Read Kuranko Isikiyɛli 22 Bible Online

Isikiyɛli 22 - Kuranko bible

Isikiyɛli 22

¹Mari ya a fɔ n ye tun ko,

²“Ile hadama-dan, i rabɛnnɛ ka Yerusalɛm soe kiti, wa? Soe wo lafanɛ mɔgɔ-fagalɛnu na! Kisimiriya-koe min bɛɛsi ye mala a rɔ, fɔ i ni wo lagbɛ ala mɔgɛnu ye.

³Nde, wo Tigi Mari kan kɛ latenbi Yerusalɛm soe wo ma ko a ara ala mɔgɛnu faga-siyamɛ-kɛ min kɛ kɛ la, ka a nyɛrɛ latinya bɛsi-kɔ-koe fɛ, ata wati ye nala.

⁴A yilikinɛ mɔgɔ-fagɛ kɛla ko la. A ara a nyɛrɛ latinya bɛsi-kɔ-koe la. Woletɔ ale fananta wati ara ke. Wo le ya a ma, sibole doinu donta a manyinɛ rɔ. Nyamani-gbɛrɛkɛ-mɔgɛnu bi a rasɛla.

⁵Nyamanɛ min bi a dala wo, nyamanɛ min bi wula-yan la wo, wo bɛɛ ye a rasɛla ka a tɛgɛ ala tɔn-birabɛlitayɛla ko ma.

⁶Isirɛla kun-tiginu ma la fenfen na fɔ anu nyɛrɛta sɛnbɛ. Wo kɔma, anu ya mɔgɛnu faga.

⁷ Mɔgɔ-wo-mɔgɔ sa Yerusalɛm soe burɔ min si a sɔrɔnnɛnu gbiliya. Ala mɔgɛnu bi sundannu bolo labirala. Anu bi kelennɛnu anubɛ kɛɛ-musinu bolo labirala.

⁸ Anu sa kan-tina-sɛnimɛnu gbiliyala. Anu sa Sulen-Tele birala a kilɛ fɛ.

⁹Donu bi tɔgɛ sala anu ta-nyɔgɛnu na alako anu ni wonu faga. Donu bi bɛsi-kɔ-fannu dɔnna. Donu bi nyɔ ka kisimiriya-koenu nadan tolon!

¹⁰ Donu bi kila anu fanuna musinu fɛ. Musi tenbi ala wati rɔ, donu bi wonu fɔrɔsɛla sa-koe la.

¹¹Donu bi anu tɛma, anu bi yɛlɛnyɛ kɛla mɔgɛnuna musinu fɛ. Donu bi anu sala anu mama-nyaganɛ anubɛ anu fa-kelen-tirisannu fɛ.

¹² Anu bi donu sarala mɔgɛnu faga-koe la. Donu bi tɔnɛ sala anuna yili-donnɛnu kuma anu ta-nyɔgɔn Isirɛla mɔgɛnu bolo, ado donu bi mala-a-la wo le tɔ. Anu bara nyina nde, Mari ko. Nde, anu Tigi Mari kan le kɛ la.

¹³“N si n bolo-nɔlɔnɛ laperepere ka a yira ko n ma sɔn anu bolo ka a tɛgɛ anuna kankanyɛ anubɛ mɔgɔ-fagɛ ma.

¹⁴N ba anu tɔrɔ, anu si la a la ko anu si anu kerinteya ka sɛnbɛ sɔrɔn wo rɔ tun, ba? Nde, Mari kan le kɛ la, ado n ti n nyɛrɛ sɔsɔ.

¹⁵N si anu tanyɛnsɛn nyamanɛ bɛɛ rɔ. N si tɔn sigi anuna wunduyogoyɛ ma.

¹⁶Wo le si a ma, sibolo-gbɛrɛnu ni anu nafɛya. Anu bi a lɔnna wo le ma ko Mari le nde la.”

¹⁷Mari ya a fɔ n ye ko,

¹⁸“Ile hadama-dan, n mako sa Isirɛla mɔgɛnu na tun mumɛ! Mɔgɛ wa wodi-gbɛ lalee sulubondɔn rɔ, Isirɛla mɔgɛnu mani de iko a boe min bi tola a kɔrɔ, a mara sila la wo, a mara nɛgɛ-su-gbɛrɛkɛ la wo, a mara dandakuyi la wo. N mako sa wonu fenfen na.

¹⁹Nba nde, anu Tigi Mari ye a fɔla Isirɛla mɔgɛnu ye ko anu bɔrɔbɔni de n ye iko wodi-gbɛ-boe wonu. N si anu denu kundɛn kan-tina-kelen Yerusalɛm

²⁰iko mɔgɛ ye nɛgɛ-subolo-siyamɛnu nadɛnna nya min ka wonu nalee nta sulubondɔn rɔ, Yerusalɛm, kɔni. Nna diminyɛ si Isirɛla mɔgɛ wonu nalee iko tɛ si nɛgɛ lalee nya min.

²¹Tonyɛ le, n si anu damasi ladɛn Yerusalɛm ka tɛ sigi anu kɔrɔ ka anu nalee nna diminya-wɛ la.

²²Anu si lee Yerusalɛm soe burɔ bandin, iko wodi-gbɛ si lee nya min sulubondɔn rɔ. Anu bi a lɔnna wo le ma ko nde, Mari ara kɔrɔtɔ anu ma.”

²³Mari kumara n ye tun, a ko,

²⁴“Ile hadama-dan, i ni a fɔ Isirɛla mɔgɛnu ye ko anuna nyamanɛ sɛninyani ma. Woletɔ n yisi ye bɔla anuna nyamanɛ kan ma ka a tɔrɔ.

²⁵Iko yara-kɔnkɔtoe si soge lapɛrɛn nya min, Isirɛla kun-tiginu bi yanfɛ kirila mɔgɛnu kan ma wo nya na le. Anu bi mɔgɛnu fagala ka anu kɛɛ ladɛn anu nyɛrɛ ye, ado anu bi musu-siyaman tola kɛɛ rɔ.

²⁶ Anuna saraka-masɔlɛnu bi tɔnnu tinyana ka ko-sɛnimɛnu nafɛya. Dan-nafara ma taran fen-sɛninyanɛ anubɛ fen-sɛninyabɛlɛnu tɛma anu yala. Anu sa mɔgɛnu karanna ka a lɔn ni Allatɛ ye min na anubɛ ni mɔgɛnutɛ ye min na. Sulen-Tele bira-koe bɔrɔ-wo-bɔrɔ sa anu ye. Ka a tɛgɛ anu sɔn wonu ma, n ma gbili Isirɛla mɔgɛnu ma tun.

²⁷Anuna nyamanita-mɔgɔ-banu mani de iko suluki minnu bi soge rafarala anu nyɔgɔn tɛma. Anu bi mɔgɔ-fagɛ kɛla alako anu ni ma-a-la.

²⁸Iko mɔgɛ wa bɔnku-gbɛ layɛlɛ dandan ma alako ka a tinya-tinɛnu yamatogon, anuna nɛbinu kɛnɛna mɔgɔ-ba kɛnu hakɛ dogonna wo nya na le. Anu bi foninya-ko-rayirɛ kɛla. Anu bi foninya-wɔlɔyiya-kumɛnu fɔla. Anu kɛnɛna anu nyɛrɛ mala iko nde, anu Tigi Mari le kumala anu ye kɔnɔ anu foni fuss! Nde ma kuma-wo-kuma fɔ anu ye.

²⁹Anuna fen-tiginu bi mɔgɔ-bolo-labirɛ anubɛ kankanyɛ le kun na. Anu bi bolo-kolɔnnu bira boloko-yogomɛ-kɛla. Anu bi sundannu kensunyala.

³⁰Mɔgɛ min si ke tara-kerinɛ wo sɔla hali ka soe lakanan tara-kerinɛ wo dafɛ, n ya n ya lakalan wo do ma anu tɛma. Ni n ya wo mɔgɛ sɔrɔn nun, n ti soe wo kasara. Kɔnɔ n ma wo mɔgɛ sɔrɔn.

³¹Woletɔ n si n yisi labɔ anu ma. N si don anu tɔ iko tɛ ka a tɛgɛ anu kɛ-nya-yogomɛnu ma. Nde, wo Tigi Mari kan le kɛ la.”