Read Kuranko Yɛrɛmaya 44 Bible Online

Yɛrɛmaya 44 - Kuranko bible

Yɛrɛmaya 44

¹Wole Isirɛla mɔgɛ minnu siginɛ Migidɔli anubɛ Tapanisi anubɛ Mɛmfisi soenu burɔ Iyipiti nyamanɛ rɔ anubɛ minnu bi dugula nyɔ, Mari kumara nde, Yɛrɛmaya ye ka a tɛgɛ wola ko ma.

²Mari Sɛnbɛ-Bɛɛ-Tigi Isirɛlata Alla ko a ara kasarɛ min lana Yerusalɛm anubɛ Yuda soenu ma, a ko wo ara wo rayen, ado ha bi, soe wonu tinyanɛ nyɔ. Mɔgɔ-wo-mɔgɔ sigini sa anu tɔ tun

³bawo wole nyɔ-mɔgɛnu bara ko-yogomɛnu nadan ka ale Mari ladiminya. Wo ya bɛsɛnu kɔ ka isɛnti mintan anu ye nyɔ, ado wole wo, wo benbanu wo, wo fenfen ma duru bɛsɛ wonu kɔla nun.

⁴Mari ko a taranta ala wɔli-kɛla-nɛbinu nanala wo ma ka wo makawandi ko-yogomɛ kɛnu wara-koe ma min gbo a ye ha ka a dan-natenbi.

⁵A ko wo ma wo tole masɔ ka ale Marila kumɛ bira mumɛ! A ko wo ma wo fara wola kisimiriya-bɛsɛ wonu kɔla ka isɛnti mintan anu ye.

⁶Woletɔ a ko a ya a fonde labɔn Yuda soenu anubɛ Yerusalɛm soe burɔ ka soe wonu mintan gburr! Ha bi, soe wonu bi tonbonyɛ la.

⁷Woletɔ ale Mari Sɛnbɛ-Bɛɛ-Tigi Isirɛlata Alla ya wo manyinika ko nfenna wo ye karagbɛlɛya su kɛ sigila wo nyɛrɛ la? Kei wo, musu wo, denni wo, den-pulan wo, wo ye a fɛ ka wo dama kasara, hali mɔgɔ-den-kelen ti to a niyi la, wa?

⁸A ko nfenna wo ye a ladiminyala wola bɛsi-ladannɛnu na ka isɛnti mintan anu ye Iyipiti nyamanɛ kɛ rɔ wo siginɛ kan min? Wo ye wo nyɛrɛ le dɔrɔn tinya-tinɛ. Sibolo-gbɛrɛnu ba wo yen tumɛ min, wonu si nyima worɔ ka wo tɔgɛ ma dankali-kɛ-fan la.

⁹Wo benbanu wo, Yuda mansɛnu anubɛ anuna musinu wo, wolebɛ wola musinu wo, wo ara nyina wola karagbɛlɛya-koenu ko, wa? Wo taranta minnu kun na Yerusalɛm anubɛ Yuda soe nyamanɛ toe rɔ, wo ara nyina wonu ko, wa?

¹⁰Ha bi, wo ma wo famayigi Mari kɔrɔ wɛ, ado ha bi, wo ma ale Mari gbiliya. Ale Mari ya tɔn minnu di wobɛ wo benbanu ma, ha bi, wo ma wonu bira.

¹¹Woletɔ Mari Sɛnbɛ-Bɛɛ-Tigi Isirɛlata Alla ko a si wuli wo kan ma ka wole, Yuda kegeyɛ bɛɛ lato.

¹²Wole Yuda mɔgɛ toe minnu bara Iyipiti sigi-koe latɛgɛ, a ko fɔ a wa a yen, wo damasi ara kasara. A kina wo, a denni wo, wo kunyɛ si to kɛlɛ anubɛ kɔnkɛ bolo Iyipiti nyamanɛ rɔ yan. Mɔgɛnu ba wo yen tumɛ min, anu si anu bole sa anu dɛ la ka kawa. Mɔgɛnu si wo mayɛlɛn ka wo tɔgɛ ma dankali-kɛ-fan la.

¹³Iko kɛlɛ anubɛ kɔnkɛ anubɛ kiraya-fitinɛ ya Yerusalɛm kɛnu tɔrɔ nya min, a ko wole min siginɛ tuinteyɛ ma Iyipiti yan, a ye wo tɔrɔla wo nya na le.

¹⁴Wole Yuda mɔgɛ toe minnu nara sigi Iyipiti yan, wo siyaman ti wo buri ka to wo niyi la. A ko wo fenfen ti wo kɔ-sɛgi wola nyamani-diyamɛ rɔ tun fɔ kɛlɛ-kɔrɔ-burilɛ dori donu.

¹⁵Nba, nyama ladɛnta n fɛ, mɔgɛ min ya a lɔn ko anuna musinu taranta isɛnti mintanna bɛsɛnu ye nun wo, musi minnu bi nyɔ nun wo, Isirɛla mɔgɛ minnu siginɛ Iyipiti dugu la wo, wonu ya a fɔ n ye ko,

¹⁶“I ye min bɛɛ fɔla Mari tɔgɛ rɔ, ma ti ma tole masɔ wo la muk!

¹⁷Ma wa ma dato min na, ma ye wo le mala. Ma benbanu anubɛ mala mansɛnu, anubɛ mala kun-tiginu bi isɛnti mintanna ka minni-sarakɛnu nabon mala bɛsɛ ye min tɔgɛ Arinyɛnɛ Musu-Mansɛ Yerusalɛm soe anubɛ Yuda nyamanɛ toe rɔ. Wonu ya a ma nya min, male fanan bi a mala wo nya na le. Dɔn-fen-siyaman taranta ma bolo nun. Ma ara ma-a-la nun, ado nanparan sa ma ma nun.

¹⁸Kebi ma farata sarakɛnu dila mala bɛsi-musu-mansɛ wo ma, ma wara-koe mara le gbɛ yuliyali! Mala mɔgɛnu kunyɛ tora kɛlɛ anubɛ kɔnkɔ-fitinɛ rɔ.”

¹⁹Wo kɔma, musinu ya a fɔ ko, “Ma ye keki ladanna mala bɛsi-musu-mansɛ wola muninyɛ rɔ tumɛ min ka isɛnti mintan bɛsɛ wo ye ka minni-sarakɛnu di a ma, mala keinu taranta anu bole sigila mala koe wonu kɔrɔ nun.”

²⁰Wo kɔma, minnu ya n yabi wo nya, a musu wo, a kei wo, n ya a fɔ wonu ye ko,

²¹“Wobɛ wo benbanu bi min kun na nun wo, wola mansɛnu anubɛ wola kun-tiginu bi min kun na nun wo, anubɛ minnu bi Yerusalɛm soe anubɛ Yuda nyamanɛ rɔ wo, wole miri ko wo ye isɛnti-mintan-koe min kun na, Mari sa wo kalama, wa? A la ara nyina le, wa?

²²Bi, wola nyamanɛ ye tonbonyɛ le la gbɛ! Mɔgɔ sigini sa a rɔ. Mɔgɛnu ba nyɔ yen, anu si anu bole sa anu dɛ la ka kawa. Anu si wo tɔgɛ ma dankali-kɛ-fan la bawo Mari ti ke a munyuna wola karagbɛlɛya-koe kɛnu kɔrɔ muk!

²³Min bi a tola kasarɛ kɛ ye nala wo ma kaka, bawo wo ye isɛnti mintanna bɛsɛnu ye ka wo kan-kɔ sɔ Marita tɔnnu na. Wo ara bila ale Mari la.”

²⁴N ya a fɔ mɔgɛnu ye katarala musinu ma ko Mari Sɛnbɛ-Bɛɛ-Tigi Isirɛlata Alla kumara wole, Yuda kɛnu ma minnu siginɛ Iyipiti. A ko, “Wobɛ wola musinu bara lanyiri kiri bɛsi-musu-mansɛ ye gben! Wo ya isɛnti mintan ale bɛsɛ wo ye ka minni-sarakɛnu di a ma.” Ado nfan, Mari ko wo ye wola lanyiri wonu da kun tɔ. Nba, wo ni wo raya! A ko wo ni wo sɛbɛ don!

²⁶Mari ara a keli a nyɛrɛ rɔ ka a tɛgɛ wole, Yuda mɔgɛnu ma minnu bi Iyipiti nyamanɛ rɔ yan. Wo ni wo tole masɔ lanyiri wo la. A ko a ti sɔn wo ni a tɔgɛ rakele lanyiri-kiri-tinɛ. Ka a fɔ ko, “A ye mabɛ ma tigi Alla tɛma,” wo ti ma tun!

²⁷A ko a si a ma, wo ti ma-a-la tun! Wo si to kasarɛ rɔ. A ko wo dama si faga. Ni minnu kunyɛ ma to kɛlɛ rɔ, wonu tɔgɛ si to kɔnkɔ-fitinɛ la. Anu dama la si to.

²⁸Wo mɔgɔ-dande si wo buri ka bɔ Iyipiti ka ta Yuda. Wo dande min bi tola, wo si a lɔn ni tonyɛ ye minta kumɛ la, wotɛ wo, Maritɛ wo.

²⁹Mari ko a ye nala wo kasarala nya min, a si wo tamasere yira wo la, a ko fɔ a wa wo tɔrɔ yan serr!

³⁰ Iko a ya Yuda Mansa Sɛdɛkaya don a yoge, Babilɔn Mansa Nɛbukanasa bolo nya min, a faga-sɔgɛ ye wo min na nun, a ko a ye Iyipiti Mansa Hofara donna a yogenu bolo wo nya na le fanan.