Read Kuranko Isikiyɛli 29 Bible Online

Isikiyɛli 29 - Kuranko bible

Isikiyɛli 29

¹Mala birɛ san tan nyɔgɛ wo karɛ tan nyɔgɛ tele tan-ni-filɛ ma, Mari kumara n ye ko,

²“Ile hadama-dan, i ni i ya-lamunun Iyipiti mansɛ ma ka a makuma. Ale Iyipiti mansɛ anubɛ ala nyamanɛ wo si tɔrɔ nya min, wo fɔ anu ye.

³Nde, i Tigi Marita kilayɛ kɛ latenbi a ma ko a yogo-finyɛ le nde la. Mɔgɔ-dɔn-banbɛ le ale mansɛ la min sanɛ bɛ rɔ. A ye a fɔla ko atɛ le Nayɛli bɛ la iko ale le ya a ladan.

⁴N si lunyɛ bila a gban rɔ, yɛgɛnu ni tɔnsɔn a la. N si anubɛ yɛgɛ wonu nabɔ Nayɛli bɛ rɔ.

⁵Wo kɔma, n si anubɛ yɛgɛ wonu nafili wulɛ rɔ pirr! A si to sani dugu ma wo nya tasakara, ka a togonbɛlɛ to! N si a latenbi soge anubɛ konanu ma. Wonu si to a dɔnna nyɔ.

⁶ Iyipiti kɛnu si a lɔn wo le ma ko Mari le nde la.” Mari ko, “Isirɛla mɔgɛnu hɛnkili latɛgɛnɛ Iyipiti kɛnu ma anu dɛnbɛn-koe rɔ kɔnɔ a mani de dɔrɔn iko puka-sewuri.

⁷Anu ba anu gbɔnkun ale Iyipiti rɔ, a ra si keri ka sɔrɔngbɔ anu kɛɛ kɔrɔ ka kɔ-dumɛ di anu ma. Anu ya anu takeri wo kuma nyɔ gbass!

⁸Woletɔ nde, wo Tigi Mari ye a fɔla anu ye ko n si a ma, mɔgɛnu ni na anu kɛlɛ faan la. Ala mɔgɛ anubɛ ala kolo-fan dama kunyɛ si to-a-rɔ.

⁹Iyipiti si ma nyamani-tinyanɛ la. Anu bi a lɔnna wo le ma ko Mari le nde la. “A fɔɛ a bolo ko Iyipiti mansɛ letan Nayɛli bɛ la, ado a ko ale le ya a ladan,

¹⁰nde, Mari mara a yoge la. Ado nfan, Nayɛli bɛ fanan yoge le nde la. Ka a bi Migidɔli soe min bi kan tɔ ha ka ke Asuwan soe min bi dugu la ha ka ke Sudan nyamanɛ-dabirɛ ma, n si Iyipiti nyamanɛ bɛɛ ma nyamani-kasaranɛ la.

¹¹Mɔgɔ ti tagama nyɔ hali soge. San bi-nani dɛgɛdɛgɛ, nyɔ-rakolonyanɛ si to filili!

¹²N si Iyipiti nyamanɛ ma nyamani-halakinɛ la ka tenbi nyamanɛ bɛɛ la. San bi-nani dɛgɛdɛgɛ, Iyipiti so-kunbɛ bɛɛ ye kasarɛ kɔrɔ pɔ! So-wo-so ti kasara ka ke anu tɔ. N si Iyipiti kɛ bɛɛ ma kɛlɛ-kɔrɔ-maburilɛnu na tɛrr! Anu si anu buri ka ta anu sigi nyamani-gbɛrɛnu tɔ.”

¹³N Tigi Mari ya a fɔ ko, “San bi-nanɛ kɛ wa ban, n si Iyipiti kɛnu kundɛn anuna nyamanɛ wo rɔ tun.

¹⁴N si a ma, anu kun ni dɛn Iyipiti nyamanɛ dugu la, anu bakuri bɔra kan min, kɔni. Anuna nyamanɛ ra si faga

¹⁵ka tenbi nyamanɛ bɛɛ la. Anu ti ke sibolo-wo-sibolo marala tun. N si anu nafɛya. Anu ti ke nɔ-ko sɔrɔnna sibolo-wo-sibolo ma tun.

¹⁶Isirɛla ti a yigi sa Iyipiti kuma ko-wo-ko la tun. Isirɛla mɔgɛnu ba Iyipiti tinya-bole yen, anu si a lɔn ko anu ya ko-yogomɛ le ma ka anu dun anu na. Wo si a ma, anu ni a lɔn ko anu Tigi le nde, Mari la.”

¹⁷Mala birɛ san mogan-ni-wɔrɔnfilɛ wo karɛ fɔlɛ, tele fɔlɛ ma, Mari kumara n ye. A ko,

¹⁸“Ile hadama-dan, Babilɔn Mansɛ Nɛbukanasa ara ta bui Taya soe ma. A ya a ma, dunɛ ya ala kɛlɛ-dan donu kunyɛ tɛmɛ gbelekan. Donu fanan kɛɛ-gbole kara a ma dunɛ bolo. Kɔnɔ anuna wɔlɛ kɛ wo damasi rɔ, mɔgɔ wo, mansa wo, anu do-wo-do ma tɔnɔ sɔrɔn wɔli kɛ rɔ.

¹⁹Nde, i Tigi Mari ye nala min fɔla, wo le kɛ la ko n bi nala Iyipiti nyamanɛ latenbila Mansa Nɛbukanasa ma. A wa bui nyɔ ma, a si fen-kolomɛ bɛɛ bi ka wonu ma ala kɛlɛ-dannu sarɛ la.

²⁰N si Iyipiti ma mansɛ wo sarɛ la ka a tɛgɛ a ya wɔlɛ min kɛ nde, wo Tigi Mari ye bawo ala kɛlɛ-dannu bi wɔlila nde le ye. Nde, wo Tigi Mari kan le kɛ la.

²¹“Wo wa ma tumɛ min, n si Isirɛla mɔgɛnu tagbɛlɛya gbon! Ile Isikiyɛli nyɛrɛ si kuma alako bɛɛ ni a lɔn ko Mari le nde la.”