Read Kuranko Yɛrɛmaya 47 Bible Online

Yɛrɛmaya 47 - Kuranko bible

Yɛrɛmaya 47

¹ Yanni Iyipiti mansɛ ni Kesa soe bira wati min, Mari kumara nde, Yɛrɛmaya ye Filisitinuna nyamanɛla ko la.

²A ko n ni n yɛ lata kɛlɛ-dannu tɔkɔkɛ ma nala ka bɔ kantɔ-wara la iko gboron-gboronna-yi ye tugula a rɔ nya min. Mɔgɔ ti ke dugi yenna kɛlɛ-dan wonuna siyayɛ bolo. Soenubɛ mɔgɛnu si to anuna sɛnbɛ kɔrɔ. Mɔgɛnu si anu dɛ sa-a-rɔ dɛnbɛn-koe la. Anu dama si di biribiri!

³Anu si soeenu kinta-kan lamɔɛn. Anu si kirindinu ta-kan lamɔɛn. Anu si kirindinu sɔnkɔ-kan namɔɛn. Sɔrɔnbagɛnu ti sɛgi anu kɔma anuna dannu bi-tinɛ. Anu bolenu tafaganɛ kɔlɔbɔ!

⁴Filisitinuna nyamanɛ kasara-wati ara ke. Minnu tora anu niyi la ka Saidon anubɛ Taya kɛnu dɛnbɛ, wonu nato-wati ara ke. Mari ko ale nyɛrɛ si Filisitinu halaki, minnu bɔra Kariti nyamanɛ rɔ, kɔni.

⁵Kinikinɛ si na Kesa so-burɔ-mɔgɛnu ma. Asikilɔn kɛnu ti ke kumala tɔrɔyɛ bolo tun. Filisitinu si to diyi kɛ kun na ha wati nyamintan?

⁶Filisitinu bi gbunyala ko, “E, Marita faan, i si to pelen-pelenna ha tumɛ nyamintan? Don i lɛɛ rɔ ka i sulen nyɔ.”

⁷Kɔnɔ Mari ko, “A si ke a sulenna kama? Wɔlɛ ye a bolo.” Mari ara Asikilɔn anubɛ kɔgɔ-yi dafɛ mɔgɛ toenu kɛlɛ-koe latɛgɛ.