Read Kuranko Yɛrɛmaya 9 Bible Online

Yɛrɛmaya 9 - Kuranko bible

Yɛrɛmaya 9

¹Alamɛ n kunyɛ mara iko tenke woletɔ n ya-denkɛ ra ti gbala. Ka a tɛgɛ nna mɔgɛnuna sayɛ ma, n bi diyi le kun na su-ni-tele.

²Alako bon-nɛ taranta n bolo wulɛ rɔ nun, n si to n dan na kan min. Ni wo mara, n si ke bɔla le wole, nta mɔgɛnu tɛma worɔ. N si n masɛgi wo la worɔ. N bi wo mala bawo wo do-wo-do ma telen Alla ye. Wo dama ara wo kan-kɔ sɔ Mari la.

³Mari ko wo dɛ ye kumɛ filila mɔgɛ ma iko kalɛ. Foninyɛ ye gbanna wo dɛ rɔ iko kalabɛn. Sɛnbɛ ye foninyɛ bolo nyamanɛ rɔ ka tenbi tonyɛ la. Wo tenbi wo kian bɔla ko-yogoma-kɛ rɔ, wo ye wo kian bilala dogbɛrɛ tɔ. Mari ko wo ma a lɔn min bi ale la.

⁴Bɛɛ ni a ma a fɛrɛma a diyana-mɔgɔ wara la. Hali i na-kelen-nyɔgɔ bɛrɛbɛrɛ le, i kana la a la. Bɛɛ ye a na-kelen-nyɔgɛ yanfala iko wo benba Yakoba. Bɛɛ ye tɔgɛ sala a diyana-mɔgɛ la.

⁵Bɛɛ ye foninyɛ fɔla a diyana-mɔgɛ kan ma. Tonya-fɔla fenfen sa anu tɔ. Wole Yuda kɛnu bi wo nagan nadurula foninya-fɔɛ ma. Hakɛ ara wo rafaga kɔlɔbɔ!

⁶Mari ko nde, Yɛrɛmaya siginɛ yanfanteyɛ tɛma. Foninyɛ tugunnɛ ye tala anu nyɔgɔn na. Mari ko wo ara wo ban a lɔn-koe ma.

⁷Woletɔ Mari Sɛnbɛ-Bɛɛ-Tigi ko a si wole, Yuda kɛnu nakɔrɔsi iko mɔgɛ si nɛgɛ lakɔrɔsi tɛ la nya min. A ko wole, ata mɔgɛnu bara ko-yogomɛ ma min kɛ, a si nfen ma wo la?

⁸Wo nagan manɛ kalabɛn-nasulennɛ la. Wo dɛ ye foninyɛ fɔla tolon! Wo bɛɛ ye a da le le fɔla a sigi-nyɔgɛ ye kɔnɔ wo burɛ ye wo burɛ la. Yaga, wo ye ko-yogomɛ sigi-koe rɔ wo ta-nyɔgɛnu ma!

⁹Mari ko a ti wo tɔrɔ wola ko la, wa? A ko a bɛnta, wo ni tɔrɔyɛ min sɔrɔn, a kana wonu sigi wo ma, wa? Ale Mari kan le kɛ la.

¹⁰Nde, Yɛrɛmaya si di biribiri kɔnkɛnuna ko la. N si saya-sigi sa dugu-da-rakolɔnla ko la. Wola wɔli-kɛ-tinɛnu bara tinya. Hali mɔgɛ, a sa tenbila nyɔ. Hali ninki kan la sa mɔɛnna nyɔ. Konanu bara anu gban ka ta pon! Sogo bɛɛ ara tunu nyɔ yen!

¹¹Mari ko a si Yerusalɛm soe ma iko sundu-kunyɛ. Nyɔ si ma fira-wulinu barɛ la. A ko a si soenu bunden Yuda nyamanɛ rɔ ha mɔgɔ ti sigi nyɔ tun.

¹²N ya nyinikalɛ kɛ, n ko nfenna wɔli-kɛ-tinɛnu tinyanɛ? Nfenna nyɔ ara ma iko wula-da-rakolɔn, mɔgɛ ti tenbi kan min? Hɛnkilimɛ mintan si ke koe kɛnu kɔrɛ nya-yenna? Marita karan-dan yon si ke a miriyɛ kɛ rakaranna?

¹³Mari ya nna nyinikalɛnu yabi. A ko wo bɛɛ ara ma bawo wole, Yuda kɛnu bara wo ban ala karan ma. Wo sa sɔnna ata tɔn birala. Ale ye min fɔla, wo sa sɔnna wonu birala.

¹⁴Yanni wo ni wo ma, fɔ wo ya wo tole gbɛlɛya min kɛ ka bɛsi Beyali kɔ, ado wo benbanu denu ya wo karan wo ma.

¹⁵Nba, Mari Sɛnbɛ-Bɛɛ-Tigi, Isirɛlata Alla ko a ti mɛ tun, wole Yuda kɛnu ni dɔn-fen-kunanɛ dɔn ka wo min dawara-yi la.

¹⁶A ko a si wo ranyɛnsɛn ka wo basan sibolo-gbɛrɛnu na pirikali! Wo si taran sibolo-gbɛrɛnu tɛma, hali wo benbanu ma minnu lɔn. A ko a si wo yogenu natugu wo kan ma ha wo damasi ni ban fagala.

¹⁷Mari Sɛnbɛ-Bɛɛ-Tigi kan le kɛ la. A ko wo ni wo miri koe kɛnu ma. Mamusi minnu kusan saya-sigi sala a nya-bɛrɛbɛrɛ ma, a ko wo ta wonu denu kele.

¹⁸Wonu burumatoe ni na tiriya ka diyi-kɛ dabira anu sɛbɛ-kuna-wɛ la. Wo si a ma, wo ya-yi ni wo ya-denkɛ lafa. Wo ya-yi si yigi iko bɛ.

¹⁹Mɔgɛnu bi worondo-kan lamɔɛnna Yerusalɛm soe burɔ. Anu bi a fɔla ko, “Ma ara halaki pɔ! Ma ara miliya dɔgɔma-ma-de! Fɔ ma ni mala nyamanɛ kɛ boloka le bawo mala bɔnnu bara tii mɛmɛ!”

²⁰Nde, Yɛrɛmaya ya a fɔ wole, Yuda nyamanita musinu ye ko wo ni wo tole masɔ Marita kumɛ la. Wo ni wo tole laka ka ale Mari kan lamɔɛn. Wo ni wola dunmusinu nabila yerelen-tɛgɛ-bole ma. Wo ni wo nyɔgɔn karan mamusi-sigi la.

²¹Sayɛ ara don wundan la. A ara don mala so-latankanɛnu tɔ. Mala dan minnu bi tolonna luyinu ma, sayɛ ara ban wonu matɔnbɔnna ma kɔrɔ. Keminɛ minnu bi kundɛnna barɛnu tɔ, ale sayɛ ara ta wonu na pon!

²²Mari ko n ni a fɔ wo ye ko furinu bolokanɛ ye tala iko ninki-nyɛ. Anu bolokanɛ ye tala gbɛ ma iko fui-fen-tɛgɛlɛ ye bolofɛ tola a kɔma nya min. A madɛnna fenfen ti taran.

²³Mari ko hɛnkilimɛ kana a nyɛrɛ matɔgɔ ala hɛnkilimayɛla ko la. Fanka-tigi kana a nyɛrɛ matɔgɔ ala fankalamayɛla ko la. Nɔnfulu-tigi kana a nyɛrɛ matɔgɔ ala nɔnfulu-tigiyɛla ko la.

²⁴ Ni nyɛrɛ-matɔgɔ-sɔgɛ ye min na, wo tigi ni a fɔ ko ale le ya ale Mari lɔn a kila-bɛrɛbɛrɛ fɛ. A ni a diya-a-la ko ale Mari le ata Mari la. A ni a diya-a-la ko Marita keninteyɛ kolo, ado a telenta. A ni a diya-a-la ko Mari ye ko-telennɛ le mala dugu-kole kuma. Mari ko matɔgɔ-sufa wo le ye a diya donna ale rɔ. Mari kan le kɛ la.

²⁵A Iyipiti kɛ wo, a Yuda kɛ wo, a Idɔm kɛ wo, a Amon wo, a Mohabu wo, a wularɔ-mɔgɛ minnu bi anu kun-sigi wuruyala wo, Mari ko wati ye nala, a si anu tɔrɔ. Anu bara kemininya nun kɔnɔ sarama-kan min kirinɛ wolela ko la, anu denu sa wo birala. Mɔgɛ kɛnu wo, Isirɛla mɔgɛnu wo, Mari ko a si wo tɔrɔ wo nyɔgɔn fɛ bawo wo do-wo-do sa sarama-kan wo latɔnbagayala.