Read Kuranko Yɛrɛmaya 5 Bible Online

Yɛrɛmaya 5 - Kuranko bible

Yɛrɛmaya 5

¹Mari ko nde, Yɛrɛmaya ni to yigi-ni-yɛlɛ kɛla Yerusalɛm soe burɔ. N ni n ya-lakalan nyɔla foolɛ rɔ ka n miri a ma ka mɔgɛnu kundɛn-tinɛ bɛɛ mafɛlɛn. N ni a mafɛlɛn ni mɔgɔ-latelenni kelen bi anu tɔ. N ni mɔgɔ kelen nyini anu tɔ tonyɛ di min ye. Ni n ya wo mɔgɛ yen anu tɔ, Mari ko a si soe kɛ makoto.

²Mɔgɛnu bi anu kelila ale Mari rɔ kɔnɔ a ko a wara-koe sa anu burɔ wo nya na mumɛ!

³Mari, i sa nyinina tonyɛ le ma mɔgɛnu bolo, wa? Hali i ye Yuda kɛnu gbesila, bosɛ bɔrɔ sa anu ye. Hali i ya anu tabunden, anu ti kilɛ bira. Anu tole gbɛlɛyanɛ iko farɛ. Anu ya anu ban sɛgila ile Mari ma.

⁴Kɔnɔ n sigira, n ya n miri. N ko bolo-kolon-gbɛ le mɔgɛ kɛnu na, anu hɛnkili sa. Anu ma Marita ko-ladan-nya lɔn. Alla ye nyinina min ma anu bolo, anu ma wo lɔn.

⁵Woletɔ nde nyɛrɛ si ta Yuda mɔgɔ-banu bara ka anu makawandi. N lanɛ a la ko anu denu ya Marita ko-ladan-nya lɔn. Alla ye nyinina min ma ma bolo, tumado anu ya wo lɔn. Kɔnɔ yaga, mɔgɔ-ba wonu bara anu buri Mari kɔrɔ. Anu bara anubɛ-Mari-tɛma-yili ratɛgɛ gbat!

⁶Wo si a ma, yarɛ do si bɔ firɛ rɔ ka anu faga. Suluki do si bɔ wula-da-rakolɔn rɔ ka anu halaki. Kuli si to a dogonna anuna soenu kɔma ka anu napɛrɛn. Min ba a taran nyɔ, a si wo rafarafara. Kɛ dama ye mala le bawo anu bara hakɛ lawara. Anu bara anu kan-kɔ sɔ Mari la iko siyaman.

⁷Mari ko nde ni ma makoto-kunya fɔ a ye bawo wole, ata mɔgɛnuna ko sa ala ko rɔ tun. Wo dama ara wo gboro bɛsɛnu tɔ Alla ma minnu na. Alla ko a ye wo hayu bɛɛ kasala kɔnɔ hali wo, wo telenni ma a ye. Wo kɛnɛ wo nyɔgɔn kɔma yɛlɛnnuna bɔn la.

⁸Wo manɛ iko musu-koe waranɛ so-kei min tɔ. Bɛɛ kɔnkɔnnɛ a ta-nyɔgɛla musu ma.

⁹Mari ko nfenna a ti mɔgɛnu tɔrɔ kɛla ko la? A ko a ni mɔgɔ-su kɛnu tɔrɔ iko a bɛnta, wo ni tɔrɔ nya min.

¹⁰Mari ko a si a fɔ wole, Yuda mɔgɛnu ye ko wo yogenu ni ta wole, Yuda kɛnu malanfan iko mɔgɛ si ki-fannu malanfan nya min kɔnɔ anu kana wo bɛɛ malanfan de! Anu ni mɔgɛnu faga kelen-kelenyɛ ma iko kɔlɔma-gbendalɛ. Anu ni wo ma bawo Marita ma wole, ata mɔgɛ kɛnu denu na tun.

¹¹Mari ko wole, Isirɛla mɔgɛnu anubɛ Yuda mɔgɛnu ma wo telen a ye. Ale Mari kan le kɛ la.

¹²Wole Marita mɔgɛnu bi a kan masɔsɔla. Wo ye a fɔla ko, “Mari ti ko-wo-ko ma male la. Tɔrɔyɛ ti sigi male la. Male ti kɛlɛ anubɛ kɔnkɛ yen.

¹³Nɛbinu bi fɔnyɔ le bɔla anu da rɔ. Allata kuma sa anu burɔ. Nɛbinu bi magbalama-kumɛ minnu fɔla ma kan ma, alamɛ wo sɛgira anu denu kɔgɔ rɔ.”

¹⁴Woletɔ Mari Sɛnbɛ-Bɛɛ-Tigi ko wole, Yuda mɔgɛnu bi a fɔla ko a sa wo tɔrɔla. Woletɔ a ko a ye kumɛ minnu donna nde, Yɛrɛmaya da rɔ, wonu bi mala le iko tɛ, ado wo le manɛ iko tɛ siginɛ sɔgɔ-kundi min na.

¹⁵Wole Isirɛla mɔgɛnu,[2] Mari ko wo ni wo tole masɔ. A ti mɛ tun, nyamanɛ do si na wo tɔrɔ-tinɛ ka bɔ wula-yan la. A ko nyamani-kɔrɔkɔrɛ do le wo la. Mɔgɛ wonu bi kumɛ min fɔla, wo ti wonu kan ragbɛ. Wo ti ke anu kuli ragbɛla.

¹⁶Kaburu-soe le anuna kalabɛn-bɔrɛ la wo ye. Kɛlɛ-nyana le anuna kɛlɛ-dannu na.

¹⁷Anu si wola fui-fannu anubɛ wola dɔn-fannu ban fegba! Anu si wola dannu dɔn sa! Anu si wola kolo-fannu nato dogbe! Anu si wola ki-fan bɛɛ dɔn tɛrr! Wo lanɛ wola so-latankanɛ minnu na, anu si wonu takerikeri.

¹⁸Mari ko hali wo, wo la ti to wo wati rɔ.

¹⁹Wole Yuda mɔgɛnu si to nyinikalɛnu kɛla ko nfenna wota Mari Alla ye karagbɛlɛya-su kɛ sigila wo ma. Mari ko nde, Yɛrɛmaya ni wo yabi ko a ye wo mala le bawo wo ara ale Mari boloka ka sibolo-gbɛrɛnuna bɛsɛnu kɔ wo halala-nyamanɛ rɔ. Woletɔ wo si wɔli sibolo-gbɛrɛnu ye nyamanɛ do rɔ, wo halala ma min na.

²⁰Mari ko nde, Yɛrɛmaya ni kilayɛ kɛ lake wole, Yakoba kegeyɛnu ma, Yuda nyamanita-mɔgɛnu, kɔni, ko

²¹ wole hɛnkilibɔnɛ kun-takolɔnnu, yɛ ye wo bolo kɔnɔ wo ti fen yen. Tole ye wo bolo kɔnɔ wo ti ko lamɔɛn.

²² Mari le ale la. Nfenna wo sa kilanna a la? Nfenna wo sa yɛrɛyɛrɛnna a kɔrɔ? Ale le ya kɔgɔ-yi-dan ma kɛnkɛn la alako yi ni to a dagɛ rɔ tolon! Hali a ye tugula a rɔ nya-wo-nya, a ti tenbi a dan kun na. Hali a ye kurunna, a ti a dan keri.

²³Kɔnɔ a ko wo tole anubɛ wo yisi gbɛlɛ, wo ara wo kan-kɔ sɔ a la ka ta kudai!

²⁴Wo sa a fɔla wo nyɔgɔn ye ko, “Ma ni kilan mata Mari Alla la wona. Ale le ye bandɛ lanala ma ye a tumɛ rɔ. Ale le ye a mala, ma ye mala fui-fannu tɛgɛla a tumɛ rɔ.”

²⁵Mari ko wo sɔn-yogomɛ anubɛ wo hakɛnu denu bara a ma, fen sa mala-a-la wo bolo.

²⁶Karagbɛlɛ minnu bi wole, ala mɔgɛnu tɛma, wonu bi mɔgɛnu manɛgɛnna ka anu bira iko donso-keminɛ ye kona manɛgɛnna nya min ka a bira.

²⁷Iko sansan lafanɛ sisinu na nya min, ka a tɛgɛ anuna yanfanteyɛ la, karagbɛlɛ kɛnu bara anuna bɔnnu nafa kankanya-fannu na wo nya na le. A bɛɛ ara ma-a-la kankanya-fan le tɔ.

²⁸Woletɔ anu bara kunbaya dɔn-fen-diyamɛ bolo. Tɛtɛgɛ-wo-tɛtɛgɛ sa anuna ko-yogoma-kɛ la. Kelennɛnuna hina sa anu tɔ. Anu ti sɔn bolo-kolɔnnuna tonyɛ dila anu ma.

²⁹Kɔnɔ ale Mari ko a si karagbɛlɛ wonu tɔrɔ kɛnuna ko la. Mari ko fɔ a wa mɔgɛ kɛnu tayili sara.

³⁰Kabana-koe anubɛ tɛrɛna-koenu bara kɛ nyamanɛ kɛ rɔ.

³¹Nɛbinu sa fenfen fɔla foninyɛ kɔma. Saraka-masɔlɛnu bi anu nyɛrɛta fanka le lawɔlila, ado wole, Mari nyɛrɛta mɔgɛnu diyana-koe le wo la. Kɔnɔ kɛ damasi laban si ma wo bolo nfen na?