Read Kuranko Isikiyɛli 13 Bible Online

Isikiyɛli 13 - Kuranko bible

Isikiyɛli 13

¹Mari ya a fɔ n ye ko,

²“Ile hadama-dan, fɔ i ni kuma Isirɛla foninya-wɔlɔyiya-kuma-fɔlɛnu ma minnu bi foninya-wɔlɔyiya-kumɛnu bɔla anu kunyɛ rɔ, kɔni. A fɔ anu ye ko anu ni anu tole masɔ nde, Marita kumɛ la.

³“Nde, wo Tigi Mari ko gbalo ye foninya-wɔlɔyiya-kuma-fɔla-fuyi kɛnu kuma. Anu bi anu bilala anu nyɛrɛ miriya le fɛ. Anu bi foninya-ko-rayira-kumɛ wonu bɔla anu kunyɛ le tɔ dɔrɔn.

⁴Fenfen ma Isirɛla mɔgɛnuna foninya-wɔlɔyiya-kuma-fɔlɛ wonu na. Anu ti ko nyinya mɔgɛ ma iko fira-wuli minnu basannɛ tonbɔn la.

⁵Iko fira-wuli wonu, anuna foninya-wɔlɔyiya-kuma-fɔlɛnu sa tara-kerinɛ kandanna. Ni anu sa tarɛ wo sɔla tun alako nde, Mari si anu yogenu natugu anu kan ma tele min ma, soe wo ti kanan.

⁶Anuna ko-rayirɛ anubɛ anuna wɔlɔyiya-kumɛnu, wo bɛɛ foninya-kuma. Anu kɛnɛna nyɛrɛmankola-kumɛnu fɔla ko nde, Mari le ya anu sɔ. Kɔnɔ anu denu mirinɛ ko anu kan wo si bɔ-a-la.

⁷Nde, Mari si a fɔ anu ye ko anu bi ko-rayirɛ anubɛ wɔlɔyiya-kumɛ minnu fɔla mɔgɛnu ye, foninyɛ le wonu na. Anu kɛnɛna anu nyɛrɛ diyala-a-la ko nde le ya a fɔ anu ye kɔnɔ foninyɛ le wo la. Nde kulu ma wonu na!

⁸“Woletɔ nde, wo Tigi Mari ko anu bi ko-rayirɛ anubɛ wɔlɔyiya-kumɛ minnu fɔla mɔgɛnu ye, foninyɛ le wonu na. N si taran anu kan ma.

⁹Ka a tɛgɛ anuna ko-rayirɛ anubɛ anuna foninya-wɔlɔyiya-kuma-fɔɛ wo ma, a ara to sɛ, n ni bila anu tɔ. Nna mɔgɛnu ba anu kundɛn ka koe latɛgɛ anu nyɛrɛ ma, foninya-nɛbi wonu ti bɛn wo rɔ. Isirɛla dugurannu tɔgɛ sɛbɛnɛ kan min, anu denu tɔgɔ ti taran nyɔ hali! Anu ti sɛgi anuna nyamanɛ wo rɔ tun. Wo wa ma tumɛ min, anu si a lɔn ko wo Tigi Mari le nde la.

¹⁰ “Anu bi nna mɔgɛnu bɔla nta kilɛ fɛ bawo anu bi a fɔla ko yisi-kimɛ ye yan, ado yisi-kima sa kan-tinɛ wo rɔ. Ndeta mɔgɛnu bi tarɛ sɔla min ta ma gbɛlɛ. Foninya-nɛbi kɛnu bi nala bɔnku-gbɛ layɛlɛla tarɛ wo ma alako a ni kinya dɔrɔn.

¹¹Ile hadama-dan, a fɔ foninya-wɔlɔyiya-kuma-fɔlɛ wonu ye ko anuna tara-mabɛnnɛ wo si bui. A fɔ anu ye ko n si banda-belebele-wɛ lana tarɛ wo ma. Banda-kole si a yoro. N si fɔnyɔ latugu a ma.

¹²Tarɛ wo si yigi a rɔ biribiri! Wo kɔma, mɔgɛnu si anu manyinika ko, ‘Bɔnku-gbɛ wo ya nfen dɛnbɛnɛ kɛ?’

¹³“Nde, wo Tigi Mari ko nta yisi-bɔɛ si fɔn-belebele-wɛ latugu tarɛ wo ma. Wo kɔma, n ni banda-belebele-wɛ lana. N si banda-kole fanan nabui tarɛ wo ma. A ni yigi a rɔ biribiri!

¹⁴Anu ya bɔnku-gbɛ layɛlɛ tarɛ min ma wo la, wola bu-koe latɛgɛni de n bolo. A tii-sɔgɛ ye n na mɛmɛ! A si bui foninya-wɔlɔyiya-kuma-fɔlɛnu tɔ ka anu nato dogbe! Bɛɛ ye a lɔnna wo le ma ko Mari le nde la.

¹⁵“Tarɛ wo, anubɛ minnu ya bɔnku-gbɛ layɛlɛ a ma wo, n si nta yisi-bɔɛ yira wonu na. Wo kɔma, n si a fɔ Isirɛla mɔgɛnu ye worɔ ko, ‘Tarɛ wo, anubɛ min ya bɔnku-gbɛ layɛlɛ a ma wo, anu bara ta bɛɛ-ta-tinɛ.’

¹⁶Foninya-nɛbi minnu bi a fɔla nun ko yisi-kimɛ ye yan, ado yisi-kima sa kan-tinɛ wo rɔ, n bi wonu denu ma.” Ma Tigi Mari kan le kɛ la.

¹⁷Mari ko, “Ile hadama-dan, i yɛ lata musinu ma wo tɛma minnu bi anu diyala-a-la foninya-wɔlɔyiya-kumɛnu bɔla anu kunyɛ rɔ. I ni anu makuma.

¹⁸I ni nde, wo Tigi Mari kuman-kan latenbi anu ma. A fɔ anu ye ko, “Gbalo ye musi wonu kuma! Anu bi fɛlɛnu nagburula ka anu kiri anu bolenu na belenna. Anu bi belenna bɛsi-fanɛnu burunna anu kun na alako anu si doinu masɔrɔn nya min. A sɔgɛ ye anu na, anu ni sɛnbɛ sɔrɔn ka mɔgɛ faga anubɛ ka mɔgɛ to a niyi la tɔnɔ-sɔrɔn-koe la.

¹⁹Anu bi n nafɛyala nna mɔgɛnu yala buyi bolo-nya kelen anubɛ biredi-kundunɛnuna ko la. A ma bɛn minnu ni faga, anu bi wonu fagala. A bɛnnɛ minnu ni faga, anu bi wonu tola anu niyi la. Nta mɔgɛnu si anu tole masɔ foninyɛ la. Anu bi ko-sufa kɛ sigila wonu denu ma.

²⁰“Nde, wo Tigi Mari ko anu bi mɔgɛnu fagala bɛsɛ minnu na wo, anu bi anu tola anu niyi la bɛsɛ minnu na wo, wonu gbo n ye. N si bɛsɛ kɛnu toronde anu bolo-kalɛnu na alako mɔgɛ wonu na ni fɛrɛ, anu bara nɔ-ko sɔrɔn minnu ma.

²¹Anuna bɛsi-fanɛ minnu bi anu kun na, n si wonu fogbɔ anu kunyɛ la alako ka nta mɔgɛnu kisi anu masibɛ ma. Anu ti nɔ-ko sɔrɔn nna mɔgɛnu ma tun. Anu bi a lɔnna wo le ma ko Mari le nde la.

²²“Anu bi mɔgɔ-telennɛnu yisi tɔntɔnna a rɔ anuna foninya-kumɛnu na, ado a ma di n ye, mɔgɔ-telennɛ kɛnu yisi ma ni gboya. Anu bi mɔgɛnu manugu-nɛgɛla alako wonu kana na bɔ anu sɔn-yogomɛnu da kɔrɔ bawo ni wonu bɔra anu sɔn-yogomɛ da kɔrɔ, anu si kisi.

²³Nba kaka, anuna ko-rayirɛ anubɛ anuna foninya-wɔlɔyiya-kuma-fɔɛnu bara ban. N bi nna mɔgɛnu denu porokɔlɔ-koe rɔ musi wonu bolo ka anu nakanan. Anu bi a lɔnna wo le ma ko Mari le nde la.”