Read Kuranko Isikiyɛli 1 Bible Online

Isikiyɛli 1 - Kuranko bible

Isikiyɛli 1

¹ Nde, Busila den Saraka-Masɔla Isikiyɛli siginɛ Yahudiya-biranɛnu tɛma Babilɔn nyamanɛ rɔ Kiba bɛ fɛ. N sɔrɔn-san bi-sawɛ,[1] karɛ nani nyɔgɛ, tele loli nyɔgɛ ma, ko-rayirɛ kɛra n ye. San-kole dɛ lakara, n ya Allata ko-rayirɛ yen. (Mansa Yɛhoyasin, wo birɛ san loli nyɔgɛ ma, kɛ mara wulɔn le!) N bi Kiba bɛ fɛ Babilɔn nyamanɛ rɔ tumɛ min, Mari kumara n ye, ado n ya ata Sɛnbɛ sɔrɔn.

⁴N ya banda-fin-fɔn-bɛ yen nala bɔla kantɔ-wara la. N ya san yen a nyin masɔgɔla balubalu! Banda-nyin-masɔgɛ wo tɛmɛ, nyɔ-silɛ ye tiila a ma.

⁵ N ya nima-fen nani sɔni yen wo tɛma iko hadama-dan

⁶kɔnɔ a bɛɛ kunyɛ lafoonɛ yakɔrɔ nani-nani na, anu kanban fanan nani-nani.

⁷Anu kiannu natelennɛ iko hadama-dantɛ kɔnɔ anu kin-tore ye a ma. Anu tore wo ye malan-malanna iko sila-yesinɛ.

⁸Wo kɔma, n ya hadama-den-bole yen kanban nani-nanɛ wonu kɔrɔ.

⁹Nima-fan kɛnu kanban fila-filɛnu tafulennɛ. Min sanɛ wo kuma, a mininɛ anu bolo, anu kanban wonu tugunnɛ tala anu nyɔgɔn na. Anu ba wuli tala kan-bo-kan, anu bi tala wo nya na le yɔrɔtɔtɔ! Tintan-gbɛrɛkɛ sa anu ma.

¹⁰ Anu yakɔrɔ nanɛ kɛnu, anu yarɔtɛ, hadama-den-yakɔrɛ le wo la. Anu bolo-nyimɛ waralɛ, yara-yakɔrɛ le wo la. Anu bolo-maran waralɛ, tura-yakɔrɛ le wo la. Anu kɔmɛ, kokɛ-yakɔrɛ le wo la.

¹¹Anu kanban filɛ minnu tafulennɛ, wonu nayɛlɛnɛ a ma. Anu tugunnɛ ye tala anu nyɔgɔn na. Anu kanban filɛ doi, wonu nafulenni ma. Anu fɛrɛ yamatogonnɛ wonu na.

¹²Nima-fen nanɛ kɛ bɛɛ yɛ lamununnɛ duninya-tonko-nanɛ bɛɛ la. Ta-sɔgɛ wa anu bira kan min bara la, tintan-gbɛrɛkɛ sa anu ma.

¹³Nima-fen nanɛ kɛnu tɛma, fan do ye malanna iko kala-mɛlan. Wo ye tola ta-ni-sɛgi kɛla anu tɛma. A wa a ma bilobilo, san ni a nyin masɔgɛ.

¹⁴Nima-fan wonu bi ta-ni-sɛgi kɛla sololo, iko san-nyin-masɔgɛ.

¹⁵N bi nima-fen nanɛ kɛnu mafɛlan kun na, n ya kin nani makawanɛ yen tugula dugi la iko kirinditɛ. Bɛɛta ye a kɔrɔ.

¹⁶Kin nanɛ kɛ bɛɛ subolo kelen. Kin nanɛ kɛ bɛɛ ye malan-malanna selu-selu iko kuru-da-gbɛlɛ min yanba-kun-damɛ. Kin nanɛ kɛnu tatantannɛ anu nyɔgɔn tɔ

¹⁷alako anu si ta duninya-tonko-nanɛ bɛɛ rɔ nya min. Tintan-gbɛrɛkɛ sa anu ma.

¹⁸ Kin nanɛ wonu da-gbole bɛɛ, ya-gbansan, ado anu makilanta.

¹⁹Nima-fan wonu tenbi tala, anu kin nanɛ wonu bi tala anu kɔrɔ. Anu tenbi yɛlɛla san ma, anu kin nanɛ kɛnu tonɛ anu kɔrɔ.

²⁰Ta-sɔgɛ wa anu bira kan-bo-kan, anu bi tala nyɔ le. Nima-fan kɛnubɛ kin nanɛ kɛnu fanan ti fara.

²¹ Nima-fan kɛnu ba wuli anu magala anu gbɛ rɔ tuma-wo-tuma, anubɛ kin nanɛ kɛnu denu. Anu ba sɔ kan min, kin nanɛ kɛnu si sɔ nyɔ. Hali anu tenbi yɛlɛla san ma, anubɛ kin nanɛ kɛnu denu. Fanka ye nima-fan kɛnu bolo kin nanɛ kɛnu kuma.

²² Fan do rafulennɛ nima-fan kɛnu kuma iko telekɔnɛ. Wo ye malan-malanna iko tele sɔnɛ tenbi silɛɛ la. Wo fanan makilanta.

²³Nima-fan wonu sɔnɛ a kɔrɔ. A bɛɛ kanban tugunnɛ anu ta-nyɔgɔntɛ la. Anu kanban filɛ doi, wonu nafulenni ma. Anu fɛrɛ yamatogonnɛ wonu na.

²⁴ Anu ba gban, nde, Isikiyɛli si anu kanban-kan lamɔɛn. Anu kanban wo kan manɛ iko wasa-belebele tugu-kan. Anu kanban-tagbesi-kan wo manɛ fanan iko kɛlɛ-den-siyamɛnu kinta-kan, ado a manɛ fanani iko Alla Sɛnbɛ-Bɛɛ-Tigi kuman-kan le. Anu ba anu sulen kan min, anu si anu kanbannu namɔrɔmɔrɔ.

²⁵Fan min tafulennɛ anu kuma wo la, n ya kuman-kan do lamɔɛn ka bɔ fan wo kuma kɔnɔ anu kanbannu namɔrɔmɔrɔnɛ wo wati rɔ.

²⁶ N ya fan do yen fan wo fanan kuma nyɔ rɔ. Wo mani de iko mansaya-waganɛ min nadannɛ kuru-da-gbɛlɛ-bilolamɛ la. Min siginɛ waganɛ wo rɔ, wo mani de iko hadama-dan.

²⁷ Min siginɛ waganɛ wo rɔ, ka a bi a tɛmɛ ma ka yɛlɛ, wo ye malan-malanna iko sila-yesinɛ. Ka a bi a tɛmɛ ma ka yigi, wo manɛ iko tɛ,

²⁸ado a yabasannɛ iko san-yili, bandɛ wa ka tumɛ min. Wan-belebele kɛ su ti taran kan-bo-kan fɔ Alla ye kan min ka a tɛgɛ Marita gbiliyɛ ma. Kɛ yen n bolo, n ya n naburun a ma dugu ma. Wo kɔma, n ya kuman-kan lamɔɛn.