Read Kuranko Isikiyɛli 39 Bible Online

Isikiyɛli 39 - Kuranko bible

Isikiyɛli 39

¹N Tigi Mari ko, “Ile hadama-dan, i ni kuma Mansa Kɔgi ma min bi Tubali anubɛ Misɛki sigisɔnnu kun na. A fɔ a ye ko a yogo-fin-bɛ le nde, Mari la.

²N si a kunyɛ bɔ kantɔ-wara la ka na a la Isirɛla kɔnkɔ-nyamanɛ rɔ.

³N si a bolo-maran gbesi a la, a kalɛ ni bui. N si a bolo-nyimɛ fanan gbesi a la, a bɛnnu fanan ni bui.

⁴Ale Mansa Kɔgi anubɛ ala kɛlɛ-dannu anubɛ a dɛnbɛnɛnu si faga Isirɛla kɔnkɛ wonu tɔ. N si a ma, anu suyi wonu ni ma soge anubɛ konanu beli-fan la.

⁵Anu si to tɔnbɔnna anu kin na binyɛ rɔ ka kima yen! Nde, i Tigi Mari ara ban kɛ fɔla.

⁶Mɔgɛ minnu nafɛrɛnɛ siginɛ Megogi nyamanɛ anubɛ kɔgɔ-yi-dafɛ-nyamanɛnu na, fenfen sa anu mabanna nun. N si tɛ tugu nyɔ la. Wo wa ma tumɛ min, bɛɛ si a lɔn ko nde le Mari la.

⁷N si a ma serr, nta Isirɛla mɔgɛnu si a lɔn ko n tɔgɛ sɛninyanɛ. N ti sɔn n tɔgɔ-lafɛya-koe ma tun. Wo wa ma tumɛ min, sibolenu si a lɔn wo rɔ ko nde, Mari le Isirɛlata Alla-sɛnimɛ la.”

⁸N Tigi Mari ya a fɔ n ye ko, “N bi tele min bara-koe ma, fɔ wo wa ke le.

⁹Mɔgɛ minnu siginɛ Isirɛla nyamanita soenu tɔ, wonu si anu yogenuna kɛlɛ-miran matɔnbɔn ka anu ma anuna sɔgɛnu na. A nɛgɛ-walan wo, a kalabɛn wo, a tanba wo, a gbeleka-kundi wo, anu si wonu ma anuna gba-don-sɔgɛnu na. Wonu sinkannu nadɛnnɛ si to anu bolo san wɔrɔnfila kɔrɔ.

¹⁰Anuna ko ti taran sɔgɔ-nyini-ko rɔ tun ka a tɛgɛ kɛlɛ-miran-nadɛnnɛ wonu ma. Minnu nara wo bolo-fannu bi tinɛ wo bolo, wole fanan si wonu bolo-fannu bi anu bolo. Nde, wo Tigi Mari kan le kɛ la.”

¹¹Mari ya a fɔ n ye ko, “Kɛ bɛɛ wa ma tumɛ min, n si kan-tinɛ do di Mansa Kɔginu ma Isirɛla nyamanɛ rɔ, anu si a togon kan min. Anu togon tinɛ wo ye Tagamanɛnuna lɛɛ rɔ min bi Dalɛ Faganɛ tele-bɔɛ wara la. Mansa Kɔgi anubɛ ala kɛlɛ-dannu wa togon nyɔ tumɛ min, anu si lɛɛ wo kele ko, ‘Kɔgila-Kɛlɛ-Dannuna Lɛɛ.’

¹²Karɛ wɔrɔnfila dɛgɛdɛgɛ, Isirɛla mɔgɛnu bi furu-togɔn la alako nyamanɛ si sɛninya nya min.

¹³Nyɔ-nyamanita-mɔgɛ bɛɛ si kofu togonni-kɛlɛnu ma, ado n ba nɔ-ko sɔrɔn lunyɛ min, Isirɛla mɔgɛnu si gbiliyɛ sɔrɔn. Nde, i Tigi Mari kan le kɛ la.

¹⁴Karɛ wɔrɔnfilɛ wo wa ban, anu si mɔgɛ donu yabɔ minnu si ta anu yɛ lakalan furu-bolokanɛnu ma alako anu si anu togon nya min ka nyamanɛ sɛninya.

¹⁵Wonu bi yigi-ni-yɛlɛ min na nyamanɛ wo rɔ, anu ba hadama-den-kole taran kan-bo-kan, anu si anu tamasere sa kole wo dafɛ alako kanba-sinnɛnu ba na anu nabɔ wo ma, anu ni ta a togon Kɔgila-Kɛlɛ-Dannuna Lɛɛ wo rɔ.

¹⁶(Ado nfan, soe fanan si taran nyɔ dala kɛlɛ-dannu tɔgɛ sɛbɛnɛ kan min.) Wo kɔma, nyamanɛ wo si sɛninya tun.”

¹⁷ N Tigi Mari ya a fɔ n ye ko, “Ile hadama-dan, i ni konanu anubɛ firarɔ-sogenu kele alako n bara sarakɛ min bɔ anu ye, anu ni na wo dɔn-tinɛ. Wo si ma ladiya-ba la anu ye Isirɛla kɔnkɛnu tɔ. Anu si to soge dɔnna ka a yele min.

¹⁸Anu si kɛlɛ-dannu anubɛ duninya kun-tiginu suyi dɔn ka anu yele min iko saga-yigi min bi sarakayɛ la, ni wo ma, saga-dan, ni wo ma, baa, ni wo fanan ma, ninki-tɛgan.

¹⁹N ba to anu fagala iko sarakɛ, konanu anubɛ sogenu si anu kɛɛnnu dɔn iko a di anu ye nya min. Anu si to anu yele minna ha wo ni anu bira.

²⁰A kɛlɛ-den wo, a so wo, a so-laburila wo, sogenu si fa suyi kɛnu na ladɛn wo kuma dɔgɔma-ma-de! Nde, i Tigi Mari kan le kɛ la.”

²¹Mari ya a fɔ n ye ko, “N si a ma, sibolenu ni nna gbiliyɛ yen. N si nna telenbagayɛ lata yarɔ nya min nta sɛnbɛ la, n si wo yira anu na.

²²Ka a bi wati wo ma, Isirɛla mɔgɛnu si to a lɔnna wo le ma ko anuta Mari Alla le nde la.

²³Sibolenu bi a lɔnna wo le ma ko Isirɛla mɔgɛnu ya hakɛ min kɛ, wo le ya anu don biralɛ rɔ. N ya n kan-kɔ sɔ anu na. N sɔnta anu yogenu ni anu nɔ ka anu faga kɛlɛ rɔ.

²⁴N ya anu tɔrɔ iko a bɛnta, anu ni tɔrɔ nya min ka a tɛgɛ anuna karagbɛlɛyɛ anubɛ sɛninyabɛlɛtayɛ ma. Wo kɔma, n ya n bole bɔ anu bara-koe rɔ.”

²⁵N Tigi Mari ya a fɔ n ye ko, “Kaka, n si kinikini Yakoba kegeyɛnu ma, Isirɛla mɔgɛnu, kɔni. N si a ma, anu ni sabati tun. Wo si a ma, n tɔgɔ-sɛninyanɛ ni to.

²⁶Anu ya anu ban n na min kɛ, n ya anu namiliya wola ko la. Anu ba ban sigila tun anuna nyamanɛ rɔ yisi-kimɛ la, ado mɔgɔ sa anu tɔrɔla tun, anu na si nyina anuna miliyɛ wo la.

²⁷N si nna mɔgɛnu nadɛn kan-tina-kelen ka anu bɔ nyamani-gbɛrɛnu tɔ anu yogenu siginɛ kan min. N bi wo dama mala le alako ka a yira sibole wonu na ko n sɛnima.

²⁸Nde le ya anu don biralɛ rɔ nun, ado nde le nara anu na tun anuta nyamanɛ rɔ. Hali mɔgɔ-den-kelen ma to kɔma. Wo bɛɛ wa kɛ tumɛ min, nna mɔgɛnu bi a lɔnna wo le ma ko anuta Mari Alla le nde la.

²⁹N si duwa nta mɔgɛnu ye ka n niyi labɔn Isirɛla mɔgɛnu kuma, ado n ti anu boloka wo nya tun! Nde, anu Tigi Mari le wara kɛ fɔ.”