Read Kuranko Nimisa Koe 4 Bible Online

Nimisa Koe 4 - Kuranko bible

Nimisa Koe 4

¹Mala sɛnɛ min bi malan-malanna nun, wo ara tinya. Mala Bato-Bon-sɛnima-kurinu ta ara nyɛnsɛn Yerusalɛm lu-kole bɛɛ ma.

²Mala keminɛnu gbili ma ma iko sɛnɛ-hakikɛ gbili nya min, kɔnɔ anu mani de mɔgɛnu yala kaka iko bɔnku-dagɛ.

³Hali suluki, a si ala dan susun kɔnɔ Yerusalɛm denbɛnu ma kinyɛ di anuna dannu ma iko selekona min si a kɛwɔli-bolokanɛ to ka ta a ye.

⁴Ka a tɛgɛ kan-nagbalɛ ma, wola dannu nagan si gbaran anu naganagannu na. Hali anuna dannu bi anu tarala kɔnɔ anu ti anu kɔ bawo dɔn-fen-koe ma anu tabɔ.

⁵Minnu bi dɔn-fen-diyama-su bɛɛ dɔnna fɔlɔ nun, wonu bolokanɛ kila-kole la kɔnkɛ bolo. Hali fen-tiginuna-dannu, wonu bi dugu-matɔnbɔnna kaka.

⁶ Nta mɔgɛnuna tɔrɔyɛ ara tenbi Sɔdɔm soetɛ la. Alla nyɛrɛ le ya soe wo halaki tiriya, mɔgɔ ma de!

⁷Mala keminɛ minnu yabɔnɛ nun kun-tigiyɛla ko la, wonu kin dɔgɔma-ma-de! Anu kolo gbɛlɛ, ado anu kɛndɛ ken!

⁸Kɔnɔ kaka, anu yakɔrɛ rafinni-bolokanɛ belenna soe burɔ sayɛ bolo. Anu kankalinya.

⁹Minnu kunyɛ tora kɛlɛ rɔ, wonu fisa kɔnkɛla mɔgɔ-faganɛ kɛnu ko. Minnu niyi ma bɔ yona, a gbɛlɛyara wonu kuma.

¹⁰ Kɔnkɛ ye nna mɔgɛnu fagala wati min, hali musi min kinikinite, wonu ya anuna dannu te ka anu dɔn sa!

¹¹Mari ya ata diminyɛ bɛɛ labɔ ma kan ma. A ya tɛ tugu Yerusalɛm soe la ka a mintan gburr!

¹²Duninya-mɔgɛnu anubɛ anuna mansɛnu ma a lɔn nun ko ma yogenu si anu kunyɛ ladon Yerusalɛm soe burɔ nun.

¹³Kɔnɔ mala saraka-masɔlɛnu anubɛ mala nɛbinu bara hakɛ kɛ min kɛ, woletɔ ma yogenu donta a burɔ. Minnu ma ko tinya, anu denu ya a ma, wonu bara faga fu!

¹⁴Kaka, anu bi anu bole mɛmɛla soe burɔ iko fiyɔnnu. Anuna durukinu tatinyanta mɔgɔ-yele la ha a ma di mɔgɔ-wo-mɔgɔ ye anu ni anu bole bila saraka-masɔlɛ wonu tɔ.

¹⁵Mɔgɛnu bi anu masɛgila anu na. Anu bi a fɔla ko, “Wo kɔsɔnɛ. Wo kana tugu ma la.” Woletɔ anu ya anu bɔ Yerusalɛm soe burɔ ka to yilan-yilanna sibolo-gbɛrɛnu tɛma minnu fanan ya a fɔ ko, “Wo ni wo bɔ mala nyamanɛ rɔ.”

¹⁶Marila ko sa mala saraka-masɔlɛnu bara-koe rɔ tun bawo ale le nyɛrɛ-nyɛrɛ ya gbunsan bila anu tɔ. A ma anubɛ mala mɔgɔ-banu gbiliya nun.

¹⁷Ma ya ma yɛ lakalan ma dɛnbɛn-koe ma furr, kɔnɔ ma ma a sɔrɔn. Ma mɛra makɔnɛ kɛla. Ma ko, “Tumado sibolo-gbɛrɛ do si na ma dɛnbɛ” kɔnɔ ko-wo-ko ma bɔ wo rɔ.

¹⁸Ma yogenu bi ma lapɛrɛnna ha ma ti ke ma kunyɛ labɔla luyi ma tun. Tele-dande le tonɛ gbɛ ma niyila ko la.

¹⁹Ma yogenu yigira ma kan ma iko tanbakɔrɔmanɛ si bɔ san ma nya na fii! Anu ya ma sagaran kɔnkɛnu tɛma. Anu ya ma latɛrɛna wulɛ rɔ ka ma bira.

²⁰Mari ara mata mansɛ min yabɔ, ma yogenu ya wo bira anuta gbɛrɛ rɔ, ado ma niyi-kunyɛ le wo la. Ma lara wo le la ko a si ma latanka ma yogenu ma.

²¹Wole, ma yoge Idɔm minnu siginɛ Yusi nyamanɛnu tɔ, wo ni wo yɛlɛn bawo a ti mɛ tun tɔn si sigi wola yɛlan wo la. Wota kasarɛ ye nala wo ma. Wola ko-yogomɛnu si bɔ gbɛ ma. Wo gbu-makolɔn si to miliyɛ bolo.

²²Yerusalɛm kɛnuta tɔrɔyɛ dan na ara tenbi. Mari ti sɔn anu ni ta biralɛ rɔ tun. Kɔnɔ lunyɛ do, a si wole Idɔm kɛnu tɔrɔ ka wo hakɛ labɔ gbɛ rɔ.