Read Kuranko Isikiyɛli 14 Bible Online

Isikiyɛli 14 - Kuranko bible

Isikiyɛli 14

¹Isirɛla mɔgɔ-ba donu nara sigi nde, Isikiyɛli dafɛ alako anu ni Mari sako lɔn.

²Anu bi nyɔ tumɛ min, Mari kumara n ye, a ko,

³“Ile hadama-dan, mɔgɔ-ba kɛnu bara anu nyɛrɛ di bɛsɛnu ma. Hali anu ya a lɔn ko bɛsɛnu bi anu nadonna hakɛ rɔ, anu miri ko nde, Mari si anu yabi worɔ, wa?

⁴“A fɔ anu ye ko nde, wo Tigi Mari ye nala kumala anu ye. Isirɛla mɔgɔ-siyaman bara anu nyɛrɛ di bɛsɛnu ma, hali anu ya a lɔn ko bɛsɛ wonu bi anu nadonna hakɛ rɔ. Ni mɔgɔ-sufa wonu nara nta nɛbi do wara hɛnkili-nyini-koe rɔ, nde, Mari si wo tigi yabi boloko-yogomɛ-kɛ. N bi anu yabila le iko anuna bɛsɛnu bara-koe ye anu burɔ nya min

⁵bawo bɛsɛ wonu bara-koe ara a ma, Isirɛla mɔgɛnu bara bɔ n bolo. Kɔnɔ n bi anu yabila nya min, wo si a ma, anu ni sɛgi n ma tun.

⁶“Woletɔ nde, wo Tigi Mari ye min fɔla i ye, i ni wo latenbi Isirɛla mɔgɛ wonu ma. Anu ni anu nyɛrɛ yiliki ka anu kan-kɔ sɔ anuna kisimiriya-bɛsɛnu na ka sɛgi n ma.

⁷“Isirɛla mɔgɛ fenfen, ni wo ma, sibolo-gbɛrɛ minnu bi anu tɛma, ni anu ya anu kan-kɔ sɔ nde la ka bɛsɛnu kɔ, wo kɔma, a ni sɛgi nta nɛbi do manyinikala n sako-lɔn-koe rɔ, nde, Mari si wo tigi yabi boloko-yogomɛ-kɛ!

⁸N si taran wo tigi kan ma. N si a ma misalɛ la mɔgɛnu yala. N si a wurun nta mɔgɛnu tɛma. Wo ye a lɔnna wo le ma ko nde le Mari la.

⁹“Ni nɛbi do ya foninya-kumɛ fɔ, nde, Mari le ya a yanfa wo la. Nde nyɛrɛ-nyɛrɛ si nɛbi wo wurun Isirɛla mɔgɛnu tɛma.

¹⁰A mɔgɛ wo, a nɛbi wo, anuna tɔrɔyɛ ra si kɛnya.

¹¹N bi wo mala le woletɔ Isirɛla mɔgɛnu ti n boloka ka anu nyɛrɛ kɔsɔ anu hakɛ bolo. Nta mɔgɛ le Isirɛla mɔgɛ kɛnu na. Anuta Alla le nde la. Nde, wo Tigi Mari le wara kɛ fɔ.”

¹²Mari ya a fɔ nde, Isikiyɛli ye ko,

¹³“Ile hadama-dan, ni nyamanita-mɔgɛnu ya hakɛ kɛ n na, anu ma anu telen n ye, n si anuna dɔn-fan bɛɛ halaki. N si kɔnkɔ-fitinɛ lana anu ma mɔgɛ anubɛ sogenu kunyɛ si to min tɔ.

¹⁴Nowa wo, Danɛli wo, Yobu wo, ni wonu denu bi nyamanɛ wo rɔ nun, anuna kɛwɔli-nyimɛ ti mɔgɔ-wo-mɔgɔ kisi fɔ anu nyɛrɛ. Nde, wo Tigi Mari kan le kɛ la.

¹⁵“Tumado n si sogo-feremɛnu natugu nyamanɛ wo ma ka mɔgɛnu wara-koe ka-a-la. Nyamanɛ wo ma si kilan, mɔgɔ-wo-mɔgɔ ti sisi tala nyɔ.

¹⁶Hali mɔgɔ sawɛ wonu bi nyamanɛ wo burɔ nun, n bara n keli n nyɛrɛ rɔ ko hali anuna dannu, anu ti ke wonu nakisila fɔ anu nyɛrɛ dɔrɔn. Nyamanɛ wo si ma nyamani-takolɔn la.

¹⁷“Tumado, n si kɛlɛ lana anu ma. N si kɛlɛ-kɛ-fen-yogomɛnu nana minnu si mɔgɛnu anubɛ sogenu wara-koe ka-a-la.

¹⁸Hali mɔgɔ sawɛ wonu bi nyamanɛ wo burɔ nun, n bara n keli n nyɛrɛ rɔ ko hali anuna dannu, anu ti ke wonu nakisila fɔ anu nyɛrɛ dɔrɔn.

¹⁹“Tumado, n si wuka le latugu anu ma ka mɔgɛnu anubɛ sogenu nato yisi-bɔɛ bolo.

²⁰Ni n ya wo ma, hali Nowa anubɛ Danɛli anubɛ Yobu taranta nyamanɛ wo rɔ nun, n bara n keli n nyɛrɛ rɔ ko hali anuna dannu, anu ti ke wonu nakisila fɔ anuna telenbagayɛ, wo le ye anu kisila.”

²¹ Ma Tigi Mari kan le kɛ la ko, “N si nta tɔrɔya-su nanɛ kɛnu nana Yerusalɛm kɛnu ma min tenbira tɔrɔyɛ bɛɛ la, kɛlɛ wo, kɔnkɔ-fitina wo, sogo-feremɛnu wo, anubɛ wuka. Wonu si mɔgɛnu anubɛ sogenu nato dogbe!

²²Ni minnubɛ anuna dannu kunyɛ ma to kɛ rɔ, ni wonu nara i wara, i ni i yɛ bɛn wonu ma. I si a yen yati ka a fɔ ko mɔgɔ-yoge le wonu denu na. I ye a lɔnna wo le ma ko n ya tɔrɔyɛ min sigi Yerusalɛm kɛnu ma, a bɛnnɛ, n ni a sigi anu ma.

²³I ye a lɔnna wo wati le tɔ ko wo ma-kɔrɛ ye n bolo. Nde, wo Tigi Mari kan le kɛ la.”