Read Kuranko Isikiyɛli 26 Bible Online

Isikiyɛli 26 - Kuranko bible

Isikiyɛli 26

¹ Mala birɛ san tan-ni-fila,[12] wo karɛ tan-ni-kelen, tele fɔlɛ ma, Mari kumara n ye ko,

²“Ile hadama-dan, Taya so-burɔ-mɔgɛnu bi anu diyala-a-la ko Yerusalɛm ara tinya pɔ! Anu bi a fɔla ko Isirɛla nyamanɛ min mara duninya bɛɛ yilaya-dɛ la nun, wo ara tinya. Anu ko anu denu si Isirɛla gbɛ bi gbɛ!

³“Woletɔ nde, wo Tigi Mari ko ale Taya kɛnu yoge le nde la. N si sibolo-gbɛrɛkɛ donu nana anu kan ma. Wonu si to tugula anu kuma iko kɔgɔ-yi min bi tugula a rɔ.

⁴Wonu si anuna soe tarɛnu keri ka anuna kan-tina-layan-bɛnu fanan tii. A gbangban min tonɛ, n si wo bɛɛ firan ka fara-makolɔn to.

⁵Yɛgɛ-fagalɛnu si anuta yalɛnu tagbala farɛ wo ma kɔgɔ-yi dafɛ. Nde, wo Tigi Mari kan le kɛ la. Sibolo-gbɛrɛnu si na bui Taya kɛnu ma ka anu bolo-fan bɛɛ toronde anu na.

⁶Anu si belenna anu fagala soenu tɔ hali minnu sa yi dafɛ. Wo kɔma, Taya kɛnu si na a lɔn ko nde le Mari la.

⁷“Nde, wo tigi Mari ko Babilɔn Mansa Nɛbukanasa min mankan kolo mansɛ bɛɛtɛ ko, n si wo latugu ale Taya kɛnu ma. A si bɔ kantɔ-wara la kɛlɛ-den-siyaman na a bolo anubɛ soeenu anubɛ kirindinu.

⁸Minnuna soenu sa yi dafɛ, wonu kunyɛ si to kɛlɛ rɔ bofe! Anu yogenu si bɔnkɛ ladɛn anuna tarɛnu ma alako anu si ke yɛlɛla tarɛ ma nya min anu kɛlɛ-koe la. Anuna nɛgɛ-walannu si ma Taya kɛnu yala iko dandan-gbɛlɛ-wɛ.

⁹Anu si anuna soe tarɛnu keri tara-keri-fannu na ka anuna nyamanɛ kumafɛlɛn-kan-tina-layan-bɛnu keri nɛgɛ-gbelekɛnu na.

¹⁰Anuna soee wonu kinta-gbangban si Taya kɛnu yamatogon. Anuna soeenu anubɛ kirindinu kinta-kan si anuna soe tarɛnu nayɛrɛyɛrɛn anu tenbi donna anuna so-kasaranɛ rɔ.

¹¹Anuna so-laburilɛnu si so-burɔ-mɔgɛ wonu nagbesi. Anu ni to mɔgɛnu fagala anuna faannu na belenna. Anuna sɛnbɛrɛn-kɔn-tagbɛlɛmɛ wonu si bui dugi ma.

¹²Anu yogenu si na anuna nɔnfuli anubɛ anuna yilaya-fan bɛɛ bi anu bolo. Anu si anuna bon-hakikɛnu tinya ka a dandannu keri. Anu si anuna kurinu anubɛ anuna fɛrɛn-kundinu anubɛ bon-buriburinu nakɛ a rɔ kɔgɔ-yi rɔ.

¹³ N si tɔn sigi anuna sigi-sɛnu anubɛ anuna sɔrɔn-fɔɛnu na.

¹⁴N si nyɔ ma iko fara-gbaran-makolɔn, yɛgɛ-fagalɛnu ni to anuna yalɛnu tagbalala kan min. Mɔgɔ-wo-mɔgɔ ti ke soe wo sɔla a kurɛ la tun. Nde, wo tigi Mari kan le kɛ la.

¹⁵“Nde, wo tigi Mari ya kɛ le fɔ Taya soe wara-koe rɔ tun. N ko anu yogenu tenbi anu fagala tumɛ min, anu si to kurunna. Nyɔ-dafɛ-mɔgɛ minnu siginɛ kɔgɔ-yi dala wa anu kurun-kan lamɔɛn, wonu si to yɛrɛyɛrɛnna kumakɔɛ bolo.

¹⁶ Sibolo-gbɛrɛ-mansɛ minnu siginɛ yi dala, wonu si bɔ anuna mansaya-sigi-fannu tɔ ka anuna mansaya-durukinu bɔ anu kan na. Anu si anuna duruku-bonnɛnu bɔ anu kan na ka to yɛrɛyɛrɛnna dugu-kole kuma. Dan ti taran anuna yɛrɛyɛran la ka a tɛgɛ Taya kɛnu kasara nya ma.

¹⁷Anu si saya-sigi kɛ sa Taya kɛnu ye ko, So-makawanɛ kɛ ara kasara. Ala yi-kuma-kulɔnnu bara firan yi kuma. So-burɔ-mɔgɛ kɛnu ya kɔgɔ-yi don anuna marɛ kɔrɔ nun gbede-gbede! Kɔgɔ-yi-dafɛ-sigilɛnu ya wo bɛɛ kumakɔ.

¹⁸Kɔnɔ soe wo ara bui tele min tɔ kɛ la, wo ara a ma, yi-tɛma-dugi-mɔgɛnu bi yɛrɛyɛrɛnna kilan bolo, ado anuna mɔgɛ bɛɛ ma ara lɔfɔkɔrɔya.

¹⁹“Nde, wo Tigi Mari si ale Taya soe lakolonya iko tonbɔn. N si kɔgɔ-yi-dumɛ bi ka a yamatogon wo la.

²⁰N si Taya kɛnu layigi lakira ka anu kofu nyɔ-dugurɛn-kɔrɛnu ma. N si a ma, anu ni to dugu-kɔrɔ-soe wo rɔ tolon! Anubɛ furinu si to kirabɔla anu nyɔgɔn fɛ lakira nyɔ. Mɔgɔ-wo-mɔgɔ ti sigi Taya soe burɔ tun. Anu ti sɔ-tina fenfen sɔrɔn tun mɔgɔ-nimɛnu tɛma.

²¹ N si ale Taya ma misali-makilannɛ la. Wo si ma ala ban la. Hali mɔgɛnu ba anu ya lakalan a ma, anu ti a yen tun! Nde, wo Tigi Mari kan le kɛ la.”