Read Kuranko Nimisa Koe 1 Bible Online

Nimisa Koe 1 - Kuranko bible

Nimisa Koe 1

¹Fɔlɔ nun, Yerusalɛm soe lafanɛ mɔgɛnu na penpen, kɔnɔ kaka, a ra ara kolonya filili! A ara ma iko kɛɛ-musi min bi a diya nun kɔrɔma la. Ale Yerusalɛm min mani de nun iko mansa-tɔgɔlamɛla musi kɔnɔ kaka, a ara ma iko yɔɔn-bolo-kolɔn.

²A ye kila dila min kɛ kudu, woletɔ a ya-denkɛ rakimanɛ a ya-yi bolo. Mɔgɔ-den-kelen sa tun ala kemini-kɔrɛnu tɔ minnu si a madiya alako a ni a rade. A diyana-mɔgɛnu bara anu kan-kɔ sɔ a la ka ma a yoge la.

³Yuda nyamanita-mɔgɛnu bara don yɔɔnyɛ min tɔ, wo yogo. Anu yogenu ya anu bira ka ta anu nyɛnsɛn sibolo-gbɛrɛkɛnu tɛma wula-yan la, anu ma lafɛrɛ-kunya sɔrɔn. Anu sagarannɛnu ya anu bira, ado anu bɔ-kunya sa wonu bolo.

⁴Kilɛnu bi dila bawo mɔgɔ-wo-mɔgɔ sa na tina batoli-kɛ-tinɛ Bato-Bɔn la tun. Mɔgɔ-wo-mɔgɔ sa a yɛ masala Bato-Bɔn don-dɛnu ma tun. Woletɔ saraka-masɔlɛnu bi dila anu sigi soenu tɔ. Sunkurɔn minnu bi sigi sala Bato-Bɔn la nun, wonu tɔrɔni kati! Soe ye tɔrɔya-belebele le tɔ.

⁵Yerusalɛm yogenu bara ma anu tiginu na. A bira-koe ma gbɛlɛya a yogenu bolo lefan! Mari ara ale Yerusalɛm tɔrɔ bawo a ara hakɛ dan-natenbi. A yogenu bara ala dan bɛɛ bira ka ta wonu na pon!

⁶Fen-kinyɛ min bɛɛ ye Yerusalɛm soe burɔ nun, wo bɛɛ ara ta. A kun-tiginu manɛ iko mina tenbi magala a rɔ kɔnkɛ bolo. A ti ke a burila tun donso-keminɛ kɔrɔ.

⁷Mɔgɛ minnu sigi-tina-kɔrɛ ye Yerusalɛm na, wonu bi anu mirila Yerusalɛm sɔ-kinya-kɔrɛ ma. Yerusalɛm yogenu ya a nɔ tumɛ min, sibolo-gbɛrɛ fenfen sa nyɔ min si a dɛnbɛ. A yogenu ya a mayɛlɛnnɛ yen min kɛ, anu tora a mayɛlɛnna.

⁸Yerusalɛm soe ara a nyɛrɛ latinya bawo a ara hakɛ-yogomɛ kɛ. A gbiliyanɛ minnu bolo nun, wonu ya a magboya bawo anu bara a lakolɔn yen. Ale fanan bi dila a yakɔrɛ dogonna miliyɛ bolo.

⁹Ala sɛninyabɛlitayɛ wo mani de iko musi min wulita ala kurɛ ratinyana kɔnɔ a ma a miri nun ko a si a laban wo nya na. A labui-koe ya mɔgɛnu tɛrɛna. Mɔgɔ-den-kelen sa nyɔ min si a madiya. A ye dila ko, “E, Mari, i wara n nɔ-nya yen n yogenu bolo, wa? N dɛnbɛ.”

¹⁰Alla ara a fɔ Alla-lɔnbɛlɛ minnu ma ko anu kana don Bato-Bɔn la, Yerusalɛm kɛnu ya wonu yen donna nyɔ. Fen-kolomɛ minnu bi Bato-Bɔn la, Yerusalɛm yogenu bara ta wo bɛɛ la.

¹¹Yerusalɛm kɛnu bi kurunna dɔnta-nyini-tinɛ. Anu bi anuna fen-kolomɛnu felenna dɔn-fan la alako anu kana na faga kɔnkɛ bolo. Anu bi a fɔla ko, “E, Mari, i kolan lana, i ni ma yarabi-nya yen.”

¹²Yerusalɛm soe ya a fɔ ko, “Wole minnu bi tenbi-tenbila, wola ko sa nna ko rɔ. Ha bi, wo ara mɔgɛ yen tɔrɔla mintɛ tenbira ndetɛ la, wa? Mari diminyara n ma lunyɛ min, a ya tɔrɔyɛ sigi n ma wulɔn le.

¹³“Alla ara fɛrɛma-kaliyɛ ladon n fɛrɛ rɔ iko tɛ. Mari ara gbɛrɛ lasigi n ye alako a si n nabui nya min. Wo kɔma, a ya a kɔɛn bɔ n tɔ ka mabɛ duma-belebele to sigini.

¹⁴“Mari ara n hakɛ bɛɛ ladɛn ka anu kiri anu nyɔgɔn ma. A ban, a ya wonu kiri n kan ma. A ya wo ma min kɛ, n tafagara kuluba! N Tigi Mari ya a ma, n yogenu ya n nɔ. Wo wati ya n taran, n ti ke anu kɛlɛla mumɛ!

¹⁵“N Tigi Mari ma nna kɛlɛ-kurugbɛnu lɔn fenfen na. A ya kɛlɛ-dan donu nana nta kemini-mɛsɛnu kan ma. Alla ara nna mɔgɛnu taburun sagbayi!

¹⁶“Wo le wara a ma, n ya-denkɛ ra sa gbalala tun. N madiya-mɔgɔ-wo-m͔ɔgɔ sa nyɔ. N kɔntɔ-diya-mɔgɔ sa tun. Nna mɔgɛ bɛɛ ara ma fugarɛ la bawo ma yogenu bara ma nɔ.

¹⁷“Nde, Yerusalɛm bole rasiginɛ iko tarali-kɛlɛ kɔnɔ n denkunna mumɛ sa. Nyamanɛ min bɛɛsi ye nna foolɛ rɔ, Mari ara a fɔ wonu ye ko anu ni n kɛlɛ. Anu bi n bira boloko-yogomɛ-kɛla iko fen-kɔsɔni-kɔnkɔn.

¹⁸“Kɔnɔ kɛ dama rɔ, Mari ye a yoe rɔ bawo n bara ata kuman-kan tinya. Duninya-mɔgɛ bɛɛ ni a tole masɔ n na. Wo ma n tɔrɔ-bole yen? Ma yogenu bara ma fonike bɛɛ bira ka ta anu na nyamani-gbɛrɛnu tɔ.

¹⁹“N ya n kenintenu kele n dɛnbɛn-koe rɔ kɔnɔ anu ya anu ban n bolo gbat! Nna saraka-masɔlɛnu anubɛ kun-tiginu bi fagala kɔnkɛ bolo. Anu bi anu niyi lakandanna fen-nyini-tinɛ kɔnɔ anu ti ke a sɔrɔnna.

²⁰“E, Mari, i ma a yen, n niyi ra ara gbɛrɛn n ma. N yisi ara tinya ka a tɛgɛ nta murutiyɛla ko ma. N yogenu ya nna dannu faga luyi ma. Fenfen sa bɔnnu na fanan fɔ sayɛ.

²¹“E, Mari, i wɔlɔ matɔlɔ n kurun kan la. Mɔgɔ sa min si n madiya alako n ni fara di-kɛ la. N yoge bɛɛ ara sewa ka a tɛgɛ nna kasarɛla ko ma. I ya n yili-madiya tele min tɔ, wo tele ni na alako n yogenu ni tɔrɔ iko nde tɔrɔyanɛ nya min.

²²“I ban n yogenu na ka anu halaki ka a tɛgɛ anuna karagbɛlɛyɛ ma anu bara min sigi n na. I ni anu tɔrɔ iko i ya n tɔrɔ nya min. N bi kɛ damasi fɔla tumɛ min, n bi kurunna yisi-tinya bolo.”