Read Kuranko Isikiyɛli 16 Bible Online

Isikiyɛli 16 - Kuranko bible

Isikiyɛli 16

²“Ile hadama-dan, Yerusalɛm kɛnu bi ko-kɔsɔni-koe minnu kun na, wo fɔ anu ye.

³A fɔ Yerusalɛm kɛnu ye ko nde, wo Tigi Mari kan le kɛ la. “ ‘Ile Yerusalɛm soe, i fa le Amoranu na. I na le Hɛtinu na bawo wonu denu ya ile Yerusalɛm soe datɛgɛ Kenan nyamanɛ tɛma.

⁴I mani de nun iko dan wa sɔrɔn, a bara-yili ma tɛgɛ, a ma ku, kɔgɛ ma don a ma, a mamɔrɔ-mɔrɔni ma kura rɔ.

⁵Ile Yerusalɛm mani de nun iko den-sufa wo. Wo tumɛ i datɛgɛ san, mɔgɔ ma kinikini i ma ka ko-sufa kɛ do ma i ye. I datɛgɛ san, i ma di mɔgɔ-wo-mɔgɔ ye. I mani de nun iko anu ba den-kurɛ lakɛ a rɔ binyɛ rɔ.

⁶“ ‘Nde, Mari tenbimatoe, n ya i taran, i ye i mamagala i sɔrɔn-yele ya ma. Ile poroparɛ yele bolo kɔnɔ n ma sɔn i ni faga.

⁷N ya a ma, i sabatira iko ki-fan. I ragbɛlɛyara gbon! I mara iko sunkurun-pose. I kinyɛnu tugura a rɔ. I yatelenma-siyi nanfara kɔnɔ hali wo, i makolɔn tora.

⁸“ ‘Nde, Mari tenbimatoe tun, n ya i taran nkɛkuna, n ya i yen ko i wara ke. Woletɔ n ya nna duruki-ba-tɔnkɔn lata ka a mamɔrɔ-mɔrɔ i gbu-makolɔn ma bawo i di n ye. N ya lanyiri kiri ka a tɛgɛ i furu-koe ma. Ile mara ntɛ la. Nde, i Tigi Mari kan le kɛ la.

⁹N ya i ku yi la ka i sɔrɔn-yele wo bɔ i ma. Wo kɔma, n ya tuli don i ma.

¹⁰N ya duruku-bonni-hakikɛ don i kan na. N ya gbolo-sanbara-hakikɛ di i ma. N ya linɛn-kun-yili-hakikɛ anubɛ kura-da-gbɛlɛ di i ma.

¹¹N ya i makiri bolo-kalama-dɛɛnnu anubɛ kan-na-fannu na ka bɔ kuru-da-gbɛlɛnu tɔ.

¹²N ya fen-da-gbɛlɛnu bi ka anu don i sunyɛ anubɛ i tole la. N ya musu-mansɛ-fulɛ fanan don i kunyɛ la.

¹³I makirinɛ sɛnɛ anubɛ wodi-gbɛ la. I ya linɛn-kura-bonnɛ anubɛ kura-da-gbɛlɛ do don. I wara biredi don min nadannɛ dɛgɛ-munku-hakikɛ anubɛ liyi anubɛ tulu-hakikɛ la. Ila kinyɛ bɔra gbɛ ma. I mara musu-mansɛ la.

¹⁴I tɔgɛ bɔra sibole bɛɛ tɛma ka a tɛgɛ ila kinya-belebele ma bawo nde, Alla le ya ila kinyɛ labɔ gbɛ rɔ. Nde, i Tigi Mari kan le kɛ la.

¹⁵“ ‘I ya ila mankan anubɛ ila kinyɛ wonu ma yɛlɛnya-fan la. Kei-wo-kei nara, wo ti tenbi i la. I kinyɛnu mara kei bɛɛtɛ la iko a di anu ye nya min.

¹⁶I ya ila fɛrɛya-bɔɛ do bi ka a ma ila kɔnkɛ-kuma-bɛsi-kɔ-tinɛ rabɛn-fan la. I wara i nyɛrɛ latenbi kei bɛɛ ma iko musi-yɛlan. Kɛ ko-sufanu ma bɛn mumɛ!

¹⁷N ya sɛnɛ anubɛ wodi-gbɛ minnu ma i makiri-fan la, i ya wonu bi ka anu nadan bɛsi-kei-muninyɛ la minnu yatelenmɛ bɔnɛ gbɛ rɔ. Wobɛ wonu ya yɛlɛnyɛ kɛ.

¹⁸N ya kura-bɔnni-hakikɛ minnu di i ma, i ya wonu bi ka wonu ma bɛsi-kei wonu makiri-fan la. Nna tulu-hakikɛ anubɛ nna isɛnti, i ya wonu natenbi bɛsɛ wonu ma.

¹⁹N ya dɔn-fen di i ma min nadannɛ dɛgɛ-munku-hakikɛ anubɛ tulu-hakikɛ anubɛ liyi la. Kɔnɔ i ya wonu ma bɛsɛ wonu nadiya-fan la. Nde, i Tigi Mari kan le kɛ la.

²⁰Min sanɛ wo kuma, i ya dunmusi anubɛ den-kei minnu sɔrɔn n ye, i ya wonu ma kɔ-fan la ila bɛsɛ wonu ye. Ha bi, ile yisi ma sa yɛlɛnya-koe rɔ, wa?

²¹I ya dan wonu faga ka anu ma sarakɛ la ila bɛsɛ wonu ye.

²²I ye ila yɛlɛnya-wulen-bɛ kɛ kun na, i sa i mirila ila denniya-tumɛ ma, wo tumɛ i makolɔn sani mamagala i sɔrɔn-yele rɔ.

²³“ ‘Nde, i Tigi Mari ko i ban karagbɛlɛyɛ kɛ damasi mala, i ya bɛsi-kɔ-tinɛnu nadan ka yɛlɛnya-kɛ-tinɛnu fanan nadan kila-kunyɛnu na. Gbalo ye ile Yerusalɛm soe ma ka a tɛgɛ i sɔn-yogomɛ wonuna ko ma!

²⁴

²⁵I wara ila kinyɛ sa bore rɔ. Kei minnu bi tenbi-tenbila, i ye i mawuranna ka i kiannu tansa wonu ye. Ila yɛlɛnya-wuyan sa bɔla a la. A nya le a ma ile bolo tolon!

²⁶I dan-masa-nyɔgɔn-yɛlannu, Iyipiti kɛnu, kɔni, wonu fanan ya anu sa i fɛ. I ya ila yɛlɛnyɛ wo ma n nadiminya-fan la.

²⁷Nba kaka, nde, Mari ara n bole kɔrɔbi i tɔrɔ-koe la. N bara i halala-dugi madɔgɔya. N bara i kunyɛ don Filisitinu bolo, i gbo minnu ye, kɔni. Ila sɔn-yogoyɛ ara a sɔgɔ labɔ hali wonu denu na.

²⁸I sa wasala yɛlɛnyɛ rɔ min kɛ, i kɛnɛna bilala Asiriyanu fɛ. Wonu fanan sa i wasala.

²⁹Wo kɔma, Babilɔn nyamani-yilanu bi anu sala i fɛ. Hali wo, wo sa i wasala.

³⁰“ ‘Nde, i Tigi Mari ko i sɔn-yogo iko gbɔɔn. I ya kɛ dama ma le iko yɛlan min ti miliya.

³¹I ya bɛsi-kɔ-tinɛnu nadan ka yɛlɛnya-kɛ-tinɛnu fanan nadan kila-kunyɛnu na. Kɔnɔ ile sa nyinina ila yɛlɛnya-sarɛ ma iko yɛlan doinu.

³²Ile Yerusalɛm, i mani de iko kei-gbɛrɛnu di musi min ye ala kei ko.

³³Yɛlan doinu bi fen sɔrɔnna yɛlɛnyɛ rɔ kɔnɔ ile ye fen sala i nyɛrɛ kuma yɛlɛnya-kɛ-tinɛ. I ye keinu sarala kan-tinɛ bɛɛ rɔ alako anu ni na anu sa i fɛ.

³⁴Ile mani ma iko musi doinu. Mɔgɔ-wo-mɔgɔ ma i fɔrɔsɛ yɛlɛnya-koe ma, ado i sa sarɛ sɔrɔnna a rɔ. I kani de musi doinu ma bawo i ye mɔgɛnu sarala alako anu ni anu sa i fɛ.

³⁵“ ‘Ile Yerusalɛm yɛlan, i tole masɔ nde, Mari kan la.

³⁶Nde, i Tigi Mari ko i ya i nyɛrɛ mawuran ka i nyɛrɛ di keinu anubɛ kisimiriya-bɛsɛnu ma fasai! I ya ila dannu faga ka anu yele bɔ sarakayɛ la bɛsɛnu ye.

³⁷Ka a tɛgɛ wo ma, n si i sa-nyɔgɔn-kɔrɛ wo bɛɛ ladɛn kan-tina-kelen. Minnu di i ye wo, minnu gbo i ye wo, wonu si a mini i ma. Wo kɔma, n si i mawuran alako anu ni i lakolɔn yen.

³⁸I wara yɛlɛnyɛ anubɛ fagalɛ min dan-natenbi, woletɔ n bara itɛ bɔ tɔn rɔ. N si i faga don, nta yisi-bɔ-wulen-bɛ la.

³⁹N si i don i sa-nyɔgɛnu sɛnbɛ kɔrɔ. Wonu si ila yɛlɛnya-kɛ-tinɛ anubɛ ila bɛsi-kɔ-tinɛnu kasara. Anu si ila fɛrɛya-bɔɛ anubɛ ila fen-kolomɛnu bi i bolo ka i mɛlan to sɔni.

⁴⁰Wonu si nyama latugu i ma ka i mabon kuri la. Anu si i ratɛgɛ gbede-gbede anuna faannu na.

⁴¹Anu si ila bɔnnu mintan gburr, ado i tɔrɛ kɛ si kɛ musi siyaman yala. N si a ma, i ni yɛlɛnyɛ boloka feufeu! N si a ma, i ni fara kemini-san la.

⁴²Wo wa ma tumɛ min, nta diminyɛ si ban. N yisi si kimɛ worɔ poi! N yisi ti bɔ tun. N ti i makeliya tun.

⁴³N ya i bira nya min, wo tumɛ i dɔgɔ, i wara nyina wo la. I ya n yisi-tinya-koe gbansan le ladan. Woletɔ n bara i sara ila ko-yogomɛ bɛɛla ko la. Nfenna i ya yɛlɛnya-koenu sa i sɔn-yogomɛnu kuma? Nde, i Tigi Mari kan le kɛ la.

⁴⁴“ ‘Nba, ile Yerusalɛm, mɔgɛnu si hɛnkilimaya-kumɛ kɛ fɔ i wara-koe rɔ. Anu kɛnɛna a fɔla ko, “Dunmusi si bɔ a na le la,”

⁴⁵ado ile Yerusalɛm bɔra i na le la, yɔ! I na wola kei anubɛ ala dannu ma di a ye. Ile fanan mani de iko i na-kelen-nyɔgɔ-musi minnuna keinu anubɛ anuna dannu gboyanɛ anu ye. I fa le Amoranu na. I na le Hɛtinu na bawo wonu denu ya wo datɛgɛ.

⁴⁶I kɔrɔ-musi le Samariya soe min bi kan tɔ anubɛ a so-mɛsɛnɛnu. I dɔgɔ-musi le Sɔdɔm soe min bi dugu la anubɛ a so-mɛsɛnɛnu.

⁴⁷Ka bila wonu fɛ kisimiriya ko-ladan rɔ, wo ya i wasa, wa? Wati-kundu-nɛ kɛ kɔrɔ, ile sɔn tenbira anutɛ la pirr!

⁴⁸Nde, wo Tigi Mari Alla ko n bara n keli n nyɛrɛ rɔ ko hali i dɔgɔ Sɔdɔm soe anubɛ a so-mɛsɛnɛnu ma ke wobɛ ila so-mɛsɛnu tɔ ka ko-yogoma-sufa kɛnu ma.

⁴⁹Nba, Sɔdɔm soe wonubɛ a so-mɛsɛnɛnu wasinɛ bawo dɔn-fen-siyaman bi anu bolo, ado anu siginɛ yisi-kimɛ rɔ poi! Kɔnɔ bolo-kolɔnnu bɔrɔ sa anu ye.

⁵⁰Wonu fanan wasira, ado anu tole gbɛlɛ. Anu ya n tanama-ko-gbansan le ladan. Woletɔ iko wo ya a lɔn nya min, n ya anu kasara.

⁵¹I kɔrɔ-musi Samariyata hakɛ ma ke iletɛ rɔ. Ile kɛ-nya makisimirita atɛ ko pirr! Ni n ya i na-kelen-nyɔgɔ-musi kɛnu sanka ile nyɔgɔn ma, n ti fɛɛ yen wonu na.

⁵²A fɛrɛ sa fɔ i ni dinya ita yarabiyi wo kɔrɔ. I hakɛ tenbira anutɛ la ha a manɛ iko anu ma hakɛ kɛ iko ile. I kun nayigi miliyɛ bolo bawo i sɔn ara a ma, i na-kelen-nyɔgɔ-musinu bara gbɛ feu!

⁵³“ ‘I dɔgɔ Sɔdɔm soe anubɛ a so-mɛsɛnɛnu wo, i kɔrɔ Samariya soe anubɛ a so-mɛsɛnɛnu wo, nde, Mari si a ma, wonu ni ta yarɔ tun. Ado nfan, n si a ma, ile Yerusalɛm ni sabati fanan.

⁵⁴I si miliya i nyɛrɛ ma bawo i wara min ma, wo ara i na-kelen-nyɔgɔ-musi wonu kun na ara diya.

⁵⁵Wonu bara-koe si ta yarɔ a kilɛ fɛ. Wolebɛ ita so-mɛsɛnɛnu si ma-a-la tun.

⁵⁶Ile wasinɛ tumɛ min, i sa yɛlɛnna Sɔdɔm soe ma nun, ba?

⁵⁷Yanni ile sɔn-yogomɛ ni bɔ gbɛ rɔ, i ma yɛlɛn anu ma nun, ba? Ile fanan bara ma yɛlɛnma-fan la iko anu denu. I gbo minnu ye iko Idɔm[6] kɛnu anubɛ Filisitinu anubɛ sibolo-gbɛrɛ minnu bi wola foolɛ rɔ, i wara ma yɛlɛnma-fan la wonu fanan ye.

⁵⁸Ile si tɔrɔya ila kisimiriya-ko-ladannuna ko la. Nde, i Mari kan le kɛ la.

⁵⁹“ ‘Nde, i tigi Mari kan le kɛ la. N ko n si i bira iko i sɔn-yogomɛ ye nya min bawo i ma i yili to ma sarama-kan ko.

⁶⁰Kɔnɔ kebi i dennɛ, ma ya sarama-kan min kiri ma nyɔgɔn tɛma, n si n baralɛ latɔnbagaya. Sarama-kan wo ti yɛlɛma muk!

⁶¹N ba wobɛ i dɔgɔ-musi anubɛ i kɔrɔ-musi to kan kelan rɔ, ni i ya i miri i sɔn-kɔrɛnu ma tumɛ min, i si miliya anu ye. N si a ma, anu ni ma iko ila den-sunkurɔnnu. Kɔnɔ ma mɔgɔ filɛ ma ma sara wo ma nun.

⁶²N si nna sarama-kan lakurakuraya alako wo ni a lɔn ko Mari le nde la.

⁶³N si wo makoto wola ko-yogomɛ bɛɛ la. Wo yili ti bɔ wola ko-yogomɛ wonu ko, ado wo si miliya wo dɛ tugula wo sɔn-yogomɛ wonu na. Nde, i Tigi Mari kan le kɛ la.’ ”