Read Kuranko Isikiyɛli 21 Bible Online

Isikiyɛli 21 - Kuranko bible

Isikiyɛli 21

¹Mari ya a fɔ n ye ko,

²“Ile hadama-dan, i yɛ lata Yerusalɛm soe ma. Kuma anu ma anubɛ anuna batoli-tinɛ fanan ma. I ni Isirɛla mɔgɛnu makawandi

³ko anu yoge le nde, Mari la. N si nna faan sagan a lɛɛ rɔ ka anu damasi faga, a mɔgɔ-nyima wo, a mɔgɔ-yogoma wo.

⁴N si bɔ mɔgɛnu fagala nna faan la ka bɔ dugula nyamanɛ ha kantɔ.

⁵Bɛɛ si a lɔn wo le ma ko n bara nna faan sagan a rɔ anu kan ma, ado n ti a lasɛgi tun a lɛɛ rɔ.

⁶“Ile hadama-dan, i ni i dɛ sa-a-rɔ iko mɔgɛ yisi wa tinya gbɛlɛyɛ bolo. I ni i dɛ sa-a-rɔ kinikinɛ ma, bɛɛ si i ragbɛ kan min.

⁷Anu ba i manyinika ko, ‘Nfen mara?’ I ni a fɔ ko, ‘N bara kuman-kan min namɔɛn, a tɛgɛnɛ wo le ma. Tɔrɔyɛ wo wa na tumɛ min, kilan si anu kumakɔ, anu bole si faga a la, anuna kerinteyɛ si anu baya, anu kian si to yɛrɛyɛrɛnna anu kɔrɔ, ado wo wati ara ke.’ ” Ale n Tigi Mari kan le kɛ la.

⁸Mari ya a fɔ n ye tun ko,

⁹“Ile hadama-dan, n kuman-kan kɛ latenbi mɔgɛnu ma, n ko, ‘Faan do ye nyɔ min dɛ ye a la, ado a ye malan-malanna.

¹⁰A dɛ lasanɛ mɔgɔ-faga-koe le la. A masusanɛ alako a ni malan-malan iko san-sɛran. Bawo nta mɔgɛnu ya nna makawandili-kumɛ anubɛ tɔrɔyɛ bɔrɔbɔ min kɛ, sewɛ ti taran kan-bo-kan.

¹¹Faan wo masusani de a lawɔli-koe la. A dɛ lasanɛ, a ye malan-malanna, alako ka a don mɔgɔ-fagalɛ bolo.’

¹²Ile hadama-dan, i dɛ sa-a-rɔ di-kɛ-tinɛ. Faan kɛ ye nna mɔgɛnu denu kan ma, yɔ, ado a ye Isirɛla kun-tiginu fanan kan ma. Wonu fanan bi fagala le iko mɔgɛ doinu. I sisi ratugu yisi-tinya bolo.

¹³N bi nna mɔgɛnu tasumanna. Ni anu si anu ban tubi-koe le ma, koe kɛ bɛɛ si sigi anu ma.

¹⁴“Ile hadama-dan, i tenbi wɔlɔyiya-kumɛ fɔla, i ni i bole rafɔ. I wa i bole rafɔ, faan si yigi kinyama-siyaman ka mɔgɛnu faga. Bɛɛ si kilan faan wo la.

¹⁵Wo si mɔgɛnu kumakɔ. Anu si to yɛrɛyɛrɛnna. N bi soe rakilanna faan min na, wo si malan-malan iko san-sɛran, ado a rabɛnnɛ mɔgɔ-faga-koe la.

¹⁶Ile faan dalamɛ, i ni mɔgɔ-fagɛ-kɛ i bolo-nyimɛ anubɛ i bolo-maran rɔ. I wa i tintan kan min bara la, i ni fagalɛ kɛ nyɔ.

¹⁷Nde fanan ba n bole rafɔ, nna yisi-bɔɛ si ban. Nde, Mari kan le kɛ la.”

¹⁸Mari ya a fɔ n ye ko,

¹⁹“Ile hadama-dan, i ni kila fila yabɔ Babilɔn mansɛ anubɛ ala faan si tenbi kan min. Kila filɛ kɛ bɛɛ da ni bira nyamani kelen tɔ. I ni mandan do sɔ kila-tangbɛ rɔ

²⁰min si Amonnuna soe Raba yira mansɛ la. Mandan wo si Yuda kɛnuna so-latankanɛ Yerusalɛm yira ale mansɛ fanan na.

²¹Babilɔn mansɛ wa ke kila-tangbɛ wo ma, a si nya-nyini-kɛ kalabɛnnu na alako a ni a lɔn, ni a si ta kilɛ min fɛ. Wo kɔma, a si ala bɛsɛnu manyinika ka bolo-tafɛlɛn benya la alako ni a si kilɛ lɔn nya min.

²²Nba! Kalabɛn min bi a bolo-nyimɛ rɔ, wo ya Yerusalɛm kilɛ yira a la. Wo ye a fɔla a ye ko a ni tarɛ da-keri-fan sɔ Yerusalɛm soe kan ma. Wo kɔma, ale mansɛ si to worondola ka kɛlɛ-matɔgɔ-kumɛnu fɔ. A si bɔnkɛ layɛlɛ soe wo tarɛ ma alako mɔgɔ-siyaman ni yɛlɛ tarɛ ma kɛlɛ-kɛ-tinɛ soe wo burɔ.

²³Yerusalɛm kɛnu si tɛrɛna ile, Isikiyɛlita kumɛ la bawo anu hɛnkili latɛgɛnɛ sarama-kan ma anu tɛma nun. Kɔnɔ ila kumɛ si anu nalɔn anuna hakɛla ko ma ka anu makawandi anu don-koe biralɛ rɔ.

²⁴Woletɔ nde, wo Tigi Mari ye a fɔla ko anu hakɛnu bara bɔ gbɛ rɔ. Anu kɛ-nya bɛɛ ye a yirala ko hakɛ-tigi le anu dama la. Anu yilikinɛ le sɔnɛ wo la, ado n si anu don anu yogenu bolo.

²⁵“I ni a fɔ Isirɛla mansɛ ye ko nde, wo Tigi Mari kan le kɛ la. Ale Isirɛla mansa-yogomɛ, min sɛninyabɛlɛ ni a makɔnɔ tun. Ata tɔrɔyɛ ye a kɔma. Ale nyɛrɛ ni ala mansaya-fulɛ wo pope a kunyɛ la. Fenfen ra ti kɛnya tun! Bolo-kolɔnnu si ma sɛnbɛ-tiginu na. Sɛnbɛ-tiginu si ma yɔɔnnu na.

²⁷N si anuna so-karantan ma tonbɔn la. Kɔnɔ kɛ ti ma fɔ n ya mɔgɛ min yabɔ soe kɛ tɔrɔ-koe la, wo wa na. Wo kɔma, n ni na to soe latenbila a tɔrɔlɛ ma.”

²⁸ Mari ya a fɔ tun ko, “Ile hadama-dan, nde, wo Tigi Mari ye nala min fɔla Amonnu ye kɛ la, i ni wo latenbi anu ma bawo anu bi Isirɛla mɔgɛnu tasɛla kati! A fɔ anu ye ko, ‘Faan do ye wo tinya kan ma. A masusanɛ mɔgɔ-faga-koe la. A ye malan-malanna iko san-sɛran.’

²⁹“Wole Amonnu, wo ya ko-rayirɛ minnu yen, tonya sa wonu tɔ. Wo ye sinan-kumɛ minnu fɔla, foninyɛ le wo bɛɛ la. Wo wunduyogo kosɛbɛ, ado wati ye nala, wo si wota tɔrɔya-laban sɔrɔn. Faan ye nala wo kunyɛnu tɔnbɔnna a daga rɔ.

³⁰“Wole Amonnu, wo ni wola faannu nasɛgi anu lɛɛnu tɔ. N si wo kiti wo sɔrɔn-nyamanɛ rɔ.

³¹N ba nna diminyɛ labɔ wo ma iko ta-mɛlan, wo si a lɔn. N si wo kunyɛ don yisi-gbɛlɛtenu bolo minnu si wo faga boloko-yogomɛ-kɛ.

³²Tɛ si wo tinya. Wo yele si yigi wo halala-nyamanɛ rɔ, ado wo wara-koe la si nyina mɔgɛ bɛɛ la.” Mari kan le kɛ la.