Read Kuranko Isikiyɛli 19 Bible Online

Isikiyɛli 19 - Kuranko bible

Isikiyɛli 19

¹Mari ya a fɔ n ye ko n ni kinikini-sigi kɛ sa Isirɛla mansa-bɔn ye.

²Yara-makawanɛ le anu na la yarɛnu tɛma. A ya ala dannu makolo yara-kei-makawanɛnu denu tɛma.

³A ya ala dan[8] do makaran donsoyɛ la ha wo mara mɔgɔ-dɔnnɛ la.

⁴Mɔgɛnu ya mɔgɔ dɔnnɛ kɛ wara-koe lamɔɛn tumɛ min, anu ya a bira denkɛ rɔ. Anu ya yɔlɔkɛ kɛ a ma ka ta a saganna dugi la ha Iyipiti nyamanɛ rɔ.

⁵A na mɛra a makɔnɔna furr ha a yisi bɛɛ tinyara a wara-koe rɔ. Wo kɔma, a ya ala dan[9] doi wo makaran donsoyɛ la. Wo fanan mara yara-makilannɛ la.

⁶A kofura yarɛ doinu ma, ado wo fanan mara mɔgɔ-dɔnnɛ la.

⁷A ya so-latankanɛnu tinya ka soe donu kasara. A wa bɔrɔndɔ-bɔrɔndɔ nun tumɛ min, nyamanita-mɔgɛnu kun ma si kɔ.

⁸Sibolo-siyaman ya anu kundɛn a kan ma ka bɔ kan tinɛ bɛɛ rɔ. Anu ya anuna donsoya-yalɛnu tafulen ha anu ya a bira sɔɛn!

⁹Anu ya yɔlɔkɛ kɛ a ma ka a ladon sansan burɔ ka ta a don Babilɔn mansɛ bolo. Anu ya a sa yele la ka a kandan alako a bɔrɔndɔ-bɔrɔndɔ-kan wo ni ban Isirɛla kɔnkɛnu tɔ feufeu!

¹⁰Nɔnbɛ le anu na la min kinɛ yi-dɛ la. Ka a tɛgɛ yi-banba-wɛ wo ma, nɔnbɛ wo la ti kolonya a yanba-koe anubɛ a gbɔ-koe rɔ.

¹¹A bolɔnnu fasa ha anu mara mansaya-kɔnnu na. Nɔnbɛ wo yɛlɛta furr, ha a tugura san-kole la. Ka a tɛgɛ a yanbɛla siyayɛ anubɛ ala yanyɛ ma, mɔgɛ bɛɛ ya a yen.

¹²Kɔnɔ yisi-bɔɛ le ya a ma, anu ya a wurun ka a gbesi dugu la. Fɔn-kalamɛ ya a gbɔɛnu gbala ha a bolɔnnu kara a ma. Minnu gbalata, tɛ ya wonu mintan.

¹³Kaka, a kinɛ kɛnkɛn le tɔ dugu-gbalanɛ rɔ yi sa kan min.

¹⁴Tɛ birara a kuri la ha wo ya a bolɔn anubɛ a gbɔɛnu mintan. A bolon fenfen ma to tun min si ma mansaya-kɔn la. Kinikini-sigi le kɛ la, anu si min sa sayɛ kuma diyi-kɛ la anu bolo.