ kerifa Kɛdalaya la.

⁸Nɛtanayala den Sumanyila wo, Kareyala dannu Yohenan anubɛ Yonatan wo, Tanhumɛtila den Sɛraya wo, Ifayila dan minnu bɔra Nɛtofa soe burɔ wo, anubɛ Yeyasanaya min bɔra Meyaka soe burɔ wo, wonubɛ anuna kɛlɛ-dannu tara kofu Kɛdalaya ma Misipa soe burɔ.

⁹Kɛdalaya ya a keli anu ye ko, “Wo kana kilan ka dɛgɛ min Babilɔn kɛnu ye. Wo ni wo sigi nyamanɛ kɛ rɔ. Wo ni wɔli Babilɔn mansɛ kɔrɔ. Wo wara-koe si ta a kilɛ fɛ.

¹⁰Nde si to sigini Misipa soe burɔ. Wo ya soe minnu bira, wole si ta sigi wonu tɔ. Babilɔn kɛnu ba na, n si to wo gbɛ rɔ. Wo si to nɔnbɔ-gbɔ-yi ladɛnna anubɛ kɔn-gbɔɛ anubɛ tuli.”

¹¹Isirɛla mɔgɛ minnu bi Mohabu nyamanɛ anubɛ Amon mɔgɛnuna nyamanɛ anubɛ Idɔm mɔgɛnuna nyamanɛ rɔ, anubɛ minnu bi nyamanɛ donu tɔ, wonu dama ya a lamɔɛn ko Babilɔn mansɛ ara sɔn Isirɛla mɔgɛ donu to-koe ma Yuda nyamanɛ rɔ. Anu ya a lamɔɛn fanan ko nyɔ kerifanɛ Kɛdalaya la.

¹²Woletɔ anu bɔra nyamani-gbɛrɛ wonu tɔ kɛlɛ-maburi ya anu nata kan min ka sɛgi anu barɛ. Anu nara anu dantɛgɛ Kɛdalaya ma Misipa soe burɔ. Anu ya minni-fan anubɛ kɔn-gbɔ siyaman nadɛn anu nyɛrɛ ye Yuda nyamanɛ rɔ nyɔ.

¹³Wo kɔma, Yohenan anubɛ kɛlɛ-den-kunyɛ minnu ma dɛgɛ min nun, wonu nara Kɛdalaya taran Misipa soe burɔ.

¹⁴Anu ya a fɔ ale Kɛdalaya ye ko, “I ma a lɔn ko Amonna Mansa Beyalisi ara Sumanyila sɔ i faga-tinɛ le?” Kɔnɔ Kɛdalaya ma la wo la.

¹⁵Woletɔ anu tara anu sɔ anu dan na. Yohenan ya a fɔ ale Kɛdalaya ye ko, “A ma, n ni ta Sumanyila faga. Mɔgɔ-wo-mɔgɔ ti sui n ma. Ma kana sɔn, a ni i faga. Ni a ya i faga, wo si a ma, Yuda kɛ minnu na ara dɛn, wonu ta si nyɛnsɛn, ado anu si kasara.”

¹⁶Kɛdalaya ko, “I kana a faga. I ye min fɔla ala ko rɔ, tonya sa wo rɔ.”