Read Kuranko Isikiyɛli 31 Bible Online

Isikiyɛli 31 - Kuranko bible

Isikiyɛli 31

¹Mala birɛ san tan-ni-kelan, wo karɛ sawɛ, tele fɔlɛ ma, Mari kumara n ye ko,

²“Ile hadama-dan, Iyipiti mansɛ anubɛ ala nyamanita-mɔgɛnu manyinika ko n si anu sanka nfen ma? Anu makawara, ado anu makilanta.

³Anuna nyamanɛ mani de iko Lɛbanan-sida-kɔlɔma-tapinpini-bɛ min yanyanɛ ka ke banda-finyɛ ma.

⁴Yi ye a dafɛ min bi a mala, a ye nɔrɔnna. Dugu-kɔrɔ-yi fanan bi a dɛnbɛna alako a ni yanya. Yi min bi ala foolɛ rɔ, wo ya a yi-mɛsɛnu nata kɔlɔma doinu kɔrɔ gbɔngbɔn wo rɔ.

⁵Bawo yi siya ale kɔlɔma rɔ min kɛ, a yanyara ka tenbi kɔlɔma wo bɛɛ la ka a bolon-kunbayanɛnu sɔ a ma, ado anu yan.

⁶Kona-su bɛɛ ya a nyagan kiri a la. Sogenu kɛnɛna wolonna a ninɛ la. Duninya sibole bɛɛ kɛnɛna sigila a ninɛ kɔrɔ.

⁷Kɔlɔma wo kin dɔgɔma-ma-de! A yan ferengben, ado a bolɔn wonu fanan yan! A suli yigira ka ta yi taran dugi kɔrɔ pon!

⁸ Sida-kɔlɔma fenfen sa nde, Alla nyɛrɛta nakɔɛ rɔ mɔgɛ si min sanka a ma, ado hali kɔlɔma minnu tapinpinɛ, anu bolɔnnu ti ke atɛ rɔ. Kɔlɔma-wo-kɔlɔma sa nde, Allata nakɔɛ rɔ min mafɛlɛn di iko kɔlɔma kɛ.

⁹N ya a lakinya ka a bolɔnnu sɔ a ma. Kɔlɔma min bɛɛsi ye nta nakɔɛ rɔ Idɛn, wonu ya a makeliya.

¹⁰“Nba, kɔlɔma wo min fulufele ye yɛlɛla wo la ka tugu banda-finyɛ la, min bi nala mala kɔlɔma wo la, nde, wo Tigi Mari ye nala wo fɔla i ye. A ye tala yanyala nya min, ala wasinteyɛ kuma ye tala yɛlɛla wo nya na le.

¹¹Woletɔ n bara n ban a la. N si a kunyɛ don mansa-sundan do bolo. A bɛnta kɔlɔma ni min sɔrɔn ata karagbɛlɛyɛla ko la, ale mansɛ si wo sigi a ma.

¹²Sibole do min karagbɛlɛ bɛɛ ko, wo si a tɛgɛ ka a sani to dugi ma fuyan! A bolon-kinamɛnu anubɛ a bolon-mɛsɛnu ta si nyɛnsɛn kɔnkɛnu anubɛ lɛɛnu tɔ nyamanɛ wo bɛɛ rɔ. Sibole min bɛɛ siginɛ a ninɛ kɔrɔ, wonu si ta anu kun fɛ.

¹³Konanu si na sigi a gbondon wo kuma. Sogenu si tagama a bolon-takerinɛ wonu kuma.

¹⁴Woletɔ, ka a dabira bi ma, kɔlɔma-wo-kɔlɔma ti taran min si yanya ka ke wo rɔ hali yi taranta a kɔrɔ duk! Kɔlɔma wo-kɔlɔma ti yanya tun ka tugu banda-finyɛ la. Anu dama si faga iko hadama-dan. Anu si kofu anu ta-nyɔgɛnu ma lakira.

¹⁵“Nde, wo Tigi Mari ko kɔlɔma wo wa don lakira tele min ma, yi minnu bi dugi ma, n si a ma, wonu ni tugu a kun na. Wo si ma diyi-tamasere la. N si bɛnu gbala anu worɔn la. N ti sɔn yinu ni bon anu daga ma tun. Kɔlɔma wo wa faga, n si pinpi burun Lɛbanan kɔnkɛnu kuma bɛff! N si a ma gbɔngbɔn bɛɛ la ni ta gbalala.

¹⁶N ba a lakɛ lakira, a huma-human-kan si sibole bɛɛ rakilan. Idɛn kɔlɔma-nyimɛ anubɛ Lɛbanan kɔlɔma-nɔrɔnnɛ minnu bara ta lakira nun a yarɔ, wonu si nyagalen ka a tɛgɛ a bu-koe ma.

¹⁷Sibole minnu siginɛ a ninɛ kɔrɔ nun, a dɛnbɛnɛnu, kɔni, wonu si a bolo bira ka ta anu nyɔgɔn fɛ lakira.

¹⁸“Iyipiti mansɛ anubɛ ala nyamanita-mɔgɛnu denu bi kɔlɔma-wɛ wo la. Idɛn kɔlɔma-wo-kɔlɔma ti ke ala yanyɛ anubɛ ala kinyɛ rɔ. Kɔnɔ kaka, a si ta lakira iko Idɛn kɔlɔma wonu tara nya min ka kofu Alla-lɔnbɛlɛnu ma anubɛ minnu kunyɛ tora kɛlɛ rɔ. Nde, wo Tigi Mari kan le kɛ la.”