Read Kuranko Isikiyɛli 18 Bible Online

Isikiyɛli 18 - Kuranko bible

Isikiyɛli 18

¹Mari ya a fɔ nde, Isikiyɛli ye ko,

²“Mɔgɛnu bi belenna hɛnkilimaya-kumɛ fɔla Isirɛla kan-tinɛ bɛɛ rɔ ko, ‘Ni fa ya kɔn-gbɔ-magbɛngbɛnɛ do dɔn, ala dan ni a yakɔrɛ matɔrɔmɔnya wola ko la.’ Nfenna ko la, mɔgɛnu bi belenna kɛ fɔla?

³“Nde, wo Tigi Mari Alla ya n keli n nyɛrɛ rɔ ko kuma sufa kɛ ti fɔ Isirɛla nyamanɛ kɛ rɔ tun!

⁴Nde leta ye mɔgɛ bɛɛ niyi la, a denba wo, a den wo. Min bi hakɛ kɛla, wo le ye fagala.

⁵“Tumado, mɔgɔ-nyima-telennɛ do ye nyɔ

⁶min sa Isirɛla mɔgɛnuna bɛsɛnu kɔla. A ti bɛsi-kɔ-fan dɔn anuna kan-tina-layan-bɛnu tɔ. A ti bila mɔgɔ-gbɛrɛla musi fɛ, ado musi tenbi ala wati rɔ, a ti a sa wo fɛ.

⁷A ti mɔgɔ-niyi ragbɛrɛn a ma anubɛ a ti kankanyɛ kɛ. Ni min ya tulumɛ sigi a ma, a ti balan a ma. A ye kɔnkɔtoenu de-nyinina. A ye fɛrɛyatoenu fɛrɛya-bɔla.

⁸A wa mɔgɔ dɔndɔ, a ti tɔnɔ sa a kuma. A ye a banna ko-yogoma-kɛ ma. A ti kumɛ ladon binyɛ la mɔgɔ-wo-mɔgɔ ye.

⁹ Mɔgɔ-su wo si nna tɔnnu bira a kilɛ fɛ le. Mɔgɔ-telennɛ le a la, ado a si to a niyi la. Nde, wo Tigi Mari kan le kɛ la.

¹⁰“Kɔnɔ ni dan do taranta kei kɛ bolo min si kankanyɛ kɛ anubɛ ka mɔgɔ-fagɛ kɛ, ado a si ko-yogoma-su bɛɛ ma

¹¹a fa ti minnu ma, wo mɔgɔ-sufa si to a niyi la, wa? A si bɛsi-kɔ-fan dɔn kan-tina-layan-bɛnu tɔ. A ye bilala mɔgɔ-gbɛrɛla musi le fɛ.

¹²A kɛnɛna bolo-kolɔnnu bolo labirala ka kankanyɛ kɛ fanan. A ye balanna tulumɛnu ma. A ye tala Alla-lɔnbɛlɛnuna bɛsɛnu kɔla ka kisimiriya-koenu nadan.

¹³A ye mɔgɛnu dɔndɔla a tɔnɔ-koe le la. Wo mɔgɔ-sufa si to a niyi la, wa? Ade. Wo ti to a niyi la bawo a ya n gboyana-koe gbansan le ladan, ado a tɔgɔ si to a nyɛrɛ la.

¹⁴“Ni mɔgɔ-yoge wo ya dan sɔrɔn, a wa a fa kɛ-nya wonu mafɛlɛn kɔnɔ ale ma a fa wo kɛ-nya fenfen bi, a ti faga a fa sɔn-yogomɛla ko la.

¹⁵A sa Isirɛla mɔgɛnuna bɛsɛnu kɔla. A ti bɛsi-kɔ-fan dɔn kan-tina-layan-bɛnu tɔ. A ti bila mɔgɔ-gbɛrɛla musi fɛ.

¹⁶A sa mɔgɔ-niyi ragbɛrɛnna a ma anubɛ a ti a kankan. Ni min ya tulumɛ sigi a ma, a ti balan a ma. A ye kɔnkɔtoenu de-nyinina ka fɛrɛyatoenu fɛrɛya-bɔ.

¹⁷A ye a banna ko-yogoma-kɛ ma. A wa mɔgɔ dɔndɔ, a ti tɔnɔ sa a kuma. A ye nna tɔnnu birala a kilɛ fɛ. Mɔgɛ wo ti faga ka a tɛgɛ a fala hakɛla ko ma. Fɔ a wa to a niyi la, yɔ!

¹⁸Kɔnɔ a fa, wo ya mɔgɔ-bolo-labirɛnu kɛ ka kankanyɛ kɛ. A ya ko-yogomɛ kɛ mɔgɛ bɛɛ la. A tɔgɛ si to ala hakɛnu denu na.

¹⁹“Wo kɛnɛna a fɔla ko, ‘Nfenna ko la, dan kɛ sa tɔrɔla a fala hakɛnuna ko la?’ Wo yabilɛ le ko, ‘Dan wo ya ko-telennɛ anubɛ ko-nyimɛ le ma. A ya nna tɔn bira a kilɛ fɛ, ado fɔ a wa to a niyi la le, yɔ!’

²⁰ Min bi hakɛ kɛla, wo le ye fagala. Dan ti tɔrɔ a fala hakɛla ko la, ado fa fanan ti tɔrɔ ala dan hakɛla ko la. Mɔgɔ-nyimɛ si ata ko-nyima-sarɛ sɔrɔn. Karagbɛlɛ si ata karagbɛlɛya-sarɛ sɔrɔn.

²¹“Ni karagbɛlɛ ya ata karagbɛlɛyɛ boloka ka nna tɔnnu bira, a ni don ko-telennɛ anubɛ ko-nyimɛ-ladan rɔ, a ti faga worɔ. Fɔ a wa to a niyi la.

²²N si nyina a hakɛ bɛɛ ko. A si to a niyi la bawo a ara ko-telennɛ kɛ.

²³Wole miri ko karagbɛlɛ wa faga, wo di nde, wo Tigi Mari ye, wa? Ade. A di n ye le, a ni ko-yogoma-kɛ boloka alako a ni to a niyi la.

²⁴“Kɔnɔ ni mɔgɔ-telennɛ ya a bɔ ko-nyima-kɛ da kɔrɔ, a ni kisimiriya-ko-kɛ dabira iko karagbɛlɛ doinu bi a mala nya min, mɔgɔ-sufa wo si to a niyi la, wa? Ade! A ara ko-nyimɛ min bɛɛsi ma, wo fenfen bɔrɔ ti taran nde, wo Tigi Mari ye. A si faga ka a tɛgɛ ata telenbɛlitayɛ anubɛ a hakɛla ko ma.

²⁵“Isirɛla mɔgɛnu kɛnɛna a fɔla ko, ‘Mari sa ko-telennɛ kun na.’ Kɔnɔ Isirɛla mɔgɛnu ni anu tole masɔ n na. Anu miri ko n bi koenu nadanna nya min, wo ma kin, nyɛ? Anu denuta kilɛ ma telen.

²⁶Ni mɔgɔ-telennɛ ya a bɔ ko-nyimɛ da kun tɔ, a ni don ko-yogoma-kɛ rɔ, a si faga. A tɔgɔ si to ala ko-yogoma-kɛ wo le la.

²⁷Karagbɛlɛ wa fara hakɛ kɛla ka don ko-nyima-kɛ anubɛ ko-telenni-kɛ rɔ, a si a nyɛrɛ niyi lakanan.

²⁸A ya a lɔn a ye min kun na, woletɔ a ya a bɔ wo da kun tɔ. A ti faga kɔnɔ a si to a niyi la.

²⁹Kɔnɔ Isirɛla mɔgɛnu ko nde, Mari sa kila-nyima kun na. Anu denuta kilɛ ma telen.

³⁰“Woletɔ nde, wo Tigi Mari ye a fɔla Isirɛla mɔgɛnu ye ko n si anu dama kiti kelen-kelenyɛ ma iko bɛɛta kɛwɔlɛ ye nya min. Anu ni anu kan-kɔ sɔ anuna karagbɛlɛyɛ bɛɛ la. Anu ka a ma, anuna hakɛ ni anu halaki.

³¹Anu bi karagbɛlɛyɛ min bɛɛ kun na, anu ni anu bole bɔ wo bɛɛ rɔ. Anu ni sɔndɔma-kurɛ anubɛ miriya-kurɛ lana anu burɔ. Nfenna saya-sɔgɛ ye Isirɛla mɔgɛnu na?

³²A ma di n ye, mɔgɛ ni faga. Anu ni anu kan-kɔ sɔ anu hakɛnu na, woletɔ anu si to anu niyi la. Nde, wo tigi Mari kan le kɛ la.”