Read Kuranko Isikiyɛli 27 Bible Online

Isikiyɛli 27 - Kuranko bible

Isikiyɛli 27

¹Mari ya a fɔ nde, Isikiyɛli ye ko,

²“Ile hadama-dan, i ni saya-sigi sa Taya kɛnu ye.

³Taya soe sɔnɛ kɔgɔ-yi dafɛ le, ado anubɛ kɔgɔ-yi-fɛ-mɔgɛnu bi yilayɛ la anu nyɔgɔn tɛma. I ni nde, wo Tigi Marita kumɛ latenbi Taya kɛnu ma ko Taya soe taranta a diya la ala kinya-belebele-wɛ la.

⁴A warɛ le kɔgɔ-yi la. Minnu ya a sɔ, wonu ya a lakinya iko yi-kuma-kulun-hakikɛ ladannɛ nya min.

⁵Anu ya kulɔn wo ladan fɛrɛn-hakikɛ minnu na, wonu bɔra Hɛrɔman kɔnkɛ le tɔ. Anu ya Lɛbanan-sida-kɔlɔma bi ka a ma kulɔn wo fani-bira-kɔn la.

⁶Anu ya Ɔki kɔlɔmanu bɔ Basan nyamanɛ rɔ ka kɔn-gbɛlɛmɛ wonu ma kulɔn wo laburi-fannu na. Anu ya pain-fɛrɛn-hakikɛnu bɔ Saiparasi yi-tɛma-dugi rɔ ka wo ma kulɔn wo kole-ladan-fan la ka sogo-ba-nyin basan wo la tala.

⁷Linɛn-kurɛ le manɛ anuna kulun-naburu-kurɛ la. Anu bɔra wo bonnɛ la Iyipiti nyamanɛ le tɔ, ado a si yen de wula-yan la. Anu ya kura-bilolamɛ bɔ Saiparasi yi-tɛma-dugi rɔ ka wo ma kulun-burɔ-fani-bɔn la.

⁸Taya kɛnuna kulun-wurelɛnu bɔra Saidon anubɛ Arifadi soenu tɔ. A nyɛrɛta boloma-wɔli-kɛlɛnu mara mɔgɔ-banu na kulɔn rɔ.

⁹Kulɔn kɛ sɔlɛnu bɔra Kibali soe le tɔ minnu kusan kati! Kulun-tawɔli-kɛlɛnu taranta fere kɛla Taya so-burɔ-yilanu ma.

¹⁰“Taya kɛlɛ-dannu bɔra nyamani-kurɔn kɛnu denu tɔ, Pasiya wo, Ludi wo, anubɛ Libiya. Anu ya anuna nɛgɛ-walannu anubɛ anuna nɛgɛ-fulɛnu dun Taya kɛnuna kɛlɛ dagɛ rɔ, ado anu denu denu ya wo tɔgɛ lawanka.

¹¹Arifadi kɛlɛ-dannu ya Taya so-tarɛ kandan. Kamadi kɛlɛ-dannu ya nyamanɛ kumafɛlɛn-kan-tina-layan-bɛnu kandan. Anu ya anuna nɛgɛ-walannu dun Taya so-dandannu ma. Anu denu denu ya Taya soe mafɛlɛn lakinya.

¹²“Taya kɛnu ya yilaya-subolo-siyaman kɛ Sipeni nyamanɛ rɔ. Wonu ya anuna wodi-gbɛ anubɛ dandakuyi anubɛ nɛgɛ-subolo donu felen anu ma.

¹³Kiriki nyamanɛ wo, Tubali nyamanɛ wo, anubɛ Misɛki nyamanɛ wonu ya yɔɔnnu anubɛ sila-mirannu felen ale Taya kɛnu ma.

¹⁴Anubɛ Bɛti-Togarama kɛnu ya yilayɛ kɛ anu nyɔgɔn tɛma. Anu ya sɛnɛ-kɛ-wɔli-soeenu anubɛ kɛlɛ-kɛ-soeenu anubɛ sofɛlɛ su donu felen anu ma.

¹⁵Taya kɛnu anubɛ Didan kɛnu ya yilayɛ kɛ anu nyɔgɔn tɛma, ado kɔgɔ-yi-dafɛ-sigilɛnu taranta sogo-ba-nyin anubɛ ɛbɔni-kɔlɔmanu felenna Taya kɛnu ma fan donu na.

¹⁶Anubɛ Siriyanu ya yilaya-siyaman kɛ anu nyɔgɔn tɛma. Dugu-kɔrɔ-nɔnfulu-wulenmɛ anubɛ a finmɛ wo, kura-bilolamɛ wo, kura-bonnɛnu wo, linɛn-kura-hakikɛnu wo, anubɛ yi-kɔrɔ-kuru-da-gbɛlɛmɛ, anu ya wonu felen Taya kɛnu ma.

¹⁷Fui-fen wo, liyi wo, ɔlifi-tulu wo, anubɛ kɛnɛ wo, Isirɛla anubɛ Yuda kɛnu ya wonu felen Taya kɛnu ma.

¹⁸Anubɛ Damasika kɛnu ya yilayɛ kɛ anu nyɔgɔn tɛma. Anu ya Halibɔn soeta gbɛɛ anubɛ Sahari soe saga-siyi felen Taya kɛnu ma. Anu ya nɛgɛ-da-gbɛlɛ anubɛ kɛnɛ-subolo-siyaman felen Taya kɛnu ma.

²⁰Anubɛ Didan kɛnu ya yilayɛ kɛ kirikɛ-kɔrɔ-sa-kurɛnu[13] na.

²¹Arebiyanu anubɛ Kedari mɔgɔ-banu ya yilayɛ kɛ Taya kɛnu ma. Anu ya sagɛnu anubɛ saga-dannu anubɛ baanu felen Taya kɛnu ma.

²²Siba kɛnu anubɛ Reyama kɛnu ya kuru-da-gbɛlɛnu anubɛ sɛnɛ anubɛ kɛnɛ-hakikɛnu felen Taya kɛnu ma.

²³Hɛran soe wo, Kanɛ soe wo, Idɛn soe wo, Siba yilanu wo, Asuri soe wo, anubɛ Kalimadi soe wo, wonubɛ Taya kɛnu ya yilayɛ kɛ anu nyɔgɔn tɛma.

²⁴Fɛrɛya-bɔ-hakikɛ wo, kura-bilolamɛ wo, kura-bonnɛ wo, bon-kolo-masa-fen-nyimɛ minnu manyɛgannɛ wo, anubɛ yili-kolo-subolo-siyamɛ, anu ya wonu felen Taya kɛnu ma.

²⁵ Kulun-belebele-wɛnu tara anuna yilaya-fan wonu na. “Taya soe mani de iko kulɔn min bi kɔgɔ-yi rɔ. A lafanɛ penpen!

²⁶Kulɔn wo wurelɛnu tara a la kɔgɔ-yi tɛma tumɛ min, tele-bɔ-fɔnyɔ ya a tinya yi tɛma den!

²⁷A kulunta-nɔnfulu-siyamɛ wo, a kulun-tawɔli-kɛlɛnu wo, a ladannɛnu anubɛ yilanu wo, a kɛlɛ-dannu wo, kulɔn wo tinyanta tumɛ min, wonu damasi tora yi rɔ.

²⁸Kulun-tawɔli-kɛlɛ minnu tora yi rɔ, wonu di-kɛ-kan kera yi-dafɛ-mɔgɛ bɛɛ ma.

²⁹“Kulɔn wo bɛɛ rakolonyara tɛrr! Kulun-tawɔli-kɛlɛ bɛɛ yɛlɛta gbole ma.

³⁰Anu bi dila ale Taya soela ko la biribiri! Anu bi gbangban kɛla anu kunyɛ rɔ ka anu sa bugurɛ rɔ di-kɛ-tinɛ.

³¹Anu bi anu kunyɛ gbanana ala ko la ka kasa-kore kɛ anu kan ma. Anu bi diyi kɛ kun na, anu yisi fanan tinyanɛ.

³²Anu bi saya-sigi sala kulɔn wo ye ko, ‘Yon si sanka Taya soe ma, min bara-koe ara ka-a-la kɔgɔ-yi rɔ, kɔni?

³³Ata yilaya-fannu ba ta yi kɔma nun, wonu si nyamanɛ bɛɛ madɛnbɛn de! Mansɛnu mara nɔnfulu-tiginu na ka a tɛgɛ anu ya nɔnfuli min sɔrɔn Taya kɛnuna yilaya-fannu tɔ.

³⁴Kɔnɔ kulɔn tora kɔgɔ-yi rɔ. A ara yigi kɔgɔ-yi-dumɛ-kole la saru! A bolo-fannu anubɛ ala wɔli-kɛlɛ bɛɛ, wo bɛɛ kunyɛ ara to-a-rɔ a fɛ kɔgɔ-yi rɔ.’

³⁵“Kɔgɔ-yi-fɛ-sigilɛnu kawara Taya ban-bolo-su kɛ ma. Hali anuna mansɛ bɛɛ kumakɔra. Kilan si yen anu yakɔrɛ bɛɛ ma.

³⁶A ara tinya pɔ, ado duninyama-yila bɛɛ ara kilan. A ti sɔ tun habadan!”