Read Kuranko Isikiyɛli 10 Bible Online

Isikiyɛli 10 - Kuranko bible

Isikiyɛli 10

¹ Fan min bi nima-fannu kuma iko telekɔnɛ, n ya n yɛ lata nyɔ rɔ. Fan do ye wo kuma min manɛ iko mansaya-waganɛ. Waganɛ wo ladannɛ kuru-da-gbɛlɛ-bilolamɛ la.

² Linɛn-kurɛ donnɛ kei min kan na, Alla ya a fɔ wo ye ko, “A kian minnu bi nima-fan kɛnu kɔrɔ, ta wonu tɛma. Ta-wɔlɔn minnu bi nyɔ rɔ, i ni i bole lafa wonu na ka anu fui soe burɔ.” N yɛ gbalanɛ tora kei wo la ha a kera.

³A don Bato-Bɔn la, nima-fan wonu sɔnɛ tora Bato-Bon-kata burɔ dugu la. Banda-fin-gbɛ ya nyɔ lafa pen!

⁴Marita wan-takanɛ bɔra nima-fan wonu kuma ka ta a sɔ Bato-Bɔn don-dɛ la. Wo kɔma, banda-fin-gbɛ tara Bato-Bɔn lafa pen! Kata wo mumɛ burɛ rafara Allata wan-takɛ la waran!

⁵Hali mɔgɛ tenbi kata kɔma, i si nima-fan wonu kanban-tagbesi-kan lamɔɛn. A kuman-kan kolo iko Alla Sɛnbɛ-Bɛɛ-Tigi kan.

⁶Linɛn-kurɛ ye kei min kan na, Mari ara a fɔ wo ye nun ko a ni ta ta-wɔlɔn bi tinɛ nima-fan wonu kɔrɔ kian wonu tɛma. A donta nima-fan wonu tɛma ka a sɔ kin kelen dafɛ.

⁷Nima-fan kɛ kelen ya ta-wɔlɔn kɔ ka a kɛ kei wo bolo tɔ. Kei wo bɔra nyɔ ta-wɔlɔn la a bolo.

⁸N ya fan do yen nima-fan kɛnu kanbannu kɔrɔ min manɛ iko hadama-dan-bole.

⁹ N ya kin nani yen nima-fen nani kɛnu kɔrɔ min natintannɛ iko kirinditɛ. A bɛɛ subolo kelen. Anu bi malan-malanna selu-selu iko kuru-da-gbɛlɛ min yanba-kun-damɛ. Kin nanɛ kɛnu takankannɛ anu nyɔgɔn tɔ.

¹¹Nima-fan wonu tenbi tala kan min bara la, tintan-gbɛrɛkɛ sa anu ma. Anu bɛɛ tara nya-kun-kelen. Ta-sɔgɛ wa anu bira, tintan-gbɛrɛkɛ sa anu ma.

¹² Anu fɛrɛ wo, anu kɔɛ wo, anu bole wo, anu kanban wo, anu kin-natintannɛ wo, anu fɛrɛ mumɛ bɛɛ, ya-gbansan!

¹³N ya kian minnu yen nna ko-rayirɛ fɔlɔtɛ rɔ, wonu denu bi kɛnu na, yɔ!

¹⁴ Nima-fan kɛ bɛɛ yakɔrɔ nani-nani. Anu yakɔrɛ kelan, turɛ.[5] Anu yakɔrɛ fila nyɔgɛ, hadama-dan. Anu yakɔrɛ sawa nyɔgɛ, yarɛ. Anu yakɔrɛ nani nyɔgɛ, kokɛ.

¹⁵(N ya nima-fan kɛnu denu yen Kiba bɛ fɛ, yɔ!) Nima-fan wonu tenbi yɛlɛla san ma,

¹⁶anu kin nanɛ wonu bi anu kɔrɔ. Anu tenbi anu kanban nafulenna gban tinɛ, anubɛ anu kin nanɛ kɛnu denu.

¹⁷Anu ba dan kan min, kian kɛnu bi danna nyɔ le. Anu ba gban, anubɛ kin nanɛ kɛnu bi tala bawo fanka ye nima-fan kɛnu bolo kin nanɛ kɛnu kuma.

¹⁸Wo kɔma, Marita wan-takani-belebele bɔra a Bato-Bɔn don-dɛ la. A ya a mayɛlɛ nima-fen nanɛ kɛnu kuma.

¹⁹N bi wonu mafɛlan kun na, anu ya anu kanbannu tafulen ka yɛlɛ san ma, ado anubɛ anu kian wonu denu tara. Anu sɔra doni Bato-Bɔn tele-bɔɛ don-dɛ kuma. Isirɛlata Allata wan-takanɛ ye anu kuma.

²⁰Feda, n ya ale nima-fen kelan kɛnu denu yen Isirɛlata Alla tontɛ kɔrɔ Kiba bɛ dafɛ wulɔn.

²¹Yakɔrɔ nani-nani bi anu bɛɛ bolo. Kanban nani-nani bi anu bolo. Fan do ye a bɛɛ kanban kɔrɔ min manɛ iko hadama-den-bole.

²²Anu yakɔrɛ manɛ le, yɔ iko n ya anu yen nya min Kiba bɛ dafɛ. Ni anu ya anu telen kannu na, anu bi tala nyɔ-waralɛ la.