Read Kuranko Isikiyɛli 2 Bible Online

Isikiyɛli 2 - Kuranko bible

Isikiyɛli 2

¹A ko, “Ile hadama-dan, i lasɔ. N ni kuma i ye.”

²N tole tora kumɛ wo la, Marita Sɛnbɛ donta n tɔ ka n nasɔ. N tora kuman-kan wo lamɔɛnna.

³A ye a fɔla ko, “Ile hadama-dan, n bi i sɔla Isirɛla mɔgɛnu bara. Anu bara murutiya ka anu kan-kɔ sɔ n na, ado ha bi, anu bi murutiyɛ wo le kun na iko anu benbanu.

⁴Anu tole gbɛlɛ, ado anu sa n gbiliyala. Woletɔ n bi ile kilayala anu ma ko nde, wo Tigi Mari Alla ye min fɔla, i ni wo latenbi anu ma.

⁵Anu banta, anu sɔnta, fɔ anu ni a lɔn yati, ko nɛbi ye anu tɛma.

⁶“Kɔnɔ ile hadama-dan, i kana kilan anu na muk! I kana kilan anuna kumɛ la. Anu si tɛgɛ i rɔ ka bila i la. A si ma i bolo iko i siginɛ bondalɛ anubɛ wɔnɛnu denu tɛma. Kɔnɔ hali wo, i kana kilan mɔgɔ-murutiyanɛ kɛnu yɛ la. I kana kilan anuna kumɛ la.

⁷Nde ye min fɔla i ye, i ye tala wo le fɔla anu ye dɔrɔn, a biranɛ anubɛ a birabɛlɛ anu bolo bawo anu murutiyanɛ le.

⁸“Ile hadama-dan, i tole masɔ nna kumɛ la. Ile kana murutiya iko anu denu. N bi nala min dila i ma, i ni i dɛ laka wo dɔn-tinɛ.”

⁹ N ya bole yen nala n telen tɔ, gbolo-masɛbɛnɛ ye a rɔ.

¹⁰Bole wo ya gbole wo rafulen n yakɔrɔ. N ya sɛbɛli kɛnɛ yen a ya filɛ bɛɛ ma. Fenfen sɛbɛnɛ sa a rɔ fɔ di-kɛ-kumɛnu, gbalo-kumɛnu anubɛ yisi-lafin-kumɛnu.