Read Kuranko Isikiyɛli 12 Bible Online

Isikiyɛli 12 - Kuranko bible

Isikiyɛli 12

¹Mari ya a fɔ n ye ko,

² “Ile hadama-dan, ile siginɛ mɔgɔ-murutiyanɛnu denu tɛma kɛ la. Yɛ ye anu bolo kɔnɔ anu sa fen yenna. Tole ye anu bolo kɔnɔ anu ti ko-wo-ko lamɔɛn bawo mɔgɔ-murutiyanɛnu denu bi anu na.

³“Ila mirannu mabɛn iko kɛlɛ-kɔrɔ-maburilɛ. Yanni a la ni fin, i ni tagama dabira. I wa wuli, bɛɛ ni i yen tala. Tumado, mɔgɔ-murutiyanɛ wonu si i yen tala.

⁴Woletɔ i ni ila dunɛnu mabɛn tele rɔ alako anu ni i yen ila dunɛnu mabɛnna. Anu ni i yen tala wurɛ la iko kɛlɛ-kɔrɔ-maburilɛ.

⁵Anu yɛ wo bɛnnɛ tenbi i ma, i ni woe labɔ ila bon-dandan ma ka ila dunɛ bi. Wobɛ ila dunɛ ni bɔ nyɔ.

⁶I ni ila dunɛ wo dun i kɛɛ la ka ta suyi rɔ pinpi rɔ. I ni i yɛ lakiri alako i kana na i kin-kɔrɛ yen. I ye min dama mala, tamasere le wo la Isirɛla mɔgɛnu ye.”

⁷N ya a ma iko Mari ya a fɔ n ye nya min. Wulɔn-tele nyɛrɛ rɔ, n ya nna dunɛnu mabɛn iko kɛlɛ-kɔrɔ-maburilɛ. Yanni a la ni fin, n ya woe labɔ nna bon-dandan ma n bole la. N bɔra nyɔ. N ke luyi ma, n ya nna dunɛ dun n kɛɛ la bɛɛ yala. N tara n ye.

⁸Wo banda kɛ, Mari ya a fɔ n ye, a ko,

⁹“Ile hadama-dan, Isirɛla mɔgɔ-murutiyanɛnu bara i manyinika min kɛ ko i ye nfen kun na kɛ la,

¹⁰nba, ta a fɔ anu ye worɔ ko nde, wo Tigi Mari ko kilayɛ kɛ ye Yerusalɛm mansɛ anubɛ Isirɛla mɔgɛnu denu ye.

¹¹A fɔ anu ye ko ile ara min ma, tamasere le wo la anu ye ko n bi wo le sufa mala anu na. Anu si ma kɛlɛ-kɔrɔ-maburilɛnu na, ado kɛlɛ si anu bira.

¹²Mansɛ min bi anu kun na, wo si ala dunɛnu mabɛn pinpi rɔ. A si ala dunɛnu dun a kɛɛ la. Mɔgɛnu ya woe min sin a ye, a ni bɔ wo la. A si a yɛ lakiri ka a buri a yogenu kɔrɔ. A ti a kin-kɔrɛ yen.

¹³ A fɔ anu ye ko n si nta yalɛ rafulen mansɛ yarɔ alako n ni a bira. Wo kɔma, n si ta a la Babilɔn soe burɔ. Ha a si faga nyɔ, a ti soe wo ragbɛ a yɛ la.

¹⁴N si anubɛ ala mɔgɛnu tanyɛnsɛn duninya-tonko-nanɛ bɛɛ rɔ, ala mɔgɔ-ba wo, a makandanna wo. Mɔgɛnu si anu nyini anu faga-koe la.

¹⁵“N ba anu tanyɛnsɛn sibolo-gbɛrɛnu tɛma nyamani-gbɛrɛkɛnu tɔ, anu si a lɔn worɔ ko Mari le nde la.

¹⁶Kɔnɔ n ti sɔn kɛlɛ anubɛ kɔnkɛ anubɛ kirayɛ ni anu damasi faga. Donu si to anu kɛndɛ la. Wo le si a ma, anu ni a lɔn worɔ anu bara ko-yogoma-sufa minnu ma. Wo kɔma, anu si a fɔ worɔ ko Mari le nde la.”

¹⁷Mari ya a fɔ n ye ko,

¹⁸“Ile hadama-dan, i ni yɛrɛyɛrɛn fen-dɔn-tinɛ. I kun ma ni kɔ kilan bolo i tenbi i minna.

¹⁹A fɔ Isirɛla mɔgɛ bɛɛ ye ko kilayɛ kɛ ye bɔla wo Tigi Mari le bolo Isirɛla mɔgɛnu denu ye minnu bi anu niyi la Yerusalɛm soe burɔ. Anu si yɛrɛyɛrɛn fen-dɔn-tinɛ. Anu tenbi anu minna, anu kun ma si kɔ kilan bolo. Fenfen ti taran anuna nyamanɛ rɔ ka a tɛgɛ anuna karagbɛlɛyɛ ma.

²⁰So-kunbɛ minnu nafanɛ mɔgɛ la, wonu si kasara pɔ! Nyamanɛ ra si kolonya iko wulɛ. Wo kɔma, anu si a lɔn ko Mari le nde la.”

²¹Mari ya a fɔ n ye tun ko,

²²“Ile hadama-dan, nfenna mɔgɛnu bi sarandɛ kɛ sala ko, ‘Yanni wati kɛ ni ke, koe kɛ ye mala kɔnɔ anu kuman-kan ti bɔ anuna ko-rayirɛ rɔ’?

²³A fɔ anu ye ko wo Tigi Mari le kɛnu wara-koe fɔla wo ye. A fɔ anu ye tun ko n si tɔn sigi anuna sarandi-sɛ wo la. Mɔgɔ ti wo fɔ Isirɛla nyamanɛ rɔ tun. Wo kɔma, a fɔ anu ye ko anu bi min fɔla gbɛ anubɛ anu bi wɔlɔyiya-kumɛ minnu fɔla, anu kan ni bɔ a la ko-rayirɛ wo rɔ. Wo wati ara ke!

²⁴“Anuna foninya-ko-rayirɛ wonubɛ anuna foninya-wɔlɔyiya-kuma-fɔɛ wo, wonu ti ma Isirɛla nyamanɛ rɔ tun!

²⁵Anuta Mari kan le kɛ la. N ba min fɔ, wo le ye mala. A makɔnɔ-wati-wo-wati sa nyɔ tun. N bara mɔgɔ-murutiyanɛnu makawandi minnu ma, fɔ n ba wonu ma le anu siyi-tele-bɛɛ kɔrɔ serr! Nde, anu Tigi Mari kan le kɛ la!”

²⁶Mari ya a fɔ n ye ko,

²⁷“Ile hadama-dan, Isirɛla mɔgɛnu mirinɛ ko ko-rayirɛ anubɛ wɔlɔyiya-kumɛ minnu bi fɔla i ye, wonu si ma le kɔnɔ anu wati fɛ-yan fɔlɔn.

²⁸A fɔ anu ye ko nde, wo Tigi Mari ko wati-wo-wati sa a la tun. N bara min fɔ, fɔ wonu ba ma le serr! Nde, wo Tigi Mari kan le kɛ la!”